20
Kene ku wuya adama a Masar n Itopiya
1 A̱ ka̱ya̱ ka na Sagon mogono ma Asiriya u suki kovonshi vu gbayin, u banai a Ashidodu ɗa u shilika̱i n likuci ya ɗa wi isai i ɗa.
2 A ayin a nanlo ɗa Vuzavaguɗu u ya'in kadanshi n Ishaya maku ma Amozu. U danai ni, <<Bana vu foɗo akashi a̱ una̱mgbuka̱tsuma̱ a ikyamba i nu, n ataka a e ene a̱ nu.>> Ɗa ta na u ya'in nannai, ɗa u ka̱na̱i nwalu koshomboɗi babu kpamu ataka e ene a̱ ni.
3 Ɗa Vuzavaguɗu u danai, <<Tsu na kagbashi ka̱ va̱ Ishaya u walai koshomboɗi babu kpamu ataka e ene a̱ ni ali a̱ya̱ a tatsu, na va ɗaɗa urotu u na n kutuka̱ n kawuya wa aza a Masar n aza a Itopiya.
4 Nannai ɗa mogono ma Asiriya u kutono n agbashi a aza a Masar koɓolo n aza a̱ Kush oshomboɗi babu ataka kpamu e ene e le, nkoshi n a̱ɗa̱nga̱ni, n atagulu e le e keteshe, ɗa wo okpoi ili i wono a kubana a iɗika i Masar.
5 Aza a na a zuwai a̱ɗu e le a̱ ubuta̱ wa aza a̱ Kush ɗa a ya'in a̱ra̱ɗi a kubana wa aza a Masar, i ta̱ a kupana wovon ka̱ta̱ o okpo n wono.
6 A kanna ka nanlo uma a na i ida̱shi a̱ ka̱kina̱ ka mala i ta̱ a kudana, <Indanai ili i na i cinakai aza a na ci nekei katsura, aza a na a̱ tsu tsu suma tsu bana we le ka̱ta̱ a isa tsu e ekiye o mogono ma Asiriya. Nini ɗai tsa kuya'an ka̱ta̱ tsu uruka?> >>