6
Uma a ya'in kapalaka̱shi ku unushi u le
1 <<Ta̱wa̱i, tsu bonoi u Vuzavaguɗu.
U sazasa tsu ta̱, ama wi ta̱ o kupotsokpo tsu gogo na,
u uka tsu ta̱ muna,
ama wi ta̱ a̱ ku pala untsu a̱ tsu.
2 Ci ya'an baci ayin ere wi ta̱ a̱ kusaba'a tsu,
a kanna ka tatsu wi ta̱ a̱ kuɗa̱ngusa̱ tsu,
ka̱ ta̱ tsu da̱sa̱ngu e kelime ka̱ ni.
3 Tsu kira̱nga̱i, adama a na tsu yevei Vuzavaguɗu,
kuta̱wa̱ ku ni mayun ɗa tsu na ubuta̱ u tsu akana.
wi ta̱ a̱ kuta̱wa̱ tsu, tsu mini ma̱ Ka̱shile,
tsu mini ma ka'wun, ma na ma tsu zuwa iɗika i ta̱na̱.>>
4 Vuzavaguɗu u danai, yiɗa̱i n kuya'anka n a̱ ɗa̱, aza a Ifirayimu?
Yiɗa̱i n kuya'anka n a̱ ɗa̱, aza a Yahuda?
Ucigi u ɗa̱ wi ta̱ tsu egele makyan kenu tsu puwa̱nka̱,
tsu ciza tsu na tsu tsu sa̱ruwa̱ n usana.
5 Adama a nannai ɗa n suki eneki a̱ va̱ a kapusai nu,
mu unai le n kadanshi ka̱ una̱ u va̱,
afada a̱ va̱ i ta̱ tsu kutashi ku kanna.
6 n ciga alyuka a̱ ɗa̱ ba,
ama in ciga ta̱ kamayun n usuɓi wa̱ a̱ ɗa̱,
kuyeve ku Ka̱shile kula'a ta̱ alyuka o kusongu.
7 Ama a sula ta̱ uzuwakpani u va̱ tsu A̱da̱mu,
a ya'ankai mu unambi wu usuɓi.
8 Giliyadu likuci i ɗa ya aza a ka gbani-gbani,
wi ta̱ a̱ kuka̱ra̱sa̱ n urotu wu mpasa.
9 Tsu na aza a̱ ma̱ga̱la̱ka̱ a̱ tsu puta̱ vuma,
ta anan ganu a gbaɓai kaci nannai,
adama a na a ya'an munuka a uye u Shekem,
a kuya'an ka gbani-gbani.
10 Me ene ta̱ ili yi unata̱ a kpa'a ki Isaraila,
aza a Ifirayimu a kuya'an cishakanlai,
ɗa aza a Isaraila okpoi o kutono a̱ma̱li.
aza a Isaraila a natukpa ta̱ ka̱ci ke le.
11 A̱ɗa̱ aza a Yahuda,
a zuwaka ɗa̱ ta̱ kanna ka vu kya'a.
a makyan ma na ma kubono n uma a̱ va̱ a na a̱ pura̱i a kubana a ugbashi,
m bonoko le n uciyi u le.