9
Atakaci aza a Isaraila
1 Ka̱ta̱ i ya'an ma̱za̱nga̱ ba, a̱ɗa̱ aza a Isaraila,
ka̱ta̱ i ya'an ma̱za̱nga̱ tsu uma a na a buwai ba.
Adama a na i ya'an ta̱ unambi wu usuɓi, ɗa i ka̱sukpa̱i Ka̱shile ka̱ ɗa̱.
i tonoi a̱ma̱li, tsu kashakanlai ka na ki o kutono ali.
a̱ ubuta̱ wu ulanga u kulapu dem,
i dengei ka̱ci ka̱ ɗa̱ a̱ ka̱ma̱li ka Balu,
tsu ashakanlai,
yi ta̱ a kupana uyo'o u katsupu ka na yi e, kusheshe a̱yi ɗa u nekei ɗa̱.
2 Ubuta̱ wu ulanga u kulapu n ubuta̱ u kupisha ma̱kya̱n wi a ku lya'atangu ba.
ma̱kya̱n ma savu mi a ku yawa le ba.
3 Uma a Isaraila a uɓon u gaɗi a̱ kuda̱sa̱ngu iɗika i Vuzavaguɗu ba,
i ta̱ o kubonoko n aza o yoku a masar.
aza o yoku kpamu i ta̱ a kubana Asiriya.
ra̱ka̱ vi le i ta̱ a kulya'a ilikulya yi unata.
4 I a kufuɗa kuneke Vuzavaguɗu alyuka a̱ ma̱kya̱n ba.
wi a kuya'an ma̱za̱nga̱ n kune'e ku le ba.
ili i kulya'a i le n alyuka e le i natukpa le ta̱,
tsu ili kulya'a ya aza a kpalu.
vuza na baci de dem u lya'i i ɗa wi ta̱ o ko okpo n ma̱shinda̱.
adama a na ili i kulya'a ya yi ta̱ a kuya'anka le a̱guma̱ a kambulu koci,
i a kubanka i ɗa a kpa'a ku Vuzavaguɗu ba.
5 Yiɗa̱i tana yi a kuya'ansa,
a kanna ka na o foɓusoi adama a̱ ka̱ɗiva̱?
Kanna ka̱ ka̱ɗiva̱ ka Vuzavaguɗu?
6 Ko i la'aka baci n wuma u ɗa̱ a kanna ka nanlo,
Aza a Masar i ta̱ o kuɓolongu ɗa̱,
i ta̱ a kuciɗa̱ngu ɗa̱ a Memfisu a iɗika i le.
Awana i ta̱ a ku isa ili i singai i ɗa̱.
awana a i ta̱ a kupala a̱pa̱m e le.
7 Ayin atakaci a̱ ta̱wa̱ ta̱,
kanna ka katsupu ka yawa ta̱.
ayin a na yi a̱ kuciya̱ katsupu ka ili i na i ya'in,
Isaraila wi ta̱ e kuyeve.
A danai, keneki kalau ka'a,
i dana ta̱ kpamu vuza na wi n ayinviki kadanshi n a̱yi kajarishi ka'a.
adama ka̱bunda̱i ka̱ unushi ka̱ ɗa̱, i iwain mu.
8 Keneki, a̱yi ɗa vuza kindi adama a uma Isaraila e kelime ka Ka̱shile ka̱ ni,
ama n nanai dem yi a kuzuwaka le maza. a uye u le ra̱ka̱ tsu nnunu.
A kpa'a ku Vuzavaguɗu feu i ta̱ a tsurala n keneki.
9 A bana ta̱ da'angi a̱ ka̱tsuma̱ ku unambi u kamayun,
tsu ayin a aza a Gibiya.
Vuzavaguɗu wi ta̱ a kuciɓa n kawuya ka̱ ɗa̱.
wi ta̱ a ku takacika ɗa̱ adama unushi u ɗa̱.
10 <<Vuzavaguɗu u danai, n cina ta̱ aza a Isaraila a kakamba a na umaci u ma̱biri.
me ene ta̱ ikaya i ɗa̱ tsu umaci wu ugiti u ma̱biri,
ama a na a̱ ta̱wa̱i a Balu-piyo,
ɗa erengi ka̱ci ke le u ka̱ma̱li ka Balu
ɗa okpoi ili yu unata ci ili i na a cigai.
11 Tsugbayin tsu Ifirayimu ci ta̱ a ku imkpa tsu manunu
babu kumatsa, babu kpamu kuya'an ku ka̱tsuma̱, babu kuɗika ku ka̱tsuma̱
12 Ko o woku muku,
mi ta̱ a ku una n ɗa babu o gbonguro.
ali a kubana a vuza vu ukocishi,
ke le ko kotso ta̱ a makyan ma na baci n ka̱sukpa̱i le.
13 Mayun, me ene ta̱ kumaci ku Ifirayimu, tsu nɗanga n dabino a iɗika i singai.
ama ɗanna anana,
Isaraila a̱ utuka̱ ta̱ n muku n le a kukiɗa.>>
14 Neke le, Vuzavaguɗu
yiɗa̱i vi e kuneke le?
Neke le kamatsatsu ka na ka̱ kutuka̱ n ka̱tsuma̱ ba,
koɓolo n mani me ɗekpu.
15 <<Adama a ka gbani-gbani ke le a Giliga,
Ta ɗe n iwain le.
Adama a unushi u na a ya'in,
Mi ta̱ o kuloko le a kpa'a ku va̱.
Mpa m buwa a kuciga le kpamu ba,
aza a gbagba'in e le ra̱ka̱ aza o kugoyi a ɗa
16 A una ta̱ uma a Ifirayimu,
aralu e le e ɗekpe ta̱,
a kumatsa muku ba.
Ko ta na a matsa baci,
Mi ta̱ a ku una muku n le n na a cigai.>>
17 Ka̱shila̱ ka̱ va̱ ki ta̱ a ku iwan le,
adama a na o tono kadanshi ka̱ ni ba,
i ta̱ o ko okpo aza a̱ ka̱ka̱ra̱sa̱ a̱ ka̱tsuma̱ a uma aduniyan.