41
Ka̱ɓa̱nki ka aza a Isaraila
1 Vuzavagɗu u danai, <<Paɗai bini ka̱ta̱ i panuka mu, a̱ɗa̱ iɗika i na yi ɗevu m mala.
Ya'an uma o dokusu n utsura,
ya'an a̱ ta̱wa̱ ɗevu nu mpa ka̱ta̱ a dansa,
Ya'an tsu ɓolongu ra̱ka̱ vu tsu adama a na ci sheshei kakuna.
2 <<Yayi u kushangi mogono ma kasana ma nampa ma,
ali ɗa u zuwai u ciya̱i ulya'i a̱ ubuta̱ u na u banai dem?
Yayi u nekei ni ulya'i a̱ ubuta̱ wu ngono n iɗika i na i buwai,
kotokobi ka̱ ni ko bonokoi le tsu kubuta̱.
Aya'a a̱ ni a wacuwai le tsa awana o kutono wunla̱i.
3 U kiyangi le ɗa u walai babu atakaci,
a nwalu m moloko adanshi ene a̱ ni a kusa'wa iɗika ba.
4 Yayi u zuwai ili i nampa i ya'an?
Yayi u ɗekei tsumani ali n ayin a̱ ugiti?
Mpa Vuzavaguɗu n yongo ta̱ lo ali n ayin a̱ ugiti, Mpa Vuzavaguɗu mi ta̱ kpamu a kuya'an lo
ali a kubana uteku.>>
5 Aza a na i o kotogu e ene ta̱ ɗa kpamu a panai wovon,
likuci ya aduniyan ra̱ka̱ i je'ekei ikyamba.
Ɗa kpamu o ɓolongi ɗa yawai ɗevu.
6 Yaba dem u ɓa̱nka̱i vuza na wi ɗevu n a̱yi
n a danansanai, <<Gbama ka̱ɗu>>
7 Keshe'wi ka̱ a̱ma̱li u tsu dana ta̱ kayimi ka azanariya, kya̱sa̱ wu n ulinga,
ka̱ta̱ vuza na u tsu lapula azanariya a ya'an mayin, u tsu dokusu ta̱ kpamu vuza na u tsu ɓolongu a ɗa dem,
ka̱ta̱ u dana, <<Ulinga wa u ga'an ta̱>>
ka̱ta̱ u vara ka'a n ikusa ta lo ka̱ yikpa̱.
8 <<Ama avu Isaraila, avu ɗa kagbashi ka̱ va̱, Yakubu vuza na n zagbai, kumaci ki Ibirahi ka̱ja̱'a̱ ka̱ va̱,
9 Avu na n ɗikai na ɗe a uteku wa aduniyan,
na ɗe a̱ ubuta̱ u na u la'i n da'angi,
ɗa n danai, <Avu ɗa kagbashi ka̱ va.>
N zagba wu ta̱, mi ta na feu a kuvaruku wu ba.
10 Ka̱ta̱ vu pana wovon ba,
mi ta̱ koɓolo n avu, ka̱ta̱ kpamu ka̱ɗu ka̱ nu ka̱ muɗa̱ ba, adama a na mpa ɗa Ka̱shile ka̱ nu.
Mi ta̱ a kuzuwa wu vu tsurakpa ka̱ta̱ m ɓa̱nka̱ wu.
Mi ta̱ a̱ kuɗa̱ngusa̱ wu n kukiye ku usuɓi ku usingai ku va̱.
11 <<Aza a na i a wupa n avu ra̱ka̱ mayun i ta̱ a kuya'an wono,
ka̱ta̱ a̱ ciya̱ kugoyi. Aza na kpamu i a tsurala n avu,
i ta̱ o kokpo ukuna u gbani ka̱ta̱ a̱ kuwa̱.
12 Vi ta̱ a̱ kula̱nsa̱ irala i nu,
ama ve kene le ba.
Aza a na kpamu i o kuvon n avu
i ta̱ o kokpo ukuna u gbani.
13 Adama a na mpa ɗa Vuzavaguɗu Ka̱shile ka̱ nu,
vuza na u tsu ɓa̱na̱ kukiye ku usingai ku nu,
ɗa n danai nu, ka̱ta̱ vu pana wovon ba,
mi ta̱ a̱ kuɓa̱nka̱ wu.
14 Ka̱ta̱ vu pana wovon ba, avu Yakubu,
Isaraila vu kenu,
adama a na mpa mi ta̱ a̱ kuɓa̱nka̱ wu, Vuzavaguɗu u dansai
Kishi ka̱ ɗa̱ vuza ciɗa vi Isaraila.
15 <<La̱na̱i, mi ta̱ o kubonoko ɗa̱ tsa alangu a kulapu,
a na i usavu n utsura.
