50
Unushi wa aza a Isaraila n kagbashi ka̱ ma̱riki
1 Ili i na Vuzavaguɗu u danai i ɗa na,
<<Te ɗai katakarda ku upeci u yolo ka̱ a̱na̱vu,
ka na n danai n ka̱sukpa̱i ta̱?
Ko u vuza vu kutan vu va̱ ve ne ɗai
n dengei wu ta̱?
Adama a̱ unushi u ɗa n dengei ɗa̱,
adama a kawuya ka̱ ɗa̱ ɗa n lokoi a̱na̱kpa̱ a̱ ɗa̱.
2 <<Ana n ta̱wa̱i yiɗa̱i i zuwai ɗa m kpa̱ɗa̱i kucina vuza ɗe?
Ana n ɗekei yiɗa̱i ɗa vuza u kpa̱ɗa̱i kuya'an lo a na wa̱ kushuku?
Kukiye ku va̱ kugusa̱ ta̱ ali ɗa ka̱ kukpa̱ɗa̱ kushiba̱ uma a?
Ko ta na ku namba utsura u na ka kisa vuza? La̱na̱,
n uɓarangi u va̱ koci ɗa n ɗekpetengi mala,
m bonokoi nɗolu ubuta̱ u ɗeku,
adan e le a shamai adama a unambi u mini,
ɗa a̱ kuwa̱i n kakuli ali ɗa a shamai.
3 M palai gaɗi n ka̱yimbi,
ɗa n ya'ankai ni ili i kupalaka ka̱ci ka̱ ni m motogu mu una̱mgbuka̱tsuma̱.>>
4 Vuzavaguɗu Mala'imili u neke mu ta̱ kadanshi ku ugboji,
adama a na n yeve kadanshi ko kudokusu uma ka̱ɗu ka na ko kuɓa̱nka̱ aza a na i babu utsura.
Usana lakam u tsu jimgbasa mu ta̱
atsuvu a̱ va̱ ciya̱ m pana tsa aza a na a̱ ciya̱i uyotsongi.
5 Vuzavaguɗu Ka̱shile u ɓa̱yuwa̱ ta̱ atsuvu a̱ va̱,
n ya'an ugbamukaci kpamu ba,
m kpatala feu kucina̱ ba.
6 N neke ta̱ kucina̱ ku va̱ a̱ ubuta̱ wa aza a na i a kulapa mu,
n nekei nguji n va̱ kpamu a̱ ubuta̱ wa aza a na i o kurono ntsa̱ka̱ n va̱.
Mpa ta na m kpatala a̱shi a̱ va̱ a̱ ubuta̱
wa aza a na i a kushikasa mu n a jirakai mu ntsa̱n ba.
7 Adama na Vuzavaguɗu Mala'imili u tsu ɓa̱nka̱ mu ta̱,
mpa mi a kuciya̱ kugoyi ba.
Adama a nannai n shikpa̱ ta̱ a̱shi a̱ va̱ tsu katali,
n yeve ta̱ ta na mi a kuya'an wono ba.
8 A̱yi na u nekei mu uba̱ruwi wi ta̱ lo ɗevu.
Yayi u kugbaga mu n kavama?
Ya'an n tsu kondonoi ce ene.
Anan yayi aza a nsata a̱ va̱?
ka̱sukpa̱ wu uta̱ na ɗevu nu mpa.
9 La̱na̱, Vuzavaguɗu Mala'imili wi ta̱ koɓolo nu mpa.
Yayi u kudana mi ta̱ n unushi?
I ta̱ a kushama ra̱ka̱ tsa akashi,
ka̱ta̱ azun a takuma le ra̱ka̱.
10 Yayi a̱ ka̱tsuma̱ ka̱ ɗa̱ wi a kupana wovon u Vuzavaguɗu
ɗa kpamu wi a kupana ka̱la̱ka̱tsu ka kagbashi ka̱ ni?
Ya'an a̱yi na wi a nwalu a̱ ka̱yimbi
babu kutashi,
u zuwaka kula ku Vuzavaguɗu katsura,
ka̱ta̱ kpamu u bonoko a̱miki a̱ ni u Ka̱shile ka̱ ni.
11 Ama la̱na̱i, a̱ɗa̱ ra̱ka̱ vu na i tsu tasuku akina,
ka̱ta̱ i zamaka ka̱ci ka̱ ɗa̱ nkuni n na mi a kulala n kutashi,
walai a̱ ubuta̱ u kutashi ka akina ku ɗa̱
koɓolo n kutashi ku nkuni ku na i zamai,
ili i na i kuciya̱ wa̱ va̱ i ɗa na.
Yi ta̱ a̱ kuyikpa̱ a̱ ka̱tsuma̱ ka atakaci a gbani-gbani.