38
Mɓa̱la̱ n Hizekiya n kupotso ku ni
1 A ayin a na Hizekiya wi ishi mogono, u ka̱na̱i mɓa̱la̱ kenu ana wa̱ kuwa̱. Ɗa Ishaya keneki kolobo ka Amozu ka banai wa̱ ni, ɗa u danai ni, <<Na ɗa ili i na Vuzavaguɗu u danai. Foɓuso kpa'a ku nu, adama a na vi ta̱ a̱ kukuwa̱, vi o kupotso ba.>>
2 Ɗa ta na Hezekaya u za̱lika̱i a̱shi a̱ ni a tsusaki ɗa u ya'in kavasa a kubana u Vuzavaguɗu,
3 ɗa u danai, <<Ciba, Vuzavaguɗu, tsu na n tonoi nu n uneki u ka̱ɗu koɓolo n ka̱ɗu ke te, ɗa kpamu n ya'in ili i singai a̱ a̱shi a̱ nu.>> Ɗa Hezekaya u shika̱i ka̱u.
4 Ɗa kadanshi ka Vuzavaguɗu ka̱ ta̱wa̱i wi Ishaya.
5 <<Bana vu dana Hezikaya va, <Na ɗa ili i na Vuzavaguɗu, Ka̱shile ke esheku a̱ ɗa̱ Dawuda, u danai. M pana ta̱ avasa a̱ nu m ma̱shi ma̱ nu. Adama a nannai mi ta̱ o kudoku wu a̱ya̱ gendu a wuma u nu.
6 Mi ta̱ a kisa wu n likuci i Urushelima e kukiye ku mogono ma Asiriya, ka̱ta̱ kpamu mi inda likuci i nampa ya.
7 << <Nava ɗaɗa urotu u Vuzavaguɗu a̱ kuta̱wa̱ nu, Vuzavaguɗu wi ta̱ a kuya'an ili i nampa i na u ya'in uzuwakpani.
8 Mi ta̱ a kuzuwa kululu ku kanna kubono n ka̱ca̱pa̱ ali adanga kupa, tsu na kagisamkpatsu ka kanna ko mogono Ahazu ki.> >> Ɗa kutashi ku kanna ku bonoi n ka̱ca̱pa̱ ali adanga kupa ta na.
9 Ana Mogono Hezekaya u ta̱na̱i, ɗa u ɗanai vishipa vu ucikpi vu nampa.
10 N danai, <<A̱ ka̱tsuma̱ ka ayin a utsura u va̱
u yotso ta̱ m bana ubuta̱ wa̱ a̱kpisa̱ n utsura u va̱,
ali n namba a̱ya̱ a na a ga'in n yongo n wuma?>>
11 Ɗa n doku n danai, <<Mo kudoku me kene Vuzavaguɗu ba,
Vuzavaguɗu vu na wi a iɗika ya aza a wuma,
mpa mi o kudoku me kene uma
ko n yongo n ele vu na i punu a aduniyan a nampa ba.
12 A takpa ta̱ wuma u va̱ uteku tsu na a̱ tsu muɗa̱ ka̱pa̱m ka maguɓi.
Ɗa n ka̱ta̱la̱i wuma u va̱ uteku tsu kaca'i,
uteku tsu kaca'i ka'a vu ka̱ta̱la̱i wuma u va̱,
ɗa u gbatyai mu ɗe a uleɓengi,
ɗa kanna n kayin vi yawakai mu uteku.
13 M gbamai asuvu ali a kubana a usana,
ama uteku tsu kawu ɗa o koɗosoi etele a̱ va̱ ra̱ka̱,
ɗa kanna n kayin vi yawakai mu uteku.
14 N lapai una̱ tsu manunu,
ɗa kpamu n na̱mgba̱i ka̱tsuma̱ tsu moɗoi.
A̱shi a̱ va̱ o okpoi ga̱lu a ayin a na mi a kinda gaɗi.
Vuzavaguɗu, mi ta̱ a̱ ka̱tsuma̱ ka atakaci, ta̱wa̱ vu ɓa̱nka̱ mu.>>
15 Ama yiɗa̱i n kudansa?
Adama a na a̱yi u ya'an ta̱ ɗe kadanshi nu mpa, a̱yi a̱ ka̱ci ka̱ ni feu u sa'wa ta̱ ɗe kuya'an ili i nampa.
Mi ta̱ a kuwala sawu a ayin a wuma u va̱ dem,
adama a̱ una̱mgbi u ka̱ɗu u va̱ u nampa.
16 Vuzavaguɗu, uneki wa atakaci u nu wi ta̱ n uga'in,
adama a na u banka mu ta̱ a wuma u singai m ma̱ta̱na̱ kpamu.
Vu bonokoi mu m ma̱ta̱na̱
ɗa vu ka̱sukpa̱i mu n yongo n wuma.
17 Mayun,
adama a uga'in u va̱ u ɗa n so'i atakaci tsu nampa.
N ucigi u nu ɗa vu foɓoi mu
adama a na m kpa̱ɗa̱ ku'uwa e kpenle ku munuka,
ɗa vu zuwakai unushi u va̱ dem
a̱ kucina̱ ku nu.
18 Adama a na ka̱kpisa̱ ka kucikpa wu ba,
ka̱kpisa̱ ka kuya'anka wu vishipa vu kucikpa ba,
aza a na a uwai ɗe a̱ ubuta̱ wu ukpisa̱
a buwa e kukeɗe a̱pa̱ adama a uneki u ka̱ɗu u nu ba.
19 Vuza wuma ɗa koci wa kufuɗa wa cikpa wu,
tsu na mi a kuya'an anana,
anan dada a tsu dana ta̱ muku n le
ukuna wu uneki u ka̱ɗu u nu.
20 Vuzavaguɗu wi ta̱ a kisa mu,
ka̱ta̱ a̱ tsu ci canana ishipa koɓolo n umolu
a ayin a wuma u tsu dem
punu a̱ a̱'isa̱ a Vuzavaguɗu.
21 Ishaya u dana ta̱, <<Foɓusoi mani'in ma maɗanga ma̱ ma̱biri ka̱ta̱ i tsungu a kamici ka, wi ta̱ a̱ kuta̱na̱.>>
22 Ɗa Hezikaya we ecei, <<Yiɗa̱i i kokpo urotu u na mpa n kubana a̱ a̱'isa̱ a Vuzavaguɗu?>>