28
Ili ya atakaci a kubana wa aza a Ifirayimu
1 Ili ya atakaci i ɗa i na yi lo a kuvana likuci ya̱ a̱ra̱ɗi i Samariya,
ubuta̱ u na wo okpoi oroliko o oso'i a aza israila,
i ɗa yi ta̱ ida̱shi gaɗi vi ɗika i ka̱ra̱'a̱ ka̱ tsuta̱, ama tsuloboi ci ni ci ta̱ o kuɗoɗo tsa̱ a̱pa̱lu.
Likuci i ɗaɗa a̱ra̱ɗi a uma a na a̱ yikpa̱i adama a̱ ma̱ra̱.
2 La̱na̱, Vuzavaguɗu wi ta̱ n kagbashi ka na ki n ikyamba koɓolo n utsura.
Wi ta̱ tsu mini ma atali n tsu wunla̱i u koli a̱ kutsuwa̱n a iɗika ka̱ta̱ ma aya,
wi ta̱ a̱ kutsuwa̱n ma'a n utsura a iɗika.
3 Oroliko a̱ a̱ra̱ɗi o oso'i a Ifirayimu,
i ta̱ a kuya'an ukpeti n ene.
4 A̱pa̱lu a na o tsu ɗoɗo va, a na i tsuloboi tsu tsugbayin ci ni,
uzuwi a̱ ida̱shi a̱ ka̱ra̱'a̱ ka̱ tsuta̱,
i ta̱ o kokpo tsu umaci u ga̱ba̱ u na u ge'wei u maɗanga ma zaitu kafu ayin a vikya'a a yawa.
Ɗa baci vuza we enei ali ɗa u taɓai n kukiye ku ni,
wi ta̱ o kusoɗongu.
5 A kanna ka nanlo Vuzavaguɗu Mala'imili
wi ta̱ o kokpo tso oroli a tsugbayin,
ka̱ta̱ kpamu wo okpo ili i ma̱za̱nga̱ n a̱ra̱ɗi
a kubana u uma a na a buwai n wuma.
6 Wi ta̱ o kokpo ayinviki a̱ usuɓi
a kubana u vuza na u ci ya'an afada,
ka̱ta̱ kpamu wo okpo ka̱ɓa̱nki
wo ovonshi a na a tsu shamgba a̱ utsutsu.
7 Ele nampa kpamu a̱ ga̱la̱i m ma̱ra̱
ɗa a jarai n washi,
anan ganu n eneki feu o so'i
ɗa aci e le a̱ ripula̱i adama a̱ ma̱ra̱,
a jarai m ma̱ra̱,
e ce ene mayin ba, a ayin a na i a kuya'an kene ku tsa alatani,
ka̱ta̱ a̱ shiliku ili a ayin a na i e kuneke odoki.
8 Irikpa e le dem a̱ sumba̱ ta̱ n ashama,
babu ubuta̱ u gbani.
9 <<Yayi tamkpamu u kuya'anka kuyotsongu?
Yayi kpamu u kudana akaka a?
U muku n na a kasai ɗe mani,
ko aza a na a kasai mani gogo'o.
10 Ili i na ci a kupana,
utonu u gbani u ɗa koci,
i ɗa yi ta̱ kakariki-kakariki,
na kenu na ɗe kenu.>>
11 Yi baci a kupanaka mu ba,
Vuzavaguɗu wi ta̱ a kuya'an kadanshi n a̱ɗa̱ n kelentsu ka na atsuvu a̱ ɗa̱ a kiwanai kupana ba, n kelentsu ka na kpamu ki ka̱ ɗa̱ ba.
12 U danai le tsu nampa,
<<Nava ɗaɗa ubuta̱ u kuvuka, ya'an aza a na i n wo'wi a uvuka na.>>
Nava ɗaɗa kpamu, ubuta̱ u kuvuka u ka̱bini.
Ama ali n gogo na a pana ba.
13 Adama a nannai kadanshi ka Vuzavaguɗu,
ki ta̱ o kokpo le tsu utonu,
kakariki-kakariki,
na kenu na ɗe kenu.
Nannai ɗa i kubana kelime ka̱ta̱ i bono i yikpa̱ n kucina̱,
yi ta̱ a ku'uka muna, ka̱ta̱ a̱ ka̱na̱ ɗa̱ a banka ugbashi.
14 Adama a nannai panai kadanshi ka Vuzavaguɗu, a̱ɗa̱ aza a ulami
a na a lya'akai uma a nampa tsugono tsu Urushelima.
15 I lapa ta̱ ma̱ka̱nga̱ i danai, <<Ci ya'an ta̱ ɗe uzuwakpani n ukpa̱,
ci ya'an ta̱ uzuwakpani n ubuta̱ wu ukpisa̱.
