44
Isaraila aza a na Vuzavaguɗu u zagbai
1 <<Ama gogo na pana, avu Yakubu kagbashi ka̱ va̱,
Isaraila, avu na n zagbai.
2 Na ɗa i na Vuzavaguɗu u dansai,
a̱yi vuza na u ya'in nu, a̱yi na u zuwai nu a̱ ka̱tsuma̱,
a̱yi ɗa kpamu vuza na u ku ɓa̱nka̱ wu.
Ka̱ta̱ vu pana wovon ba, avu Yakubu kagbashi ka̱ va̱,
Jeshuru, avu na n zagbai.
3 Adama na mi ta̱ o kuyo'o mini a iɗika i ɗekpu,
ka̱ta̱ kpamu n zuwa nyeneke a iɗika yu ɗekpu.
Ka̱ta̱ mpa n zuwa ayinviki a̱ va̱ u muku n nu, una̱singai u va̱ kpamu u tsukaya tsu nu.
4 I ta̱ a̱ kuta̱ uteku tsu mita̱ a maɗanga a̱ ka̱kina̱ ka mini,
uteku tsu maɗanga o kuɗolu ku na ki e kuyene.
5 Vuza yoku wi ta̱ a kudana n utsura, a̱yi vuma vu Vuzavaguɗu ɗa,
vuza yoku kpamu ka̱ta̱ u ɗeke ka̱ci ka̱ ni n kula ku Yakubu,
ka̱ta̱ kpamu vuza yoku u ɗana e kukiye ku ni, <Mpa vuza vu Vuzavaguɗu vu ɗa.>
Ka̱ta̱ kpamu u ɗika kula ki Isaraila adanshi ku ni ku ɗa.>>
Vuzavaguɗu ka̱ma̱li ka ba
6 <<Ili i na Vuzavaguɗu u danai i ɗaɗa na,
mogono ma aza a Isaraila n vuza na u kushiba̱ uma, Vuzavaguɗu vo osoji a gaɗi. Mpa ɗa ugiti n ukocishi,
Ka̱shile ko yoku ki lo ba, sai mpa.
7 Yayi wi lo tsu va̱?
Ya'an wu uta̱ u dansa,
ya'an u dansa ka̱ta̱ wu uta̱ka̱ mu i ɗa e keteshe. U dana mu tsu na a ya'in ɗa n ya'in uma a cau
koɓolo n i na i kuta̱wa̱,
mayu ya'an u dana mu ili i na i kuta̱wa̱.
8 Ka̱ta̱ i je'eke ikyamba ba,
ka̱ta̱ kpamu i pana wovon ba. N sa'wa kudansa ukuna u nampa ali ɗa n ya'in kene m megeshe ma ɗe adama a u ɗa ba?
A̱ɗa̱ ɗa ngan n va̱. Ka̱shile ko yoku ki ta̱ lo, m ba mpa ba?
Babu kakpanlai ko yoku, mpa n yeve ko yoku ba.>>
9 Aza a na a ya'in a̱ma̱li dem ukuna u gbani u ɗa,
ili i na kpamu a zuwakai katsura ya kuya'an le ili ba.
Ele vu na a ga'in a ya'anka le kadanshi a̱yimba̱ a ɗa,
i ta̱ kpamu n tsulau ɗa okpoi n wono.
10 Yayi u she'wei ka̱ma̱li ko u luwa̱i kululu
ku na ki e kuneke yi ili ba?
11 N dana ɗa̱,
a̱yi n aza a̱ ni ra̱ka̱ i ta̱ a kuya'an wono, ayimi a ili uma ɗa.
Ya'an ra̱ka̱ vi le a gasa ka̱ta̱ a zagba i na i kuta̱ka̱ le.
I ta̱ a kupana wovon, ka̱ta̱ ra̱ka̱ vi le a ya'an wono.
12 Kawakana ka tsu ɗika ta̱ ucanuku wu ulinga,
ka̱ta̱ u zuwa a kina u yuma ili.
U tsu yima ta̱ ili ya m matalaka u ka̱na̱ kugbasha
i ɗa n utsura.
Kambulu ka̱ ka̱na̱ yi baci u tsu okpo ta̱ babu utsura,
kakuli ka̱ ka̱na̱ yi baci feu u tsu lima̱ ta̱.
13 Keshe'wi ka tsu gisanku ta̱ maɗanga
ka̱ta̱ u zuwaka ma'a urotu n ili yu ulinga i ni,
ka̱ta̱ u she'we ka'a
ali kokpo an vuma vu singai.
U ya'an yi tsu na a kuzuwa yi a kpa'a.
14 U tsu kapa ta̱ nɗanga n sida,
ko kpamu u zagba nɗanga n sipuru ko maɗanga ma oku
ka̱ta̱ u ka̱sukpa̱ ma'a mo gbonguro koɓolo nu nɗanga n kuntsu,
ko u ca̱'a̱ nɗanga n sida ka̱ta̱ mini ma̱ Ka̱shile ma zuwa n ɗa m gbonguro.
15 N tso okpo ta̱ ili i kutasuku akina i vuma,
u tsu kenuku ta̱ n yoku u tasuku akina a na u kunyashika,
U tsu tasuku ta̱ akina a ka̱ta̱ u kangala boroji.
