25
Ucikpi a kubana u Vuzavaguɗu
1 Vuzavaguɗu avu ɗa Ka̱shile ka̱ va̱,
mi ta̱ e kuneke wu tsugbayin ka̱ta̱ n cikpa kula ku nu,
adama a na vi ya'an ta̱ ili i singai.
Adama a na vi ya'an ta̱ ili i mereve derere,
ili i na e sheshei ali m megeshe ɗe.
2 Vu bonoko ta̱ likuci ya kotomo ka atali,
likuci i mashilya ma gbayin kpamu yo okpoi agali,
likuci yi utsura yo omoci i buwa ba,
i ɗa yi kpamu kudoku kuma'asaka ba.
3 Adama a nannai likuci yu utsura i ta̱ e kuneke wu tsugbayin,
iɗika i na yi n asuvawuya yi ta̱ a kupana wovon u nu.
4 Avu vo okpo ta̱ ubuta̱ u kusheɗeku u vuza vu unambi,
koɓolo n vuza na wi a̱ kula̱nsa̱ uɓa̱nki, a̱ ka̱tsuma̱ ka atakaci ka̱ ni,
vo okpo ta̱ kpamu ubuta̱ u kusheɗeku a ayin a̱ mini ma̱ wunla̱i,
koɓolo n kulu a ayin a̱ usuɗukpi u kanna,
adama a na ayinviki a aza a gbani-gbani
i ta̱ tsu mini ma̱ wunla̱i ma na ma̱ tsu pura̱ mashilya,
5 tsu na usuɗukpi u ci ya'an a iɗika i magbanda.
Ama avu Vuzavaguɗu sa̱nka̱ kaca'a ko omoci,
uteku u na usuɗukpi u tsu jebe a ayin a na baci keleshu ka ya'in ka̱ta̱m,
nannai ɗa vishipa va aza a na i n asuvawuya, vo kukotso.
6 Punu a kusan ku nampa ku ɗa Vuzavaguɗu Mala'imili u kufoɓuso
ka̱ɗiva̱ ka gbayin ki ilikulya'a i na i la'i n kuga'an adama a uma ra̱ka̱,
n ka̱ɗiva̱ ki ili i kuso'o i singai kpamu n tsuwa'a tsu singai,
koɓolo n inyama i na i la'i n kuga'an feu.
7 Punu a kusan ku nampa wi ta̱ a kutakpa
ili i na yi ishi e kuneke aduniyan dem una̱mgbuka̱tsuma̱,
kapalatsu ka na ka palai aduniyan.
8 Vuzavaguɗu n ka̱ci ka̱ ni u danai, wi ta̱ a kutakpa ili i na i tsu tuka̱ n ukpa̱
Wi ta̱ kpamu a kura ma̱shi
a̱ a̱shi a uma dem,
ka̱ta̱ kpamu u takpa ili i wono u uma a̱ ni
a iɗika dem.
9 A ayin a nanlo i ta̱ a kudana,
<<Mayun na va a̱yi ɗa Ka̱shile ka̱ tsu,
ci keɗe ta̱ a̱pa̱ wa̱ ni ɗa ta na wi isai tsu.
A̱yi na ɗa Vuzavaguɗu, vu na ci keɗei a̱pa̱ a kubana wa̱ ni,
ya'an ci ya'in ma̱za̱nga̱ n kupana ku uyo'o adama a wishi u ni.>>
10 Kukiye ku Vuzavaguɗu ki ta̱ a kuvuka a kusan ku nampa.
Ama uma a Mowabu ita̱ a kutakacika ka̱u,
tsu na a tsu dasa mita̱ e kpenle an ci'iwa̱.
11 Aza a Muwabu i ta̱ e kupetikpe ekiye e le a gaɗi,
tsu na vuza vu ka̱da̱sa̱ u tsu petikpe ekiye adama a na u da̱sa̱.
Vuzavaguɗu wi ta̱ a̱ kucipa̱ka̱ a̱ra̱ɗi e le,
ko a na i n ugboji a̱ a̱shi e le.
12 Wi ta̱ a̱ kufa̱da̱ nshilya mu ugaɗi n ɗa̱ dem ka̱ta̱ u vakangu,
wi ta̱ a̱ kufa̱da̱ le ali iɗika,
wi ta̱ o kuɓoso le miri-miri
ka̱ta̱ u bonoko le kubuta̱.