Muna ma gbani-gbani ma na mi lo a̱ kuta̱wa̱ ma yawa baci,
ma kusa'wa tsu ba,
adama a na tsu bonoko ta̱ a'uwa ubuta̱ u kusheɗeku,
modoruko kpamu mo okpoi ubuta̱ u kuvuka u tsu.>>
16 Nava ɗaɗa ili i na Vuzavaguɗu Uba̱nga̱ri u danai,
<<Indana, n shikpa̱ ta̱ ɗe katali a Sihiyona,
ka na ka̱ ciya̱i ɗe ukondi,
katali ka singai ke kenene ko mogon adama a kuvaraka kuma'a babu munla̱i,
<Vuza na baci u zuwakai ɗe katsura wa̱ kuyikpa̱ ba.>
17 Mi ta̱ o kubonoko afada a singai okpo kagisamkpatsu ka kuma'a,
usuɓi tamkpamu wo okpo tsu kagisamkpatsu ka,
minimatali mi ta̱ o kuɓoso ubuta̱ u kusheɗeku wa a'uwa u ɗa̱,
ka̱ta̱ mini ma aya ma lya'a ubuta̱ u kuvuka u ɗa̱.
18 Uzuwakpani u na vi ya'in adama a na vu doro ukpa̱ wi ta̱ a kuya'an utakpi,
uzuwakpani u na vi ya'in kpamu adama a na vu were ubuta̱ wu ukpisa̱ wi ta̱ feu a kuya'an utakpi.
Makyan ma na baci vurala vu gbani-gbani vu walai,
vi ta̱ a kuɓasangu a iɗika.
19 Ayin tutu mini ma na ma tsu aya nanlo mi ta̱ a kulaza n avu,
usana lakam kanna n kayin,
sai ayin a na ma̱ pura̱i nu.>>
Kuyeve ku ukuna wa akaka a nampa
i ta̱ e kuneke uma a̱ nu wovon.
20 Iva'antsu i nu i la'a ta̱ kenu an vuza wa̱ ba̱rukpa̱ ɗe,
ipalatsu i nu feu i la'a ta̱ kenu an ya pala ikyamba ra̱ka̱.
21 Adama a na Vuzavaguɗu wi ta̱ a̱ kuɗa̱nga̱ tsu na u ya'in a Kusan ku Perazimu,
ka̱ta̱ u ɗengusa̱ kpamu ka̱ci ka̱ ni tsu na u ya'in a̱ ka̱ra̱'a̱ ka̱ Gibiyon
adama a na u ya'an ulinga u savu,
u ya'an ulinga u na u kiwanai kuya'an ba,
22 Gogo na ka̱sukpa̱ tsugoyi tsu nu,
ta baci nannai ba atakaci a̱ ɗa̱ i ta̱ a kulasuka kuyimkpa,
adama a na m pana ta̱ wila̱ adama a̱ kula̱nga̱su u na Ka̱shile Vuzavaguɗu vo osoji a gaɗi
u kuya'anka uma a aduniyan dem.
23 Zuwai atsuvu ka̱ta̱ i pana ka̱la̱ka̱tsu ka̱ va̱,
shamgbai shiriri ka̱ta̱ i pana ili i na n kudana.
24 Kacimbi ka tsu nima ta̱ kashina ka̱ ni ka̱ta̱ u kpa̱ɗa̱ kuka̱sukpa̱ bi'i adama a na u ca̱'a̱?
Ko ta u tsu ka̱na̱ kunima iɗika nannai koci?
25 Ɗa baci u kotsoi kunima kashina ka̱ ni ra̱ka̱,
u tsu la̱nsa̱ icu'u, ka̱ta̱ u ca̱'a̱ ilya ba?
Ka̱ta̱ u ca̱'a̱ punu ya̱nji m masala ma̱ ni ba?
Itabi feu m masala ma̱ ni
ka̱ta̱ u kara ugboku u ni ba?
26 Kacimbi ka ke yeve ta̱ ili i na u kuya'an,
adama a na Vuzavaguɗu u tsu neke yi ta̱ kuyeve.
27 A tsu lapa igeɓetsu n kalangu ka kulapu ba,
ama a tsu lapa ta̱ i ɗa n kalangu ke kenu,
keke vo odoku vu kulapu va kulapa igeɓetsu ba,
ama i ta̱ a kufaba i ɗa m macaka kenke'en.
28 Mayun ɗa a iya ili i na yi n icu'u adama o boroji,
ama a kulya'a kelime n kulapa i ɗa n kalangu ali a kubana ba.
Wi ta̱ a kufuɗa kutuka̱ n keke vo odoku vi ni lo,
ama odoku a̱ ni a kugasa n keke va punu ba.
29 Ukuna u nampa ra̱ka̱ wu uta̱ ta̱ a̱ ubuta̱ u Vuzavaguɗu Mala'imili,
vuza na wi n odoki a singai, koɓolo n kuyeve ku utsura.