37
Hezikaya u la̱nsa̱i uɓa̱nki u Vuzavaguɗu.
1 Ana Mogono Hezikaya u panai kadanshi ka aza gbagba'in a̱ ni, ɗa ta na u karai ntogu n ni adama a una̱mgbi u ka̱tsuma̱, ɗa u ukai akashi a una̱mgbi u ka̱tsuma̱, ɗa u lazai a kubana a̱ ma̱va̱li ma Vuzavaguɗu.
2 Ɗa u suki Eliyakimu vuza gbayin vu kefeku ko mogono, koɓolo n Shebuna kaɗani, n ganu vu gbagba'in, ra̱ka̱ vi le ta na i ta̱ u uki nu ntogu mu una̱mgbi u ka̱tsuma̱, ɗa a lazai a kubana u keneki Ishaya maku ma Amozu.
3 Ɗa a danai ni, <<Ili i na mogono Hezikaya u dansai i ɗa na. Anana kanna ku una̱mgbuka̱tsuma̱ ka'a, koɓolo n kanna ka mashikaka n kugoyi. Wi ta̱ kpamu tsu na ka̱tsuma̱ ka na ka yawai kumatsa, ama i n utsura u na a kumatsa muku ma ba.
4 U ga'an ba Vuzavaguɗu Ka̱shile ka̱ ɗa̱ ki ta̱ a kupana kadanshi ka vuza vu kelime vo osoji a Asiriya va, vuza na vuzagbayin mogono ma Asiriya u suki u goyo Ka̱shile ka wuma, ka̱ta̱ u ɓarangu yi adama a kadanshi ka na Vuzavaguɗu Ka̱shile ka̱ ɗa̱ ka panai. Adama a nannai vasa adama a uma a na a buwai n wuma.>>
5 Ana agbashi o mogono Hezikaya a̱ ta̱wa̱i wi Ishaya, ɗa a danai ni ili na Mogono ma danai,
6 ɗa Ishaya u danai le, <<Danai vuzagbayin vu ɗa̱, <Ili i na Vuzavaguɗu u dansai i ɗa na. Ka̱ta̱ i pana wovon u kadanshi ka̱ a̱ra̱ɗi ka na agbashi o mogono ma Asiriya a ya'ankai mu ba.
7 Panai, mi ta̱ a kuzuwa ili i yoku a̱ ka̱ɗu ka̱ ni, adama a na u pana baci ili i na akaka a a danai, wi ta̱ o kubono a iɗika i ni, ta ɗe n kuzuwa a una yi n kotokobi.> >>
8 Ana vuza kelime vo osoji a Asiriya u panai a na mogono ma̱ ni ma̱ ka̱sukpa̱i likuci i Lakishi, ɗa u banai kushilika̱ n aza a Libina. Ɗa feu u lazai a kubana ɗe.
9 Gogo na Senekeribu u pana ta̱ akaka a na Tirihaka mogono mi Itopiya wu uta̱ ta̱ adama a na u shilika̱ n a̱yi. Ɗa u suki alingata a kubana u Hezikaya, a danai,
10 <<Danai Hezikaya mogono ma Yahuda, ka̱ta̱ vu ushuku n Ka̱shile ka̱ nu ka na ka ko doroi nu ɗa ka danai, we e kuneke Urushelima e ekiye o mogono ma Asiriya ba.>
11 Mayun vu pana ta̱ tsu na mogono ma Asiriya ma ya'in n iɗika kakau, wu unai le gbende-gbende. Avu vi ta̱ a kula'aka?
12 Ikaya i va̱ i la̱nga̱sa̱i ta̱ Likuci i Gozan n Haran, n Rezefa, koɓolo n aza a Adini a na i Telasaru a̱ma̱li a iɗika i nanlo ya a fuɗa yi isai le ba
13 Te ɗai mogono ma Hamata m mogono ma Arpada i anana? Te ɗai kpamu mogono ma̱ likuci i Sefarwayim, m mogono ma Hena, m mogono ma Iwa i gogo na?>>
Hezikaya u ya'in kavasa
14 Ɗa Hezikaya wi isai akaka a katagarda a e ekiye alingata a, ɗa u kecei. Ɗa u banai a̱ ma̱va̱li ma Vuzavaguɗu, ɗa ta na u ɓa̱yuwa̱i akaka a katagarda e kelime ka Vuzavaguɗu.
