22
Kene ku wuya adama a Urishelima
1 Na ɗa akaka adama a̱ ka̱ra̱'a̱ ka tsalatani.
Yiɗa̱i yi o ko'uso wu gogo na,
ali ɗa dem vu ɗa̱ i kumbai gaɗi vu kukpa̱ va asaka,
2 a̱ɗa̱ likuci i na yi tukpa n kaca'a,
likuci i na i shanai n yoroli i ma̱za̱nga̱ n a̱ra̱ɗi?
Aza a̱ ɗa̱ a na a̱ kuwa̱i ɗe va, a̱ kuwa̱ n ukpa̱ u kotokobi ba,
ko ukpa̱ wu ubuta̱ u kuvon ba.
3 Aza e kelime a̱ ɗa̱ dem a suma ta̱ ra̱ka̱,
e reme le ta̱ babu utawi.
Ra̱ka̱ vu ɗa̱ vu na a̱ ka̱na̱i a banka ɗa̱ ta̱ ugbashi,
ko a na wo okpoi a sumai ɗe da'in.
4 Adama a nannai ɗa n danai, <<Ɗenka̱i mu lo,
ka̱sukpa̱i mu n shika̱.
Ka̱ta̱ i le'eshe mu
adama a ula̱nga̱shi u na i ya'ankai uma a̱ va̱ ba.>>
5 Vuzavaguɗu, Vuzavaguɗu Mala'imili wi ta̱ n kanna
ka wuya, n kanna ka atakaci, kanna ko wovon,
a̱ Ka̱ra̱'a̱ ka Tsalatani,
kanna ka̱ ma̱shi n kaca'a
a̱ kula̱nsa̱ uɓa̱nki a kusan.
6 Aza e Elim o woki njiki koɓolo
n ekeke o odoku n akumbi e le,
ɗa aza a Kiru e remei nra̱ga̱.
7 A̱ra̱'a̱ a̱ nu a na vu la'i n kuciga dem, a shana ta̱ n ekeke o odoku,
ɗa a zuwai akumbi o odoku a shamgbai a̱ utsutsu u likuci,
8 Ka̱shile ka takpai ka̱ɓa̱nka̱tsu ka Yahuda.
A kanna ka nanlo ka'a i kula̱nsa̱
ucanuku u kuvon u na wi usokongi a kakamba,
9 ye ene ta̱ nshilya n likuci i Dawuda
m ɓatsasa ta̱ n a̱bunda̱i,
ɗa i kenuki mini
a adaɓa a ɗaka.
10 I kecei imashi ya asaka a na i a Urushelima,
ɗa i ɓosoi asaka o yoku adama a na i ma'asaka mashilya ma̱ ciya̱ mo doku utsura.
11 Ɗa kpamu i ga̱va̱i ubuta̱ u na i kukpada mini e mere ma nshilya n re
n likuci ma adama a kadaɓa ka̱ kuku,
ama i bonoko ma̱riki ma̱ ɗa̱ a kubana a̱ ubuta̱ u vuza na u ya'in mini ma,
ko kpamu i bonoko Vuza na u sheshei kuya'an ili i nampa ya n tsumani ili ba.
12 A kanna ka nanlo, ɗa Vuzavaguɗu Mala'imili dem,
u ɗekei ɗa̱ adama a na
i shika̱ n una̱mgbuka̱tsuma̱,
i gbonduwo aci a̱ ɗa̱ ka̱ta̱ i uka akashi a una̱mgbi u ka̱tsuma̱.
13 Ama la̱na̱i, ma̱za̱nga̱ mi ta̱ lo n kupana ku uyo'o,
kukiɗa ka anaka nu nlala,
kutakuma ki inyama n kuso'o ku ma̱kya̱n,
<<Ya'an ci lya'a ka̱ta̱ tsu so'o,
adama a na mkpa'a ci ta̱ a̱ kukuwa̱.>>
14 Vuzavaguɗu Mala'imili u dansa ta̱ kadanshi ka nampa a atsuvu a̱ va̱, <<Mayun unushi u nampa a kucinukpa n u ɗa ba, ali sai kanna ka na vu kuwa̱i.>> Mpa Vuzavaguɗu Mala'imili n dansa ta̱.
15 Ili i na Vuzavaguɗu Mala'imili u danai mu i ɗaɗa na,
<<Bana gogo'o vu dana kagbashi ka nampa ka
Shebuna vuza na wi a̱ kula̱na̱ kefeku ko tsugono ka.
16 Yiɗa̱i vi a kuya'an na, yayi kpamu vuza na u nekei nu katsura ka na
vu she'weke ka̱ci ka̱ nu kasaun punu na,
avu na vu ga̱va̱i kasaun ka̱ nu zuva,
ɗa vu she'wei ubuta̱ u kuvuka u nu a kakpanlai?
17 Yeve, Vuzavaguɗu u sheshe ta̱ an wa reme wu gbam-gbam,
ka̱ta̱ u vakangu wu da'in, avu vuma vu utsura.
18 Wi ta̱ a̱ kuka̱ta̱la̱ wu ka̱ta̱ u shiya wu gbam-gbam
ka̱ta̱ u taɗuku tsu kolo a kubana a iɗika i gbayin,
ta ɗe va̱ kukuwa̱
ka̱ta̱ kpamu ekeke o odoku a̱ nu a shama ɗe.
Vo okpo ta̱ ili i wono a kpa'a ku vuzagbayin vu nu.
19 Mi ta̱ a̱ kuta̱ka̱ wu a ubuta̱ wu ulinga u nu,
ka̱ta̱ m bonoko tsugbayin tsu nu a iɗika.
20 A kanna ka nanlo mi ta̱ a̱ kusuku e ɗekeke mu kagbashi ka̱ va̱ Eliyakimu kolobo ka Hilikiya.
21 Mi ta̱ a ku'uka yi motogu mu ulinga ma̱ nu ka̱ta̱ n shiya yi n kaɗambura ka̱ nu a̱ kuyun ku ni, ka̱ta̱ i neke yi tsugbayin tsu nu wa̱ ni. Wi ta̱ o kokpo esheku a aza a na i ida̱shi a Urishelima, n aza a kpa'a ku Yahuda.
22 Mi ta̱ e kuneke yi katsura ka kpa'a ku Dawuda, Ili i na baci u ɓa̱yuwa̱i babu vuza na u kuɓa̱ya̱ngu, i na kpamu u ɓa̱ya̱ngi babu ka̱ɓa̱yuwi.
23 Mi ta̱ a kukutangu yi tsu kaguta a̱ ubuta̱ wu utsura, ka̱ta̱ wo okpo kakuba ko tsugono ku ucikpi ka kpa'a ke esheku a̱ ni.
24 I ta̱ kpamu e kuneke yi tsugbayin tsu kpa'a tsu le ra̱ka̱, ka̱ta̱ kumaci ku kpa'a ku le ra̱ka̱ ku bono ku zuwaka yi a̱miki, tsu na a tsu saku ili yu ulinga, nvene, n edele a gaɗi vu kirukpa.
25 A kanna ka nanlo, Vuzavaguɗu Mala'imili u danai, kaguta ka na a̱ shikpa̱i a̱ ubuta̱ wu utsura wa, ki ta̱ o kukoɗo ka̱ta̱ ka̱ yikpa̱, ucanuku u na wi usaɓangi gaɗi vi ni u yikpa̱. Adama a na Vuzavaguɗu ɗa u danai.>>