45
Sairusu ili yu ulinga i Ka̱shile.
1 I na Vuzavaguɗu u danai Mazagbi ma̱ ni i ɗaɗa na,
a̱yi Sairusu, vuza na n ka̱na̱i kukiye ku usingai ku ni adama a na
u lya'a aduniyan n kuvon,
ka̱ta̱ u takpa utsura wu ngono,
ka̱ta̱ a̱ ɓa̱yuwa̱ka̱ yi utsutsu u na babu vuza na u
kuɓa̱ya̱ngu u ɗa.
2 <<Mpa n kulaza ta̱ kelime ka̱ nu
ka̱ta̱ n sa̱ra̱ nsasan,
n fa̱da̱ kpamu utsutsu u na a ya'in n iyum i shili,
ka̱ta̱ m gbatya aburakpatsu a̱ iyum miri-miri.
3 Mpa n kuneke wu ta̱ kawalatsu,
n uciyi u na wi a̱ ubuta̱ wu usokongi,
adama na vi yeve a na mpa ɗa Vuzavaguɗu,
Ka̱shile ki Isaraila, vuza na u ɗekei nu n kula ku nu.
4 <<Adama a kagbashi ka̱ va̱ Yakubu,
n Isaraila vuza na n zagbai,
n ɗeke wu ta̱ n kula ku nu,
ɗa n ne'i nu kula ku tsugbayin,
ko a na vi yevei mu ba.
5 Mpa ɗa Vuzavaguɗu, vuza yoku wi lo kpamu ba,
Ka̱shile ki lo ba sai mpa koci,
n neke wu ta̱ katsura,
ko a na vi yeve mu ba,
6 adama a na uma e yeve,
a ili i na i ɗikai a kasana ali a kubana a̱ ka̱livi,
vuza yoku wi lo ba sai mpa.
Mpa ɗa Vuzavaguɗu, vuza yoku wi lo kpamu ba.
7 Mpa ɗa n ya'in kutashi ɗa kpamu n ya'in ka̱yimbi,
mpa ɗa n ya'in kasingai n kawuya,
Mpa ɗa Vuzavaguɗu, vuza na u ya'in ili i nampa ra̱ka̱.
8 <<Avu gaɗi, ya'an ukuna u kasingai,
ya'an eleshu a̱ tuka̱ n ka'a a iɗika.
Ya'an iɗika i ɓa̱yuwa̱ n wanshi,
adama a na wishi u yimkpa,
ya'an usuɓi u gbonguro n ka'a,
mpa Vuzavaguɗu ɗa n ya'in i ɗa.
9 <<Ili ya atakaci i ɗa u vuza na u shamgbai a kanananai n vuza na u ya'in ni,
Ili ya atakaci i ɗa mogbodo ma na ma ya'an kanananai n kama'i ka̱ ni,
ko ci'in ci ta̱ kece kama'i,
<Yiɗa̱i vi a kuya'an?>
Ko kpamu avu vi yeve,
ulinga u nu ba?>
10 Ili ya atakaci i ɗa u vuza na u kudana esheku a̱ ni,
<Yiɗa̱i i zuwai ɗa vu matsai mu?>
Ko u dana a̱na̱ku a̱ ni,
yiɗa̱i vu matsai?>
11 <<Ili i na Vuzavaguɗu u danai i ɗaɗa na,
Vuza Ciɗa vi Isaraila, n vuza na kpamu u ya'in ni,
ka̱ta̱ ve ece mu ukuna wi ili i na yi lo a̱ kuta̱wa̱, adama a̱ ukuna wu muku n va̱ ba,
ko kpamu vu dana mu ili i na i ga'in n ya'an?
12 Mpa ɗa n ya'in aduniyan,
ɗa n ya'in kpamu vuma punu.
N ekiye a̱ va̱ a ɗa n ya'in gaɗi,
ɗa kpamu n zuwai ili i na yi ɗe va dem.
13 Vuzavaguɗu Mala'imili u danai, Mpa n kuɗa̱ngusa̱ ta̱ Sairusu adama a na u shatangu ulinga u kasingai u va̱,
mi ta̱ a kuzuwa nwalu n ni ra̱ka̱ n ya'an derere.
Wi ta̱ a kuma'asaka likuci i va̱
ka̱ta̱ u shikpa agbashi a̱ va̱,
u kuya'an nannai va adama ikebe ko n katsupu ko yoku ba,
i ɗaɗa i na Vuzavaguɗu malyaimili u danai>>
14 Ili i na Vuzavaguɗu u danai i ɗa na,
<<Uciyi wa aza a Masar n aza a tsulaga a Kush,
koɓolo n wa aza a uɓon u gaɗi,
koɓolo n uma a ugaɗi a Sabina
i ta̱ a̱ kuta̱wa̱ wa̱ ɗa̱ ra̱ka̱
ka̱ta̱ okpo aza a̱ ɗa̱.
