13
Kene ku wuya adama a Babila
1 Na va ɗaɗa akaka adama a Babila a na Ishaya maku ma Amazo wi isai a̱ ubuta̱ u Ka̱shile.
2 Ɗengusa̱i urotu u kakashi a nsasan n na mi n ili ba,
orukpokoi le ka̱u,
ɗekei le n kukiye adama a na a uwa
utsutsu u likuci ya aza a gbagba'in.
3 N neke ta̱ ɗe kadanshi a kubana wa aza ciɗa a̱ va̱.
N ɗeke ta̱ ɗe osoji a̱ va̱ a bana o yotsongu a na mpa mi a wupa.
I ta̱ a kuya'an ma̱za̱nga̱ a ayin a na baci n lya'i.
4 Panai, kaca'a a gaɗi vu kusan
an koɓolo ka gbayin ka uma, adanshi ka̱bunda̱i ko osoji ka'a ki nwalu a kubana a ubuta̱ u kuvon.
Panai uteku u na tsugono kakau ci o yoroli,
adanshi uma a aduniyan a ɗa i a nwalu koɓolo.
Vuzavaguɗu ɗa wi o kufoɓuso
osoji adama o kuvon.
5 A̱ uta̱ ta̱ a iɗika i da'in ka̱u,
ɗe a uteku wa aduniyan,
Vuzavaguɗu wi ta̱ a̱ kuta̱wa̱ n yunatsu i wupa u ni
adama a na wu una aduniyan dem.
6 Lapai una̱, adama a na kanna ka Vuzavaguɗu ka yawa ta̱ ɗevu.
Ki ta̱ a̱ kuta̱wa̱ tsu na munuka ma̱ tsu uta̱ u Mala'imili.
7 Adama a nannai ekiye dem i ta̱ a̱ kukuwa̱ adama o wovon,
Ka̱ɗu de dem ki ta̱ e kuderekpe.
8 Ka̱ta̱ uma a̱ rikpa̱ adama o wovon.
Mɓa̱la̱ n una̱mgbi u ka̱tsuma̱ mi ta̱ kuna le,
i ta̱ a kupana mɓa̱la̱ tsu vuka va̱ a̱ga̱nda̱ a limata.
I ta̱ a̱ kindanai n wovon
ka̱ta̱ o oro a̱shi e le adama o wono.
9 La̱na̱, kanna ka Vuzavaguɗu ka ki ta̱ lo a̱ kuta̱wa̱,
kanna ka atakaci n kanna ka̱ mɓa̱la̱, koɓolo n wupa u gbayin
an wo bonoko likuci ya agali.
Ka̱ta̱ wu una aza a unushi a na i punu dem.
10 Azangata a gaɗi n ili i na yi punu a̱ ka̱tsuma̱ ke le dem
o kudoku e neke kutashi ba.
Kanna ki ta̱ o kokpo n ka̱yimbi,
wotoi kpamu wo kudoku we neke kutashi ba.
11 Mi ta̱ a kutakacika aduniyan adama a kawuya ka̱ ni,
aza a gbani-gbani kpamu adama a unushi u le.
Mi ta̱ a kuzuwaka aza a ugbamukaci uteku
ka̱ta̱ m bonoko a̱ra̱ɗi a aza a ugbamukaci ukuna u gbani.
12 Mi ta̱ a kuzuwa uma a ya'an ugushi u la'a azanariya ende'en,
ka̱ta̱ n zuwa vuma wo okpo atakaci a̱ kuciya̱ uteku tsa azanariya a singai a Ofiri.
13 Adama a nannai a kanna ka na ka̱ɗu ka̱ va̱ ka̱ kula̱i, mi ta̱ a̱ kugba̱ɗa̱sa̱ gaɗi,
ka̱ta̱ aduniyan a̱ gba̱ɗa̱ a̱ ubuta̱ u na i
adama a wupa u Vuzavaguɗu Mala'imili,
a kanna ka wupa u gbayin u ni.
14 Uma dem i ta̱ a kusuma an mesheun ma na o lokoi a̱ ubuta̱ u kutambu,
ko tsu nlala n na mi babu maguɓi.
Vuma dem wi ta̱ o kubono a̱ ubuta̱ u uma a̱ ni,
yaba dem wi ta̱ a kusuma o kubono a iɗika i ni.
15 Vuza na baci de a̱ ciya̱i i ta̱ a kusapa yi m masara sai ukpa̱,
vuza na kpamu a̱ ka̱na̱i i ta̱ a kuna yi n kotokobi.
16 I ta̱ a kukiɗa nreɓu n le gbati-gbati
a̱ a̱shi e le.
I ta̱ a̱ kula̱nga̱sa̱ i i'uwa i le a̱ pura̱ ucanuku u le,
ka̱ta̱ a̱ ka̱na̱sa̱ a̱ma̱ci e le a ya'an tsugbani n ele.
17 VUZAVAGUƊU u danai, La̱na̱, mi ta̱ a kukushangu aza a Madaya a̱ shilika̱ n ele,
uma a na e keɓecei n azanariya
ko a cigai azurufa ba.
18 Ni njiki n le n ɗa a kunaka olobo a utsura,
a kupana asuvayali a nreɓu
ko o yotsongu ka̱ɗu ka asuvayali a kubana u muku ba.
19 Babila, tsugbayin tsu tsugono,
a̱ra̱ɗi a tsugbayin tsa aza a Kaldiya,
i ta̱ o kokpo tsu na u ya'in n Sodom n Gomora,
ayin a na baci Ka̱shile ka vakangi le.
20 Babu vuza na u kuda̱sa̱ngu ɗe
ko u yongo ɗe ali nu ntsukaya n na n kuta̱wa̱.
Babu kpamu vuza va Alaraba vu na u kuka̱nza̱ ɗe ka̱pa̱m ka̱ ni,
babu maguɓi ma na ma kulina ɗe n ushiga u ni.
21 Nnama n kakamba mi ta̱ a kuvaku lo.
Nshe'e n kakamba mi ta̱ a kushana a kpa'a ku ni.
Mkpa̱tuwa̱n mi ta̱ a kuya'an lo cikinda,
nren mi ta̱ o kuyongo lo a kaɗikpangusu.
22 A̱kunzu i ta̱ o kuyongo a nshilya mu utsura n ni,
ka̱ta̱ nshe'e n kakamba n ya'an enle e kefeku ka singai ka̱ ni.
Ayin a iɗika i Babila o okpo ta̱ ukeci,
a ɗa a buwa m megeshe ba.