15 Ɗa Hezikaya u ya'in kavasa a kubana u Vuzavaguɗu.
16 <<Vuzavaguɗu Mala'imili, Ka̱shile ki Isaraila, avu na vi ida̱shi e mere ma Corobin, avu ɗa Ka̱shile ende'en o tsugono ra̱ka̱ tsa aduniyan. Vi ya'an ta̱ gaɗi n iɗika.
17 Vuzavaguɗu, zuwaka mu atsuvu a̱ nu, ka̱ta̱ vu panaka mu avasa a̱ va̱, ɓa̱yuwa̱ a̱shi a̱ nu Vuzavaguɗu ka̱ta̱ ve ene, inda kadanshi ki ishikushi ka na mogono Sanakaribu u suki a ya'anka Ka̱shile ka wuma.
18 <<Mayun ɗa, Vuzavaguɗu, ngono ma aza Asiriya a una ta̱ uma a ra̱ka̱ n iɗika i le dem.
19 Ɗa a variki a̱ma̱li e le a asuvu a kina ɗa o songi a ɗa, adama a na ele a̱ma̱li a mayun a ɗa ba, nɗanga n ɗa n atali koci, a na vuma u ya'in n ekiye a̱ ni.
20 Gogo na, Vuzavaguɗu Ka̱shile ka̱ tsu, isa tsu e ekiye a̱ ni, adama a na tsugono ra̱ka̱ tsa aduniyan ci yeve a na avu ɗa Vuzavaguɗu ende'en.>>
Sanakaribu u yikpa̱i
(2 Ng 19:20-34)
21 Ɗaɗa Ishaya maku ma Amozu u suki n akaka a kubana u Hezikaya, u danai, <<Na ɗa i na Vuzavaguɗu Ka̱shile ki Isaraila, ka danai. Adama a na vi ya'an ta̱ kavasa a̱ kuta̱wa̱ wa̱ va̱, adama a Sanakaribu mogono ma Asiriya,
22 na ɗa kadanshi ka na Vuzavaguɗu u ya'in adama a̱ ni,
<<Sihiyona wi tsu mekere ma na ka̱ta̱ me yevei vali ba,
u goyo wu ta̱ ɗa u ya'ankai nu ma̱ka̱n.
Mekere ma Urishelima
u ya'anka wu ta̱ iberetei a̱ kucina̱ ku nu.
23 Yayi vi shikai ɗa kpamu vi ya'ankai kadanshi ki ishikushi?
Yayi vu ɗengusa̱ka̱i ka̱la̱ka̱tsu
ali ɗa vu uta̱ka̱i a̱shi a̱ a̱ra̱ɗi?
Nu mpa ɗa vi a tsura vuza Ciɗa vi Isaraila.
24 N alingata a̱ nu a ɗa
vu goyoi Vuzavaguɗu.
Ɗa vu danai,
<N ekeke o odoku a̱ a̱bunda̱i a̱ va̱ a ɗa
mi isai nsasan n na n la'i n ugaɗi, ɗa n uwai punu e mere-mere
u ɓata̱ u na u lai nu gaɗi a kakamba ka Lebano.
Adama a na n kapa ta̱ nɗanga n Sida n na n la'i n ugaɗi,
nu nɗanga n sipirus n na n la'i n kuga'an.
Ɗa vu danai, n yawa ta̱ a uteku u na u la'i n zuva,
ɗa n uwai n galai kuntsu ku ni.
25 N ga̱va̱ ta̱ ayinva,
ɗa n so'i mini me le.
N ataka e ene a̱ va̱
ɗa n dasai n ɗekpetengi nyeneke ma aza a Masar ra̱ka̱.>
26 <<Vu sa'wa kupana ba?
A na mpa n sheshe ɗe ili i nampa ali m megeshe ɗe?
N foɓuso ta̱ i ɗa n ayin acau a ɗe,
ɗa gogo mi a kuzuwa i ɗa i ya'an,
uteku u na vo kuɓoso likuci yu ukanji
ka̱ta̱ vu bonoko i ɗa kotomo ka agali.
