16
1 Suku maku ma malala tsu kune'e a kubana u vuza vu tsugono vi iɗika,
n ɗa mu uta̱ a Sila o tono nu n ɗa n uye u kakamba,
a kubana a kusan ku singai ku Sihiyona.
2 A̱ma̱ci aza o Mowabu o okpo ta̱ uteku tsu nnu
n na o lokoi a cikinda
ɗa a wacuwai ɗe a kapasa ko kuyene ku Anu.
3 <<Nekei kadanshi,
ka̱ta̱ i ya'an kasingai,
pala tsu uteku tsu maɗanga ma na me ci neke kulu
a kanna ku usuɗukpi,
ka̱ta̱ vu ka̱sukpa̱ tsu tsu uvuka a̱ kulu ku nu.
A̱ tsu olokushi a ɗa, sokongu tsu a̱ ubuta̱ u na vuza we kene tsu ba.
4 ka̱sukpa̱i aza a Muwabu a na
o lokoi o yongo n a̱ɗa̱,
okpoi aza a na a kisa le,
a̱ ubuta̱ wa aza a na a kuna le.
Keneki ka atakaci ki ta̱ a kuyawa a uteku,
ka̱ta̱ munuka mo kotso,
aza a̱ vishili feu i ta̱ a̱ kuka̱sukpa̱ iɗika ya.
5 N ucigi Vuzavaguɗu wi ta̱ a kuzuwa kakuba ko tsugono,
n kasingai ka̱ta̱
vuza yoku e kefeku ka Dawuda
a̱yi na u ci ya'an afada n kasingai,
ka̱ta̱ u ya'an moloko u tuka̱ n kasingai.>>
6 Tsu pana ta̱ ɗe a̱ra̱ɗi a aza a Muwabu,
uteku tsu na wi n a̱ra̱ɗi,
n ugbamukaci, n a̱ra̱ɗi kpamu koɓolo n ishikushi i ni.
Ama a̱ra̱ɗi a̱ ni gbani ɗa.
7 Adama a nannai ya'an aza a Muwabu a̱ shika̱ adama a̱ ka̱ci ke le.
Shika̱i
ka̱ta̱ i ya'an una̱mgbuka̱tsuma̱
adama a uma a Kiri-harese.
8 Ashina o Heshibon a lumba ta̱,
koɓolo n itacishi i Sibuma feu.
Ngono ma aduniyan
n la̱nga̱sa̱ ta̱ itacishi i na i la'i n uga'in,
i na i tatsai ali i yawai Jaza
ali a kubana a kakamba.
Aralu e le a walai
ali a yawai a mala
9 Ɗaɗa n shika̱i tsu na Jaza u shika̱i,
adama a itacishi i Sibuma.
n ta̱na̱ta̱ngu wu ta̱ n kujilya.
Avu Heshibon n Eliyali,
Kaca'a ka̱ ma̱za̱nga̱ adama a umaci u na u ge'wei koɓolo n ayin a vikya'a a̱ nu
ka yawa ta̱ uteku.
10 Ma̱za̱nga̱ n kupana ku yo'o ma buwa lo a ashina a ba.
A ashina a itacishi babu vuza na u kuya'an kaca'a ko vishipa.
Babu vuza na u kudoku wa pisha ma̱kya̱n
a̱ ubuta̱ u kupisha u le,
adama a na n zuwa ta̱ uteku u ma̱za̱nga̱ wa.
11 Adama a nannai ka̱ɗu ka̱ va̱ ka̱ na̱mgba̱ ta̱ uteku tsu kaca'a ku umolu adama a Muwabu,
punu a̱ ka̱tsuma̱ ka̱ va̱ kpamu adama a̱ Kiru-harese.
12 A ayin a na baci Muwabu wu uta̱ka̱i ka̱ci ka̱ ni e keteshe ka̱ a̱'isa̱, ka̱ci ka̱ ni ka'a u ko'uso koci. Ayin a na baci u banai a̱ ma̱va̱li ma̱ ni adama a na u ya'an kavasa, wi a̱ kuciya̱ wu ushuki ba.
13 Na va ɗaɗa kadanshi ka na Vuzavaguɗu u dansai m megeshe ɗe adama a Muwabu.
14 Ama gogo na Vuzavaguɗu u ya'an ta̱ kadanshi u danai, <<A̱ ka̱tsuma̱ ka̱ a̱ya̱ a tatsu uteku tsu na kagbashi ka na a ɗikai ulinga u tsu kece. Kupana ku uyo'o ku Muwabu n ka̱bunda̱i ka uma a̱ ni, i ta̱ o kokpo n wono, aza a na a kula'a kpamu i ta̱ o kokpo kenu babu utsura.>>