32
Tsugono tsu usuɓi
1 La̱na̱, mogono mi ta̱ a kulya'a tsugono tsu usuɓi,
ka̱ta̱ ngono n lya'a tsugono n kasingai.
2 Yaba dem wi ta̱ o kokpo tsu ubuta̱ u kusheɗeku adama a̱ wunla̱i wu utsura,
n ubuta̱ u kusheɗeku adama a̱ mini ma atali ma munuka,
uteku ci nyeneke m mini n na n ɗekpei a kakamba,
an kulu ku kakpanlai ka gbayin a iɗika i ɗekpu.
3 Ka̱ta̱ a̱shi a aza a na i e kene a̱ kpa̱ɗa̱ kuyumba̱tsa̱sa̱ka̱,
ka̱ta̱ kpamu atsuvu a za na i a kupana, a pana.
4 Vuza na wi n uremi u ka̱ɗu ba, wi ta̱ a̱ kuciya̱ kuyeve ka̱ta̱ u fuɗa,
ka̱ta̱ kelentsu ka vuza vu cikeku ka fuɗa ka dansa mayin.
5 A buwa e kuɗeke kalau vuza vu ma̱riki ba,
ko e ɗeke vuza vu kalya'a vuma vu gbayin.
6 Adama a na kalau ka ci ya'an ta̱ kadanshi ka tsulau,
ka̱ɗu ka̱ ni kpamu ki ta̱ ushani tukpa n kawuya,
u ci yongo ta̱ a kuya'ansa ili i na yi i Ka̱shile ba,
ka̱ta̱ u ka̱na̱ kuripula̱sa̱ uma adama a Vuzavaguɗu,
aza a kambulu u ka̱sukpa̱ le lekeɗi,
ka̱ta̱ aza a kakuli u ka̱sukpa̱ le n kakuli ke le.
7 Ama vuza vu kalya'a, uteku u na u ci ya'an ili i ni wi ta̱ tukpa n kawuya,
u ci ya'an ta̱ kusheshe ku wuya
adama a na u doro aza a unambi n kadanshi ka a'uwa,
ko ufolu u le u singai u ɗa baci.
8 Ama vuma vu ma̱riki, u ci ya'an ta̱ kusheshe ku singai,
n kusheshe ku singai ku ɗa kpamu u tsu shamgba.
A̱ma̱ci a Urushelima
9 Ɗenga̱i, a̱ɗa̱ a̱ma̱ci a na yi ida̱shi i ka̱ci ka̱ ɗa̱,
panai ka̱la̱ka̱tsu ka̱ va̱,
a̱ɗa̱ nkere n na yi ida̱shi i ba̱ri,
ka̱ta̱ i zuwaka mu atsuvu i pana kadanshi ka̱ va̱.
10 An ka̱ya̱ ka lazai,
a̱ɗa̱ a̱ma̱ci a na yi ida̱shi i ba̱ri yi ta̱ e kuje'eke ikyamba,
kutaɓa umaci wi itacishi u kusuɓa̱ ba,
ka̱ta̱ kpamu i namba nɗanga n kutaɓa.
11 Je'ekei ikyamba, a̱ɗa̱ a̱ma̱ci a na yi ida̱shi i ka̱ci ka̱ ɗa̱,
je'ekei avangatsu, a̱ɗa̱ a̱ma̱ci a na yi ida̱shi i ba̱ri.
Foɗosoi aminya a̱ ɗa̱,
i shiya akashi a̱ a̱kyu'un a̱ ɗa̱.
12 Na̱mgba̱i a̱tsuma̱ adama a na a̱ la̱nga̱sa̱ ta̱ ashina a̱ ɗa̱ koɓolo ashina a itacishi a̱ ɗa̱,
13 adama a na iɗika i uma a̱ va̱ i matsa ta̱ awana n kerepu,
na̱mgba̱i a̱tsuma̱ adama a na a̱ la̱nga̱sa̱ ta̱ i'uwa i ma̱za̱nga̱ i ɗa̱.
14 Adama a na i ta̱ a̱ kuka̱sukpa̱ kefeku ko mogono ka,
likuci i na yi tukpa n uma yo okpo ta̱ agali,
kaginda koɓolo n ubuta̱ u kindi wi ta̱ o kokpo ubuta̱ u ka̱rikpa̱ni ko wannai,
ka̱ta̱ wo okpo ubuta̱ u ma̱za̱nga̱ wu njaki n kakamba n ilikuzuwa adama a kalina ka na a kuya'an punu,
15 ali sai ayin a na a̱ su'uki tsu ayinviki na ɗe gaɗi,
ka̱ta̱ kakamba kokpo iɗika i tsuta̱,
ka̱ta̱ iɗika i tsuta̱ ya i matsa umaci n a̱bunda̱i.
16 A ayin a nanlo a ɗa a kuya'an ka mayun ɗe a kakamba ka,
ka̱ta̱ a ya'an feu ku usuɓi a iɗika i tsuta̱.
17 Uga'in u kuya'an ki ili yu usuɓi wi ta̱ o kokpo ma̱ta̱na̱,
ka̱ta̱ kpamu usuɓi u tuka̱ n ida̱shi i ma̱ta̱na̱ i babu uteku n windi mayin.
18 Uma a̱ va̱ i ta̱ o kuyongo a̱ ubuta̱ wi ida̱shi i ma̱ta̱na̱,
asuvu a i'uwa i na yi babu kadama,
n ubuta̱ u na wi n ka̱bini n windanai mayin.
19 Ko mini ma atali ma varukusu baci nɗanga n kakamba,
ɗa likuci i ɓosoi ra̱ka̱-ra̱ka̱,
20 una̱singai u ɗa a kubana wa̱ ɗa̱,
a̱ɗa̱ na yi a kuya'an vica̱'a̱ vi icu'u i ɗa̱ ɗevu n kuyene,
ɗa kpamu i ka̱sukpa̱i anaka ni njaki n ɗa̱ a kulina ba̱ri.