I ta̱ a̱ kuta̱wa̱ koɓolo n aza a tsulaga e le ra̱ka̱,
ka̱ta̱ o tono ɗa̱ kucina̱,
ushiyi n ikani i tsugbashi.
I ta̱ a̱ kukuɗa̱nku ɗa̱
ka̱ta̱ o folono ɗa̱ a̱ ka̱na̱ kudana,
<Mayun Ka̱shile ki ta̱ koɓolo n a̱ɗa̱, babu kpamu vuza yoku,
Ka̱shile ko yoku ki lo ba.> >>
15 Mayun, avu Ka̱shile ka'a ka na ko tsu sokongu ka̱ci ka̱ ni,
avu Ka̱shile ki Isaraila n Kishi.
16 Aya'in a̱ a̱ma̱li ra̱ka̱ i ta̱ a kuya'an wono, ka̱ta̱ o okpo n kugoyi,
i ta̱ a̱ kuyikpa̱ o wono ra̱ka̱.
17 Ama aza a Isaraila i ta̱ a̱ kuciya̱ wishi a̱ ubuta̱ u Vuzavaguɗu
n wishi babu kukotso,
a̱ɗa̱ ya kuya'an wono ba,
ko ta na i ciya̱ kugoyi ku na ka̱ kukpa̱ɗa̱ kukotso.
18 Ili i na Vuzavaguɗu u danai i ɗa na,
a̱yi na u ya'in gaɗi,
a̱yi ɗa Ka̱shile.
A̱yi ɗa u foɓusoi tsu na u kuya'an aduniyan,
a̱yi ɗa u ya'in a ɗa,
u ya'an a ɗa tsu na a ɗa o kokpo lekeɗi ba,
ama u ya'in a ɗa adama a na uma o yongo punu.
Ɗa u danai,
<<Mpa ɗa Vuzavagɗu
vuza yoku wi lo kpamu ba.
19 N ya'an kadanshi ka̱ va̱ usokongi
a̱ ubuta̱ u ka̱yimbi ba.
Mpa mi ishi a kudana ntsukaya n Yakubu,
<Ka̱ta̱ i la̱nsa̱ mu gbani ba, ishi baci a̱ kuciya̱ mu ba,
Mpa Vuzavaguɗu n tsu dansa ta̱ ili i na yi i mayun,
ka̱ta̱ kpamu n sala ukuna u na wi derere.
20 <<Ɓolongi ka̱ci ka̱ ɗa̱ ka̱ta̱ i ta̱wa̱,
yawai ɗevu, a̱ɗa̱ vu na i la'akai n wuma a aduniyan.
Umici u ɗa wi o kuforo aza a na a ci ɗika a̱ma̱li a na a ya'in nu nɗanga a̱ kuka̱ra̱ka̱,
ele vu na a tsu vasa u ka̱ma̱li ka na ka ci isa vuza ba.
21 Dansai ili i na yi lo, tuka̱i n ukuna wa,
ya'an o goɗumo u ɗa koɓolo.
Yayi u ya'in kene adama a ukuna u nampa n ayin a cau a ɗe,
yayi u dansai ka'a m megeshe ma ɗe?
Mpa ɗa ba, mpa Vuzavaguɗu?
Babu Ka̱shile ko yoku ka na ki lo,
Ka̱shile ku usuɓi n Kishi,
vuza yoku wi lo ba sai mpa koci.
22 <<Bonoi wa̱ va̱ ka̱ta̱ i ciya̱ wishi,
a̱ɗa̱ vu na yi dada'in dem a aduniyan.
Adama a na mpa ɗa Ka̱shile, vuza yoku wi lo kpamu ba.
23 N kucuna ta̱ n kula ku va̱,
n dansa ta̱ ukuna u mayun,
mi o kubono ma̱ sa̱da̱kpa̱ kadanshi ka nanlo ba.
A̱ka̱nga̱tsu dem i ta̱ a̱ kukuɗa̱nku mu,
kelentsu ka yaba dem ki ta̱ a kudansa ukuna u singai.
24 I ta̱ a kudana adama a̱ va̱,
<Usuɓi n utsura u Vuzavaguɗu u ɗa wi koci.> >>
Aza a na a ya'in wupa n a̱yi
i ta̱ a̱ kubana wa̱ ni ra̱ka̱ ka̱ta̱ okpo n wono.
25 Ama u Vuzavaguɗu u ɗa ntsukaya mi Isaraila ra̱ka̱
n kuciya̱ kasingai koɓolo n tsugbayin.