48
Ugbamukaci wa aza a Isaraila
1 <<Panai ili i nampa, a̱ɗa̱ aza a kpa'a ku Yakubu,
a̱ɗa̱ na e ci ɗeke n kula ka aza a Isaraila,
ɗa yu uta̱i a tsukaya ci Yahuda,
ɗa kpamu i kucinai n kula ku Vuzavaguɗu
ali ɗa i ɗekei Ka̱shile ki Isaraila,
ama ba mayun ɗa i ya'in nannai ko n usuɓi ba,
2 a̱ɗa̱ na i ci ɗeke ka̱ci ka̱ ɗa̱ aza a ida̱shi a iɗika i ciɗa,
ɗa kpamu i nekei katsura u Ka̱shile ka aza a Isaraila,
Vuzavaguɗu Mala'imili ɗa kula ku ni.
3 N dana ta̱ ɗe ukuna wi ili i cau m megeshe ma ɗe,
una̱ u va̱ u ɗa u dansai ka'a, ɗa kpamu n zuwai uma e yevei ka'a,
ɗa n ya'in gogo'o n ya'in ka'a ɗa ta na yu uta̱i nannai.
4 Adama a na n yeve ta̱ tsu na yi n ugbamukaci,
eɗeku a̱ ɗa̱ ugbami ci iyum,
a̱ca̱n a̱ ɗa̱ feu utsura ci iyum i shili.
5 Adama a nannai n dana ɗa̱ ta̱ ili i nampa ali n ayin a ɗe,
kafu i ɗa i ta̱wa̱ n dana ɗa̱ ta̱ i ɗa
adama a na ka̱ta̱ i kpa̱ɗa̱ kudana,
<A̱ma̱li a̱ va̱ a ɗa a ya'in le,
a̱ma̱li a̱ ushe'wi a̱ va̱ koɓolo n a̱ma̱li a̱ iyum a̱ va̱ a ɗa a zuwai le.>
6 I pana ta̱ ili i nampa, indanai i ɗa.
Ya̱ kushuku n i ɗa ba?
<<Ili i na i ɗikai anana mi ta̱ a kudana ɗa̱ ukuna u savu,
ili yu usokongi i na ka̱ta̱ i sa'wai kuyeve ba.
7 Gogo na ɗa a ya'in i ɗa, ka̱ta̱ i ɗa i ya'an megeshe ba.
I sa'wa kupana i ɗa ba sai anana.
Babu tsu na i kudana,
<E, n yeve ta̱ tsu na i.>
8 I sa'wa kupana ba, i sa'wa feu kuyeve ba,
ali n ayin a cau atsuvu a̱ ɗa̱ a sa'wa kuɓa̱yuwa̱ ba.
Adama a na n yeve ta̱ tsu na yi n kawuya,
e ci ɗeke ɗa̱ ta̱ kpamu aza a ugbamukaci ali kafu a matsa ɗa̱.
9 Adama a kula ku va̱ ɗa n ka̱na̱i wupa u va̱,
adama a na n ciya̱ ucikpi ɗa m kpa̱ɗa̱ta̱ngi i na mi ishi a kuya'anka ɗa̱,
ta lo ma takpa ɗa̱ a̱ ubuta̱ u va̱.
10 La̱na̱i, n luwa̱ ɗa̱ ta̱, ama ba tsa azanariya ba,
n kondo ɗa̱ ta̱ e kenle ka atakaci.
11 Adama a̱ ka̱ci ka̱ va̱, e, adama a̱ ka̱ci ka̱ va̱, ɗa n ya'in ili i nampa.
Nini ɗai n kuka̱sukpa̱ kula ku va̱ ku na̱mgba̱?
Mpa me kupece tsugbayin tsu va̱ n vuza ba.
12 <<Panaka mu, avu Yakubu,
n Isaraila, avu na n ɗekei.
Mpa ɗa,
mpa ɗa ugiti, mpa ɗa kpamu ukocishi.
13 Ekiye a̱ va̱ a ɗa a varai kumi ka aduniyan,
ɗa kukiye ku usingai ku va̱ ku poloi gaɗi,
n ɗeke le baci
a̱ tsu uta̱ ta̱ ka̱ta̱ a shamgba koɓolo.
14 <<Ta̱wa̱i koɓolo dem vu ɗa̱, ka̱ta̱ i pana.
Ka̱ma̱li ke ne ka i ka sa'wai kudansa ili i nampa?
Mpa Vuzavaguɗu n ciga yi ta̱,
wi ta̱ a kushatangu ulinga u ni a Babila,
kukiye ku ni ki ta̱ o kokpo tsurala n aza a Babila.
15 Mpa, Vuzavaguɗu n dansa ta̱,
mayu, mpa ɗa n ɗekei ni.
Mi ta̱ a̱ kuta̱wa̱ n a̱yi,
ka̱ta̱ ta na u shatangu ili na u cigai kuya'an.
16 Ta̱wa̱i ɗevu nu mpa ka̱ta̱ i pana ukuna u nampa.
<<Ali n kadanshi ka na n gita̱i kuya'an n ya'an ka'a usokongi ba,
a ayin a na ili i nanlo i ya'in mpa mi ta̱ ɗe.>>
Gogo na ta na Vuzavaguɗu Ka̱shile u suku mu ta̱,
koɓolo n ayinviki a singai a̱ ni.
17 Ili i na Vuzavaguɗu u danai i ɗa na,
Ka̱shibi ka̱ ɗa̱, Vuza ciɗa vi Isaraila.
<<Mpa ɗa Vuzavaguɗu Ka̱shile ka̱ ɗa̱
vuza na u tsu yotsongu ɗa̱ i na i ga'in ɗa̱,
a̱yi na u tsu tono n a̱ɗa̱ a uye u na i kuwala.
18 Ishi baci i yeve ɗa i zukai mayin n wila̱ u va̱,
ma̱ta̱na̱ ma̱ ɗa̱ mi ishi ta̱ o kokpo an kuyene,
ka̱ta̱ usuɓi u ɗa̱ feu wo okpo tsa aɓau a mala.
19 Muku n nu mi ishi ta̱ o kokpo tsu kayala,
ka̱ta̱ ntsukaya n nu tamkpamu mo okpo tsu ushen wi ili i kashina i ni,
ula e le a kusa'wa kuya'an utakpi ba,
ko a ya'an ula̱nga̱shi wa̱ va̱.>>
20 Uta̱i punu a Babila,
sumai i ka̱sukpa̱ aza a Kaldiya.
Salai kakuna ka nampa m ma̱za̱nga̱ ma kaca'a,
ka̱ta̱ i dansa ka'a.
Suki ka'a da'in a uteku wa aduniyan,
i dana, <<Vuzavaguɗu u shiba̱ ta̱ kagbashi ka̱ ni Yakubu.>>
21 Ele a pana kakuli ko yoku a ayin a na Vuzavaguɗu u tonoi n ele e meremune ba,
u zuwai mini mu uta̱i le a kakpanlai,
u ɓosoi kakpanlai ka
ɗa mini mu uta̱i punu.
22 Ɗa Vuzavaguɗu u danai, <<Vuza va asuvawuya wa̱ kuciya̱ ma̱ta̱na̱ ba.>>