Katagarda ka
ISHAYA
Kuɓa̱yuwa̱
Kula ku katagarda ki Ishaya kula ku ɗa ku keneki ka gbayin ko yoku ka na ko yongoi a Urushelima a̱ya̱ n a̱bunda̱i a na a lazai ɗe. Ka ya'an ta̱ kadanshi ka atakaci a na iɗika i Yahuda i so'i e ekiye aza a Asiriya, n tsu na keneki ka ke ɗekei uma a koɓolo n aza e kelime e le adama a na o yongo n wuma u ciɗa ayin tutu, n tsu na ukpa̱ɗi u kupanaka Ka̱shile u tsu tuka̱ n atakaci. Katagarda ka ya'in kpamu kadanshi ke kusheshe ku Ka̱shile a kubana u uma a̱ ni n tsu na a kuya'an n iɗika i na i buwai, n tsu na kpamu o kutono wila̱ u kanna ka Ashibi, n alyuka n kuya'an ka avasa. Ushani u kadanshi ku uyevi punu a katagarda ka u ɗaɗa a masala ma 61:1-2, udani u na Yesu u ya'ankai ulinga a ayin a na u gita̱i ulinga u ni.
Ili i na yi punu udari a katagarda ka nampa:
Uɓarangi n uzuwakpani 1:1; 12:6
Atakaci a iɗika kakau 13:1; 23:18
Afada a̱ Ka̱shile a̱ kuta̱wa̱ aduniyan 24:1; 27:13
Uɓarangi u kelime n uzuwakpani 28:1; 35:10
Mogono Hezikaya vu Yahuda n aza a Asiriya 36:1; 39:8
Akaka a uzuwakpani koɓolo n a̱pa̱ 40:1--55:13
Uɓarangi kakau n uzuwakpani kakau feu 56:1; 66:24
1
1 Kene ku na Ishaya maku ma Amazo we enei adama a Urishelima n Yahuda a ayin o tsugono a Uzaya, n Jotan, n Ahazu, n Hezikaya ngono n Yahuda.
Iɗika yu ugbamukaci
2 Gaɗi pana, ka̱ta̱ avu iɗika vu zuwa atsuvu,
adama a na Vuzavaguɗu u dansa ta̱,
<<Muku n na n kumgbasai ɗa n la̱na̱i,
a ya'anka mu ta̱ ugbamukaci.
3 Anaka e yeve ta̱ maguɓi me le,
njaki feu n yeve ta̱ ubuta̱ u na kesheku ke le ke ci ne'e le ilikulya,
ama aza a Isaraila e yeve ba,
uma a̱ va̱ e yeve ba.>>
4 A̱ɗa̱ iɗika yu unushi,
uma a na i tukpa n kawuya,
ka̱tsura̱ ka aza a̱ nkunu,
muku n na n nekei ka̱ci ke le adama a kuya'an ku kalya'a.
A̱ ka̱sukpa̱i uye u Vuzavaguɗu,
ɗa o goyoi vuza Ciɗa vi Isaraila,
ali ɗa o bonoi a zuwakai ni kucina̱.
5 Yiɗa̱i i zuwai ɗa vu buwai o morono ma adama ali ɗa a buwai a kulya'a kelime n kulapa wu?
Yiɗa̱i i zuwai ɗa vi a kulya'a kelime n ugbamukaci?
Kaci ka̱ nu ki gbaga ba,
ka̱ɗu ka̱ nu kpamu ka̱ ciya̱ ta̱ muna.
6 Ili i na i gita̱i punu a ataka e ene a̱ nu, ali a kubana a kaci,
babu ubuta̱ u na wi gbaga,
Sai ukpan wo ojuno,
n untsu, n ajakata,
I feu uza̱'i ba,
ko wali n akashi ko usuri m mani'in.
7 Iɗika i ɗa̱ yo okpo ta̱ agali,
ɗa kpamu likuci i ɗa̱ i kula̱i n akina.
Omoci a isai ashina a̱ ɗa̱,
a̱ɗa̱ e kene,
ɗa a̱ la̱nga̱sa̱i ili dem i na e enei punu.
8 A̱ ka̱sukpa̱ ta̱ likuci i Urishelima,
tsu ka̱pa̱m ka kindi ka kashina ki itacishi,
ko tsu ka̱pa̱m ka na ki a̱ ubuta̱ u kashina ka̱ nɗimbi ma Ayahuda,
uteku ci likuci i na a lya'i n kuvon.
9 Ishi baci Vuzavaguɗu Mala'imili
u buwaka aza o yoku n wuma ba,
ci ishi ta̱ o kokpo tsu Sodom,
ka̱ta̱ kpamu tso okpo tsu Gomora.
10 Panai kadanshi ka Vuzavaguɗu,
a̱ɗa̱ na yi tsa aza o tsugono o Sodom,
panai wila̱ u Ka̱shile ka̱ tsu,
a̱ɗa̱ na yi tsu uma o Gomora.
11 Vuzavaguɗu u danai, <<Ka̱bunda̱i ka alyuka ka̱ ɗa̱,
yiɗa̱i ki a kuya'anka mu.
N ciya̱ ta̱ alyuka o kusongu
a a̱giri koɓolo n anaka a ikyamba ali u la'i tsu na n cikalai.
Mi m mali ma mpasa
mo obomburom ni nkyon koɓolo nu nraɗika ba.
12 <<Ana vu ta̱wa̱i wa̱ va̱,
yayi we ecei nu ili i nampa,
a̱ kuka̱ra̱sa̱ punu a ulanga wa̱ a̱'isa̱?
