34
Afada adama a uma aduniyan
1 Ta̱wa̱i ɗevu, a̱ɗa̱ iɗika i limoci ya aduniyan ka̱ta̱ i pana,
bonokoi asuvu a̱ ɗa̱ ubuta̱ u te a̱ɗa̱ uma.
Ya'an iɗika n i na yi punu dem i pana,
ka̱sukpa̱ aduniyan n i na i tsu uta̱ punu dem i yeve.
2 Adama a na Vuzavaguɗu wi ta̱ a wupa n aduniyan ra̱ka̱,
wupa wu usuɗukpi ka̱ɗu u ni, wi ta̱ a̱ ubuta̱ wi irala i le ra̱ka̱.
Wi ta̱ a kuna le ra̱ka̱,
wi ta̱ kpamu a̱ kuka̱sukpa̱ a kiɗa le.
3 Even a ikyamba e le a̱ kuciya̱ uciɗa̱ngi ba,
ka̱ta̱ ushami we even a ikyamba i le a̱ ka̱ra̱'a̱ iɗika,
ka̱ta̱ nsansa n yene nu mpasa n le.
4 Ka̱ta̱ kpamu ili i kutashi i gaɗi ra̱ka̱ a̱ ni'wa̱n,
Gaɗi wi ta̱ a̱ ka̱ta̱la̱ tsu kajiba,
ka̱ta̱ azangata o ɗoɗo a iɗika
tsa̱ a̱vuku a itacishi a na a lumbai,
ko uteku tsu na umaci u ma̱biri u na u ɗekpei.
5 Ayin a na baci kotokobi ka̱ va̱ ko kotsoi ulinga u ni na ɗe gaɗi,
la̱na̱, ka ki ta̱ a̱ kucipa̱ adama a afada a aza e Edom,
a̱ ubuta̱ u uma a na n sheshei kuna.
6 Kotokobi ka Vuzavaguɗu ka̱ sumba̱ ta̱ nu mpasa,
ki ta̱ upali nu ushuma
koɓolo nu mpasa mu nlala nu nga̱ji,
ushuma u muku n ka̱tsuma̱ ma̱ a̱giri.
Adama a na Vuzavaguɗu wi ta̱ n alyuka a Boza,
koɓolo m makiɗaka ma̱ a̱bunda̱i wa aza a Edom.
7 Uma i ta̱ a̱ kukuwa̱ tsu njuma,
koɓolo n a̱ɗa̱nga̱ni n aza a utsura feu.
Iɗika yi ta̱ o kuso'o mpasa,
ka̱ta̱ kayala ka̱ cuwa̱ n ushuma.
8 Adama a na Vuzavaguɗu wi ta̱ n kanna ka kutsupa,
ka̱ya̱'a̱ ka kutsupa i na a ya'ankai Sihiyona.
9 Ka̱ta̱ nyeneke n Edom m bono mani'in ma na a tsu sura a uye,
kayala ka̱ ni ko bono tsa akina a̱ ka̱nga̱ ko tsukono,
ka̱ta̱ iɗika i ni kpamu i kula̱ tsa akina a na i a kulala ka̱u.
10 Kanna n kayin dem a̱ kukima̱ a ɗa ba,
ka̱nga̱ ka ni ki ta̱ a̱ kuɗa̱nga̱ babu kuzuwa uteku.
Ali n tsukaya n tsukaya, u ɗa wi ta̱ o kokpo ukuna u gbani,
babu vuza na u kudoku wo tono u ɗa.
11 Ma̱kpa̱tuwa̱n n kagawun i ta̱ o kuyongo punu a̱ ubuta̱ wa,
ka̱ta̱ a ya'an ɗe cikinda.
Adama a na Ka̱shile ki ta̱ a kugisangu iɗika i nanlo ya n cico'o,
wi ta̱ a kugisangu i ɗa adama a na u tuka̱ n kawuya
koɓolo m munuka.
12 Babu tsugbayin tsu na tsa kubuwa tsu na tsa kuzagba tsugono,
muku mu ngono ra̱ka̱ mi ta̱ a̱ kuni'wa̱n.
13 Awana i ta̱ o kugbonguro ka̱ta̱ a lya'a i'uwa yi utsura i le,
awanagbede i ta̱ a̱ kuta̱ a isa kefeku ko ngono koɓolo n likuci i na yi ni nshilya.
I ɗa yi ta̱ o kokpo ubuta̱ u kuyongo wi nshe'e n kakamba,
n i'uwa yi mkpa̱tuwa̱n.
14 Ka̱ta̱ nnama n kamba n gasa n a̱kunzu,
ka̱ta̱ nre'e n shika̱ka̱ itoku i le,
mayu, ta ɗe ili i kayin i kuyongo,
ka̱ta̱ a̱ la̱nsa̱ka̱ ka̱ci ke le ubuta̱ u kuvuka.
15 Ta ɗe ma̱kpa̱tuwa̱ ma kuya'an cikinda ka̱ta̱ a zuwa okowo,
ka̱ta̱ u gya'wan, ka̱ta̱ u ɓolongu muku ni a asuvu e evelyu a̱ ni,
mayun ta ɗe kpamu asakali o kuyongo,
vuza n vuka vi ni.
16 La̱na̱ ka̱ta̱ vi kece a katagarda ka Vuzavaguɗu.
Babu ili i te punu a katagarda ka i na i kupuwa̱nka̱,
babu vuza na u kunamba vuza ni.
Adama a na n una̱ u ni u ɗa Vuzavaguɗu u ya'in kadanshi ka,
ayinviki a̱ ni i ta̱ o kuɓolongu le a̱ ubuta̱ u te.
17 U zagbaka le ta̱ ubuta̱ u na yaba dem u kuyongo,
n ekiye a̱ ni ɗa u pecekei le n kagisamkpatsu,
i ta̱ a̱ kuka̱na̱ i ɗa ali sai uteku n uteku
ta ɗe o kuyongoso ali n tsukaya n tsukaya.