27 I ɗaɗa i zuwai ɗa uma e le i babu utsura u makara, o okpoi n wovon
ɗa a̱ ripula̱i.
O okpoi babu utsura tsu mita̱,
babu atakaci e kukpete an mita̱ ma savu ma na mi a̱ kuta̱.
I ta̱ tsu mita̱ ma na mo tsu topo a gaɗi vu tsusaki, ka̱ta̱ ma lumba ma̱ kpa̱ɗa̱ kugbonguro.
28 <<Ama n yeve ta̱ ubuta̱ u na vi ida̱shi, n ayin a na vu tsu ta̱wa̱, n ayin a na vu tsu laza, n tsu na vi n wupa n a̱bunda̱i adama a̱ va̱.
29 Adama a na vi ya'an ta̱ wupa n a̱bunda̱i nu mpa,
ɗa kpamu kadanshi ku ugbamukaci u nu ka yawai a atsuvu a̱ va̱,
mi ta̱ a ku'uka kuɗopi a̱ vunu vu nu,
ka̱ta̱ kpamu n zuwa iryangama a̱ una̱ u nu.
Ka̱ta̱ n zuwa wu vu bono vu tono
nu uye u na vu tuka̱i.
30 <<Na va wi ta̱ o kokpo urotu wa̱ nu, avu Hezikaya,
<<Lala vi ta̱ a kulya'a i na i matsai n ka̱ci ka̱ ni,
ka̱ta̱ ka̱ya̱ vi lya'a umaci u na o doku a matsasakai ɗe.
A̱ ka̱ya̱ ka tatsu vi ta̱ a̱ kuca̱'a̱ n ka̱ci ka̱ nu ka̱ta̱ vi kya'a,
vi ca̱'a̱ kashina ki itacishi ka̱ta̱ vi lya'a umaci u ni.
31 Ka̱ta̱ aza a na a buwai n wuma a Yahuda,
a lapula ida̱shi mayin uteku tsu maɗanga ma na ma tsu zuwa aralu a iɗika ka̱ta̱ u matsa mayin gaɗi.
32 Adama a na kagimi ka uma a̱ va̱ ki ta̱ a̱ kuta̱ punu a Urushelima,
ka̱ta̱ koɓolo ka aza a na a la'akai n wuma kuta̱ a Kusan ku Sihiyona.
Vuzavaguɗu kovonshi vo osoji a gaɗi
wi ta̱ a kuya'an ili i nampa.
33 <<Adama a nannai ili i na vuzavaguɗu u dansai adama o mogono ma Asiriya i ɗa na.
<<Wa ku'uwa a̱ likuci i nampa ya ba,
ko ta na u taɗuku punu kaya.
U ku'uwa punu i ɗa m ma̱ra̱ga̱
ko kpamu u ma'a idasakpatsu i na u ku'uka punu ba.
34 Vuzavaguɗu u danai, Wa ku'uwa a̱ likuci i nampa ba, n uye u na wu utuka̱i u ɗaɗa u kubonoko.>>
35 <<Mi ta̱ a kukanza likuci i nampa ya ka̱ta̱ mi isa i ɗa,
adama a̱ ka̱ci ka̱ va̱ n kagbashi ka̱ va̱ Dawuda.>>
36 Ɗa kalingata ka Vuzavaguɗu ka banai kunai aza a Asiriya ali uma a̱kpa̱n amangatawun n amanga̱na̱shi n a tawun. Ana kayin kasai ɗa e enei even a ikyamba a uma a̱ ubuta̱ dem.
37 Ɗa Sanakaribu mogono ma Asiriya u lazai u bonoi a̱ likuci i ni, e Niniva.
38 Kanna ke te, ana wi a kuya'an kavasa a̱ kunu ku ka̱ma̱li ka̱ ni Nisaroku, ɗa muku n ni Adurameleki n Shareza a unai ni n kotokobi. Ɗa a sumai a kubana iɗika i Arara. Ɗa Isarhadon kolobo ka̱ ni ko okpoi mogono a̱ una̱ u ni.