33
Kavasa ku uɓa̱nki
1 Ili ya atakaci i ɗa a kubana wa̱ nu, avu na vu tsu una uma,
avu na ka̱ta̱ a unai ba.
Ili ya atakaci a kubana wa̱ nu, avu vuza modoruko,
avu na ka̱ta̱ a sa'wai kudoro ba.
Ayin a na baci vu ka̱sukpa̱i kula̱nga̱sa̱ uma,
i ta̱ a̱ kula̱nga̱sa̱ wu,
vu ka̱sukpa̱ baci kpamu kudoro uma,
ka̱ta̱ feu o doro wu.
2 Vuzavaguɗu, pana asuvayali a̱ tsu,
ci neke ta̱ a̱ɗu a̱ tsu wa̱ nu.
Okpo katsura ka̱ tsu ayin dem,
ka̱ta̱ visa tsu ayin a na baci atakaci a̱ ta̱wa̱i.
3 N usari u ka̱la̱ka̱tsu ka gbayin ka̱ nu, ɗa uma a sumai,
ayin na baci kpamu vu ɗa̱nga̱i kashani, ka̱ta̱ aduniyan u wacuwa,
4 Uma o ɓolongi ucanuku u kuvon, uteku tsu na nta̱ɗa̱ma̱ci n tsu ɓolongu ka̱ta̱ kpamu akyu'un a pala kashina, ta uma a a̱ kukpa̱nta̱ ili ya nannai.
5 Vuzavaguɗu vuzagbayin ɗa, wi ta̱ ida̱shi ɗe gaɗi,
wi ta̱ a kushatangu Sihiyona n kasingai koɓolo n ka mayun,
6 a̱yi ɗa u kokpo kumi'i ku nu a ayin a nanlo,
n wishi wa̱ a̱bunda̱i, n kuyeve n ugboji.
Kupana ku wovon ku Vuzavaguɗu ku ɗaɗa uciyi u nu.
7 La̱na̱, osoji a utsura a̱ ma̱shi a uye,
aza a usuki a̱ ma̱ta̱na̱ a̱ ma̱shi wuya-wuya.
8 Uye u gbagba'in u na̱mgba̱ ta̱,
aza a nwalu o doku o tono u ɗa ba.
Ɗa uzuwakpani u ya'in ukoɗi,
ɗa likuci kakau i ya'in ugoyi,
vuma u doku u ciya̱ ucikpi kpamu ba.
9 Ɗa iɗika i na̱mgba̱i ka̱tsuma̱ ɗa i lumbai,
ɗa nɗanga n Lebano n yambai ɗa n lumbai,
Ka̱ra̱'a̱ ka Sharon ke ɗekpe ta̱, ɗa wo okpoi tsu kakamba,
ɗa Bashan koɓolo n Kamelu a̱ sa̱ruwa̱i a̱vuku e le.
10 Vuzavaguɗu u danai, <<Gogo na mi ta̱ a̱ kuɗa̱nga̱,>>
ka̱ta̱ kpamu a cikpa mu,
<<Gogo na mi ta̱ e kuneke ka̱ci ka̱ va̱ tsugbayin.
11 I na yi a kuya'ansa yi ta̱ tsu kopo
i bonoi i matsai ci'iwa̱,
ayinviki a̱ ɗa̱ i ta̱ tsa akina a na e kuleɓece ɗa̱.
12 Uma a̱ nu i ta̱ a̱ kukula̱ gbende-gbende,
tsu awana a kakamba a na a kapai ɗa o songi n akina.>>
13 A̱ɗa̱ na yi da'angi, panai i na n ya'in,
a̱ɗa̱ na yi ɗevu, yevei utsura u va̱.
14 Aza a̱ unushi a Sihiyona a pana ta̱ wovon,
aza a na e yevei Ka̱shile ba, e je'eke ta̱ ikyamba, ɗa a danai,
<<Yayi a̱ ka̱tsuma̱ ka̱ tsu u kufuɗa kuda̱sa̱ngu n akina o mosonku?
Yayi kpamu a̱ ka̱tsuma̱ ka̱ tsu u kufuɗa kuyongo n akina a na i a̱ kukula̱ babu uteku?>>
15 Vuza na wi a kuya'an nwalu mu usuɓi
ɗa kpamu wi a kuya'an kadanshi ki ili i na i ga'in,
ɗa u iwain kuɗika i na i uwai ni n uye u kalya'a,
a̱yi na u iwain kupanaka aza a na e ci sheshe ukuna u munuka,
a̱yi na u tsu yimba̱tsa̱ka̱ a̱shi a̱ ni adama a na u kpa̱ɗa̱ kinda ukuna u wuya,
16 wi ta̱ o kuyongo gaɗi,
ubuta̱ u kusheɗeku u ni wi ta̱ kokpo ubuta̱ wu nsasan m gbagba'in.
Ka̱ta̱ e neke yi ilikulya,
wi a kunamba kpamu mini mo kuso'o ba.
17 Vi ta̱ e kene mogono n uga'in u ni,
ka̱ta̱ ve ene kpamu i ɗika i na yi n ka̱ba̱nga̱ n a̱bunda̱i ali a kubana da'angi.
18 N ka̱ɗu ka̱ nu vi ta̱ a kuciɓa n i na i sa'wai kuzuwa wu wovon, ka̱ta̱ vu dana
<<Te ɗai bi'i, vuza vu mekecu va,
Te ɗai kishi ku utafu ka?
Te ɗai kpamu kekeci ki imashi ka?>>
19 Yi o kudoku kene uma a ugbamukaci kpamu ba,
aza na kadanshi ke le ki n atakaci a̱ kuyeve,
i a kadanshi n cikeku tsu na ya kufuɗa kuyeve ba.
20 La̱na̱ Sihiyona, likuci i na a̱ tsu ci ya'ansa ka̱ɗiva̱ ka̱ tsu.
A̱shi a̱ nu i ta̱ e kene Urishelima,
likuci yi ida̱shi i ma̱ta̱na̱, wi ta̱ o kokpo tsu ka̱pa̱m ka na ki kushewerengu ba,
aguta a ni kpamu i kumuɗa̱ ba,
babu kawin kete ka̱ ni ka na ki a kukasa.
21 Ta ɗe Vuzavaguɗu n utsura u ni wi adama a̱ tsu,
Tsu ubuta̱ u na wi n kuyene n adaɓa i,
gaɗi vi le antsu o kuvon a kubana ɗe ba,
babu kpamu antsu a gbagba'in.
22 Adama a na Vuzavaguɗu ɗa kaya'in ka afada ka̱ tsu,
Vuzavaguɗu ɗa keneki ka̱ wila̱ ka̱ tsu,
a̱yi ɗa kpamu mogono ma̱ tsu,
wi ta̱ a kisa tsu.
23 Ashiyatsu a usaki a a̱ ba̱ɗa̱ ta̱,
o doku reme kalangu ka
kakashi ka tsu na kpantsu ka kuwala mayin ba.
Ka̱ta̱ a ayin a nanlo a i peceshe ucanuku wa̱ a̱bunda̱i u na a̱ pura̱i va,
ali nkutu feu n raliwa tsu na a cigai.
24 Babu vuza na wi ida̱shi a Sihiyona u kudana, <<Mpa mi gbaga ba>>
I ta̱ a kucinukpaka aza a na i ida̱shi ɗe unushi u le.