Yi ta̱ a kulapa nsasan ka̱ta̱ i ɓoso n ɗa,
ka̱ta̱ kpamu i sa̱ra̱ aginda o okpo kubuta̱.
16 Yi ta̱ e kuyelyukpe le ka̱ta̱ wunla̱i u pura̱ngu le,
ka̱ta̱ kabatalikpau ka̱ pura̱ngu le.
Ama a̱ɗa̱ yi ta̱ a kuya'an ma̱za̱nga̱ u Vuzavaguɗu,
n tsugbayin tsu Vuza ciɗa vi Isaraila.
17 <<A ayin a na baci aza a unambi n a̱ la̱nsa̱i i a̱ kula̱nsa̱ mini,
ɗa a nambai,
ali ɗa ogboroli e ɗekpei adama a kakuli,
Mpa, Vuzavaguɗu mi ta̱ a kushuku le.
Mpa, Ka̱shile ki Isaraila, mi a̱ kuka̱sukpa̱ le ba.
18 Mi ta̱ a kuzuwa nɗolu mu uta̱ ɗe a aginda,
ka̱ta̱ nyeneke tamkpamu mu uta̱ a̱ a̱ra̱'a̱.
Mi ta̱ o kubonoko kakamba kokpo kuyene,
ka̱ta̱ kpamu iɗika i ɗekpu yo okpo ka̱shi ka̱ mini.
19 Mi ta̱ a kuzuwa ɗe a kakamba
nɗanga n sida nu nɗanga ma akashiya, nu nɗanga m murti, koɓolo nu nɗanga n zaitu
mu uta̱ ɗe a agbata,
n nɗanga n safire koɓolo n Firi n dobino, ciya̱ o okpo kutsun,
20 i nampa yi ta̱ a kuya'an adama a na uma e ene ka̱ta̱ e yeve,
o co'oko ka̱ta̱ e yevesheke
a na kukiye ku Vuzavaguɗu ku ɗa ku ya'in ili nampa ya,
Vuza ciɗa va aza a Isaraila ɗa u ya'in i ɗa.
21 Mpa Vuzavaguɗu, mogono mi Isaraila n danai,
<<Tuka̱i m mawansa ma̱ ɗa̱ wa̱ va̱. Mogono ma Yakubu madanai.
22 <<Tuka̱i n a̱ma̱li a̱ ɗa̱ ka̱ta̱ a
dana tsu i na yi lo a̱ kuta̱wa̱.
Danai tsu tsu na ili i cau i yongoi,
ciya̱ ci ɗika i ɗa n a̱miki
ka̱ta̱ kpamu ci yeve ulinga u na i ɗa i ya'in,
ko i dana tsu i na i kuta̱wa̱.
23 Danai tsu ili i na i kuta̱wa̱ na kelime,
adama a na ci yeve a na a̱ɗa̱ a̱ma̱li a ɗa yi.
Ya'in ili i yoku, ko i singai ko i gbani-gbani,
adama a na ci ya'an mereve ali tsu pana wovon.
24 Ama a̱ɗa̱ i yawa bi'i ili i yoku ba,
ulinga u ɗa̱ kpamu ɗa wi wasasa,
vuza na u zagbai ɗa̱ va wo okpo ta̱ ili yu unata.
25 <<N zagba ta̱ ɗe vuza yoku a uɓon wa aza gaɗi, mi ta̱ a̱ kuta̱wa̱ n a̱yi,
adama a na u ta̱wa̱ n vishili a uɓon u gaɗi.
U kudasa ta̱ ngono ka̱ta̱ mo okpo adanshi ci'in tsu ɗa,
uteku u na kama'i ka tsu dasa ci'in.
26 Yayi u dansai ili nampa ɗe ayin a̱ ugiti, adama na tsu yeve,
ko n ka mayun, adama na tsu dana, <Wi ta̱ n kamayun>?
Babu vuza na u dansai ili i nampa,
babu vuza na u dansai ka,
babu kpamu vuza na u panai kadanshi wa̱ nu.
27 Mpa ɗa ugiti u na n danai Sihiyona <la̱nuku, ele ɗa na a̱ kuta̱wa̱>
N neke ta̱ Urushelima kalingata ka arabali a singai.
28 Ɗa n la̱nuki punu a̱ ka̱tsuma̱ ke le, ama ko vuza te n ciya̱ ba,
babu vuza te a̱ ka̱tsuma̱ ke le vu na u kufuɗa kuneke odoki,
babu vuza na kpamu u kuneke wu ushuki ayin a na baci me ecei le.
29 La̱na̱, ra̱ka̱ vu le a uwa a ɗa,
ulinga u le, gbani ɗa.
A̱ma̱li a̱ ɗa̱ ra̱ka̱ ofoli a ɗa tsu wunla̱.