Ka̱ta̱ kpamu u she'we ka̱ma̱li ka na u kucikpa,
u bonoko ka'a ka̱ma̱li ka̱ta̱ u kuɗa̱nku ka'a.
16 Ka̱ta̱ u songu kagimi ka maɗanga ka a akina,
adama a na u zungu inyama
Ka̱ta̱ u doku u nyashika. Ka̱ta̱ u dana,
<<Kai, akina a nampa yokpo ta̱.>>
17 Ka̱ta̱ kagimi ka maɗanga ka na ka buwai u bonoko ka'a ka̱ma̱li, ka̱ma̱li ka̱ ka̱ci ka̱ ni,
u tsu kuɗa̱nku ta̱ ka'a ka̱ta̱ u cikpa ka'a.
U tsu bana ta̱ u vasa ɗe ka̱ta̱ u dana,
<<Isa mu, avu ɗa ka̱ma̱li ka̱ va̱.>>
18 E yeve ili ba, a fuɗa kpamu ukuna ba,
adama a na a̱shi e le i ta̱ upali ɗa a̱ kpa̱ɗa̱i kufuɗa kene
a̱ɗu e le dem a kufuɗa kuyeve ba.
19 Babu vuza na u co'okoi adama a na u sheshe,
babu kpamu vuza na wi n kuyeve ko kufuɗa ku na u kudana,
<<N ya'an ta̱ ulinga n kagimi ɗa n songi a akina
ali ɗa n kangalai boroji vu va̱ n tsikina ci ni
ɗa kpamu n zungi inyama n takumai.
Nini ɗai n kubonoko kagimi ka ili yu unata?
Kucikpa n kuɗa̱ngu n cikpa kogboli?>>
20 Kokomo ka'a u tsu lya'a, ka̱ɗu ka gbani-gbani ka̱ ni ka vakangi ni,
adama a nannai wi a kufuɗa kisa ka̱ci ka̱ ni ba, ko u fuɗa u dana,
<<Ili i na n ka̱na̱i e kukiye ku singai ku va̱ ka a'uwa ɗa ba?>>
21 Ciɓa n ukuna u nampa, avu Yakubu koɓolo n Isaraila,
adama na avu ɗa kagbashi ka̱ va̱.
Mpa ɗa n ya'in nu, avu ɗa kagbashi ka̱ va̱.
Avu Isaraila, mpa mi a kucinukpa n avu ba.
22 Mpa n takpa ta̱ una̱mgbi u nu ce eleshu,
ɗa kpamu n takpai unushi u nu ce egele a usana.
Bono wa̱ va̱,
adama a na mpa n shiba̱ wu ta̱ ɗe.>>
23 Gaɗi, cananai ishipa i ma̱za̱nga̱,
dama a na Vuzavaguɗu ɗa u
ya'in ili i nampa ya, orukpoi ka̱u,
a̱ɗa̱ ɗaka vi iɗika.
Ɓosongi ishipa, a̱ɗa̱ nsasan,
koɓolo nu nɗanga n kutsun dem n na mi punu,
adama a na Vuzavaguɗu u shiba̱ ta̱ Yakubu,
ka̱ta̱ aza a Isaraila a cikpa yi.
Urushelima ɗa ubuta̱ wi ida̱shi u va̱
24 Ili i na Vuzavaguɗu u danai i ɗaɗa na,
ka̱shibi ka̱ nu, a̱yi na u ya'in nu avu a̱ ka̱tsuma̱.
<<Mpa ɗa Vuzavaguɗu,
vuza na u ya'in ili ra̱ka̱,
vuza na kpamu ende'en u ba̱rukpa̱i gaɗi,
ɗa kpamu u poloi iɗika n ka̱ci ka̱ ni babu ka̱ɓa̱nki,
25 <<Mpa ɗa m bonokoi nlum ma a'uwa ukuna u gbani,
eneki kpamu okpoi alau.
Vuza na u tsu bonoko eyevi ka̱ca̱pa̱
ka̱ta̱ u zuwa kuyeve ku le kokpo tsulau,
26 a̱yi na u tsu shatangu kadanshi ka kagbashi ka̱ ni,
ka̱ta̱ kpamu u shatangu ukuna u na alingata a dansai,
<<ele na a danai aza a Urishelima, <Uma i ta̱ o kubono n ida̱shi punu na kpamu>
Iɗika i Yahuda tamkpamu, <I ta̱ a̱ kudoku kuma'asaka wu,
ka̱ta̱ n ɗengusa̱ agali a̱ nu dem>
27 vuza na u danai mala mu uga̱vi, <Ɗekpe,
ka̱ta̱ kpamu n ɗekpetengu nyeneke n ɗa̱>
28 Vuza na u danai Sairusu, <A̱yi ɗa maguɓi ma̱ va̱,
wi kpamu a kushatangu kusheshe ku va̱ ra̱ka̱,
wi ta̱ a kudana Urishelima, <<Ya'an o doku a ma'asaka yi,>>
ukuna wa̱ a̱'isa̱ tamkpamu, <<Ya'an a vara kuma'a ku ni.>>>