17
Kene ku wuya adama a iɗika i Dimaska
1 A kaka adama a Dimaska,
La̱na̱, Dimaska wo kokpo likuci kpamu ba,
ama wi ta̱ o kubono agali.
2 Likuci n a̱bunda̱i ya aza a Aro yi ta̱ o kokpo ukuna u gbani,
ka̱ta̱ wo okpo ubuta̱ u kalina ku ushiga wu nlala,
ka̱ta̱ a vaku lo babu vuza na u kuneke le wovon.
3 Vuzavaguɗu Mala'imili u danai, Likuci yu ukanji i Ifirayimu yi ta̱ o kukotso,
ka̱ta̱ tsugbayin tsu tsugono tsu Dimaska,
n aza a na a buwai a Siriya tsu puwa̱nka̱
an tsugbayin tsu muku mi Isaraila.
4 A kanna ka nanlo tsugbayin tsu Yakubu ci ta̱ a̱ kuyikpa̱,
ka̱ta̱ ugbonguri wi ikyamba u ni u yamba.
5 Wi ta̱ o kokpo tsu na kacimbi ka tsu kapa ilikulya,
ka̱ta̱ kpamu u kya'a n ekiye a̱ ni,
n uteku tsu na kpamu vuza u ci ya'an kuɗayu
a̱ ka̱ra̱'a̱ ka Rafi.
6 Vuzavaguɗu Ka̱shile ki Isaraila u danai, ko n nannai ili i kuɗayu yi ta̱ a kubuwa,
uteku tsu na a tsu lapa maɗanga ma zaitu
ka̱ta̱ a nusa umaci u re ko u tatsu
ko u na̱shi ko u tawun
ɗe a acaka a na a la'i
n da'in n kumatsa ka̱u.
7 A ayin a nanlo uma i ta̱ a kinda kaya'in ke le, ka̱ta̱ o bonoko a̱shi e le a ubuta̱ u vuza ciɗa va aza a Isaraila.
8 I o kudoku a kinda atali alyuka a na a ya'in n ekiye e le ba, i kpamu o kudoku a cikpa ili i na a ya'in n ekiye e le ba, ko Asherimi ko atali alyuka a ili i ma̱gula̱ni.
9 A kanna ka nanlo likuci i gbagba'in i le, i na a̱ ka̱sukpa̱i adama a aza a Isaraila yi ta̱ o kokpo tsu ubuta̱ u na a̱ ka̱sukpa̱i ɗa wo okpoi mura̱ta̱i n a̱vuku. Ra̱ka̱ wi ta̱ o kokpo agali.
10 Adama a na avu vi cinukpa ta̱ n Ka̱shile ka na ki isai nu,
vi ciɓa n kakpanlai ka na ko sokongi nu va ba.
Adama a nannai, vi ca̱'i icu'u i na vi cigai,
ɗa vi ca̱'i icu'u yi itacishi i yoku i na yu uta̱i a̱ ubuta̱ u yoku.
11 Vi ta̱ a kufuɗa va zuwa le o gbonguro a kanna ka na vi ca̱'i le,
ka̱ta̱ kpamu vu zuwa le a ya'an a̱pa̱lu n usana u na vi ca̱'i le.
Ko n nannai vikya'a vu nu vi ta̱ o kokpo ukuna u gbani
a kanna ka̱ mɓa̱la̱ nu mɓa̱la̱ n na n kukpa̱ɗa̱ kuta̱na̱.
12 Panai osoji a aduniyan n a̱bunda̱i
a̱ yura̱ tsu yura̱ i mala,
panai akpanga a gbagba'in o osoji
a̱ kushida̱ m moloko uteku tsa aɓau a utsura.
13 Aduniyan n a̱bunda̱i a̱ yura̱ uteku tsu yura̱ i mini ma̱ a̱bunda̱i,
ama Ka̱shile ki ta̱ a kudansika le, ka̱ta̱ ele a imkpa a bana da'angi
o kutono wunla̱i an kopo a gaɗi vu nsasan
tsu na wunla̱i u kabatalikpau u tsu shida̱ n kubuta̱.
14 M makyan ma̱ kulivi, ka̱ta̱ wovon u gbayin u ta̱wa̱,
ama kafu usana ka̱ta̱ u ɗa u kotso.
Na ɗa u kokpo ugboku wa aza a na i o kudoro tsu,
koɓolo n katsupu ka aza a na i a̱ kupura̱ ucanuku u tsu.