46
A̱ma̱li aza a Babila
1 A̱ma̱li a aza a Babila a na e ci ɗeke Belu n Nebo a̱ ciya̱ ta̱ ugoyi ka̱u,
a canuku ta̱ ululu e le a̱ ka̱na̱i kuka̱ra̱ka̱ a ɗa.
Gogo na i ta̱ a gaɗi vu nnama n na n tsu canuku ucanuku
nnama n nampa mo o'o ta̱ adama a ucanuku u ululu u na a ɗikai va.
2 A̱ma̱li a a̱ ciya̱i kugoyi ɗa a kuɗa̱ngi koɓolo n aza a na a ɗikai le,
a fuɗa ta na a̱ ɓa̱nka̱ a̱miki a ba,
ɗa a ɗikai dem vi le a kubana a̱ ubuta̱ wu ugbashi.
3 <<Panakai mu, a̱ɗa̱ aza a Yakubu,
a̱ɗa̱ vu na i buwai dem a̱ ka̱tsuma ka kpa'a ki Isaraila.
A̱ɗa̱ vu na n la̱na̱i kafu a matsa ɗa̱, ɗa n ɗengusa̱i ɗa̱
ali n ayin a na a matsai ɗa̱.
4 Ali n ayin a tsukutsa a̱ ɗa̱
Mpa ɗa a̱yi, ali a kubana a ayin a na i kuta̱ ka̱nji ka̱ri, mi ta̱ a kuɗika utsura u ɗa̱.
Mpa ɗa n ya'in ɗa̱ mi ta̱ a̱ kula̱na̱ ɗa̱,
mi ta̱ a kinda ɗa̱ ka̱ta̱ mi isa ɗa̱.
5 <<N yayi ya kugisangu mu, ka̱ta̱ i ɗika ci ta̱ derere?
N yayi kpamu ci yotsonoi, ali ɗa i kugisanku tsu?
6 Aza o yoku a̱ ɓa̱yuwa̱i nsolo n le ɗa i ugulani n azanariya,
a tsu gisanku ta̱ azurufa e le a̱ ka̱kunzukpa̱tsu,
ele ɗa a tsu ɗika kayimi ka azanariya ka̱ta̱ u bonoko a ɗa ka̱ma̱li,
ka̱ta̱ a̱ kuɗa̱nku ka'a ali sai iɗika a cikpa yi.
7 A ci ɗika ta̱ ka'a a avangatsu e le a̱ kuka̱ra̱ka̱,
a zuwa baci ka'a ta lo ka ci shamgba
ka tsu wala ba.
Ka̱ tsu zumgba̱ ba, ko a vasa baci wa̱ ni u tsu ushuku ba.
Ka̱ tsu uta̱ka̱ vuza a kadama ba.
8 <<Ka̱ta̱ i cinukpa n kakuna ka nampa ba,
ka̱ta̱ i zuwa ka'a a̱ ka̱ɗu. Ciɓai n ukuna u nampa, a̱ɗa̱ aza a unushi.
9 Ciɓasai n ili i cau, i na i lazai n ayin a ɗe.
Adama a na mpa ɗa Ka̱shile, babu kpamu vuza yoku,
mpa ɗa Ka̱shile, babu vuza na wi tsu va̱.
10 N ugiti n tsu dana ta̱ uma ukuna wu ukocishi,
n ili i cacau, koɓolo n i na yi lo a̱ kuta̱wa̱.
N danai, kadanshi ka̱ va̱ ki ta̱ a kushamgba,
mi ta̱ kpamu a kuya'an i na n cikalai kuya'an dem.
11 N ɗekei vuza yoku a kasana tsu manu ma na ma tsu shaɗa ili,
a iɗika i da'in kpamu vuma na u kushatangu kusheshe ku va̱.
N dansa ta̱ ili i na n kuya'an,
mi ta̱ ta na a kuya'an i ɗa.
12 Panakai mu, a̱ɗa̱ uma a ugbamukaci,
a̱ɗa̱ na yi da'angi n kuya'an ku kasingai.
13 Mpa mi ta̱ ufoɓushi adama a na n zuwa ili i wala derere,
makyan mi punu ka̱u ba,
ama gogo na wishi u va̱ wi a kuya'an megeshe ba.
Mi ta̱ a kuzuwa wishi u va̱ a Urushelima,
tsugbayin tsu va̱ tamkpamu a Isaraila.