35
Ma̱za̱nga̱ ma vuza na a̱ Shiba̱i
1 Meremune n agbata i ta̱ a kuya'an ma̱za̱nga̱,
kakamba ki ta̱ a kuya'an ma̱za̱nga̱ ka̱ta̱ ka ya'an a̱pa̱lu
tsa apulufa,
2 wi ta̱ a̱ kuba̱za̱lukpa̱ a̱pa̱lu n a̱bunda̱i
ka̱ta̱ u ya'an ma̱za̱nga̱ m ma̱ta̱na̱ n ishipa.
I ta̱ e kuneke yi tsugbayin tsu Lebano,
uteku tsugbayin tsu kusan ku Kamelu n ka̱ra̱'a̱ ka Sharon.
I ta̱ e kene tsugbayin tsu Vuzavaguɗu Ka̱shile ka̱ tsu,
tsugono tsu Ka̱shile ka̱ tsu.
3 Ɓa̱nka̱i aza a na o'oi,
ka̱ta̱ i ɓa̱nka̱ aza a na a buwai n utsura ba.
4 Danai aza na i n a̱ɗu o wovon,
<<Gbamai asuvu, ka̱ta̱ i pana wovon ba,
Ka̱shile ka̱ ɗa̱ ki ta̱ a̱ kuta̱wa̱,
wi ta̱ a̱ kuta̱wa̱ n katsupu,
ka̱ta̱ wi isa ɗa̱.>>
5 Ka̱ta̱ a̱shi a̱ a̱yimba̱ a̱ ɓa̱yuwa̱,
ka̱ta̱ atsuvu a kagulani kpamu a pana,
6 ka̱ta̱ nkutsuma̱ n taɗukpa tsu nre'e,
ka̱ta̱ kelentsu ke kebebe ko orukpo adama a̱ ma̱za̱nga̱.
Ka̱ta̱ mini mu uta̱ e meremune,
n nyeneke n yene a kakamba.
7 Iɗika yu usuɗukpi yi ta̱ o kokpo kadaɓa ka̱ mini,
ka̱ta̱ iɗika i ɗekpu i yene mini.
Ka̱ta̱ ubuta̱ u na nshe'e n kakamba mi ishi n ci yongo, u shana m mita̱,
n ikiku koɓolo n abatamini i ta̱ o kugbonguro.
8 Uye u gbayin u kuya'an ta̱ ɗe,
i ta̱ e kuɗeke u ɗa uye u ciɗa,
aza a unata a kuwala punu ba.
U ɗa wi ta̱ o kokpo uye wa aza a na i o kutono uye u Ka̱shile,
ko alau o kutono u ɗa ba.
9 Babu kawu vu na u kuyongo ɗe,
babu kpamu nnama m gbani-gbani n na n kutono ɗe,
e kene le ɗe ba,
ama aza a na Vuzavaguɗu wi isai koci ele ɗa o kutono uye wa,
10 ka̱ta̱ aza na Vuzavaguɗu u Shiba̱i o bono,
ka̱ta̱ a uwa Sihiyona n ishipa,
ka̱ta̱ ma̱za̱nga̱ ma babu uteku mo yongo n ele,
ka̱ta̱ a̱ ciya̱ ma̱za̱nga̱ m ma̱ta̱na̱,
ka̱ta̱ una̱mgbuka̱tsuma̱ n atakaci o kotso.