13 Ka̱sukpa̱ kutuka̱ n alyuka a na i ili i makara wa̱ va̱ ba,
ili i ma̱gula̱ni i nu yo okpo ta̱ ili yu unata a kuta̱wa̱ wa̱ va̱.
I ci indana ta̱ ka̱ɗiva̱ ko wotoi u savu, n kanna ka Ashibi, n oɓolo a gbayin,
ama mpa ma̱ kushuku n oɓolo a kavama a̱ unushi a̱ ɗa̱ a nanlo ba.
14 N ciga ka̱ɗiva̱ ko wotoi u savu u ɗa̱,
koɓolo n ka̱ɗiva̱ kakau a na yi n aɗa ba.
O okpo mu ta̱ ucanuku a kaci ka̱ va̱,
mo wo'o ta̱ n kucanuku u ɗa̱.
15 Ayin a na baci i ɗengusa̱i ekiye adama a na i ya'an kavasa a kubana wa̱ va̱,
mi ta̱ o kusokongu a̱shi a̱ va̱
ko i vasa baci n ugbami,
mi a kupanaka ɗa̱ ba.
Ekiye a̱ ɗa̱ a̱ na̱mgba̱ ta̱ nu mpasa ma aza a na i n unushi ba.
16 Sa'i i takpa nshinda̱ n ɗa̱.
Takpai ukuna u wuya u ɗa̱
kelime ka̱ va̱.
ka̱sukpa̱i kuya'an ku kawuya,
17 pi'isai kuya'an ku kasingai,
la̱nsa̱i nwalu n singai,
ɓa̱nka̱i aza a na i o kuso'o atakaci.
Ɓa̱nka̱i mkpan,
koɓolo n agapa.
18 <<Ta̱wa̱i gogo na ci sheshei koɓolo
Vuzavaguɗu u danai,
Ko a na unushi u ɗa̱ u ya'in ɗe tsu na ili i ci ya'an ushili ka̱u,
wi ta̱ o kubono wa̱ri ka̱u tsa akaɗa,
ko u ɗa wi ushili an kejikenle,
wi ta̱ o kubono wa̱ri an tsugbere.
19 Yu ushuku baci ɗa i tonoi,
yi ta̱ a kulya'a ili i na i la'i n kuga'an a iɗika ya,
20 ama i iwan baci ɗa i ya'in ugbamukaci,
kotokobi ki ta̱ e kupeɗe mpasa n ɗa̱.>>
Ɗaɗa ili i na yu uta̱i a̱ una̱ u Vuzavaguɗu.
Likuci yi unambi wu usuɓi
21 Indanai bi'i tsu na likuci yu uneki u ka̱ɗu
yo okpoi an kashakanlai.
Yi ishi ta̱ n kasingai ka̱u
koɓolo n usuɓi kpamu u tsu yongo ta̱ punu,
ama gogo na o okpo ta̱ aza a̱ ma̱ga̱la̱ka̱.
22 Azurufa a̱ ɗa̱ okpo ta̱ babu a̱miki.
Ma̱ra̱ ma̱ nu ma na vu la'i n kuciga mo okpoi usatari m mini.
23 Aza e kelime a̱ ɗa̱ i ta̱ n ugbamukaci,
okpoi a̱ja̱'a̱ o oboki,
okpoi kpamu n ucigi u kalya'a
koɓolo n ucigi u kisa kune'e.
A̱ ɓa̱nka̱ aza a na i mkpan ba,
o doku kpamu e keɓece n ukuna wa aza a na i agapa ba.
24 Adama a nannai, Vuzavaguɗu, Mala'imili mo Osoji a gaɗi,
Vuzagbayin va aza a Isaraila u dana ta̱,
<<To mi ta̱ o kuyotsongu wupa u va̱ wa aza a na a iwain mu,
ka̱ta̱ kpamu n tsupa wa irala a̱ va̱.
25 Mi ta̱ o kubono ma̱ shilika̱ n a̱ɗa̱,
mi ta̱ a kulapula ukpa̱ɗi u kusuɓa̱ u ɗa̱
ka̱ta̱ n takpa ukpa̱ɗi u kuyongo ciɗa u ɗa̱.
26 Mi ta̱ o kubonoko n aya'inafada a̱ɗa̱ tsu na ishi ɗe n tsumani,
koɓolo n aza e kuneke odoki tsu na cau ishi.
Nannai ɗa e kuɗeke ɗa̱
Likuci ya aza a Usuɓi,
Likuci yu uneki u ka̱ɗu.>>
27 Sihiyona wi ta̱ a̱ kuciya̱ ushibi n kasingai,
aza a na a̱ shika̱i unushi i ta̱ a kisa le n usuɓi.
28 Ama aza a ugbamukaci n aza a̱ unushi i ta̱ a kuya'an wuni,
aza a na a iwain Vuzavaguɗu i ta̱ a kuya'an uni'wa̱ta̱ngi.
29 Vi ta̱ a kupana wono adama a maɗanga mo oku
ma na vu zuwakai ka̱ɗu,
vi ta̱ o kokpo n wono adama a kashina ki ishi'wan
ka na vu zagbai.
30 Vi ta̱ o kokpo an maɗanga mo oku ma na a̱vuku a̱ ni a lumbai,
tsu kashina ki ishi'wan ka na ka nambai mini.
31 Vuza vu utsura wi ta̱ o kokpo an ci'iwa̱
ka̱ta̱ ulinga u ni u leɓece a akina.
Ele n ulinga u kawuya u le i ta̱ a̱ kukula̱ koɓolo,
babu vuza na u kufuɗa wa̱ kima̱sa̱ akina a nanlo.