51
Wishi u Sihiyona u na u kukpa̱ɗa̱ kukotso
1 <<Panakai mu, a̱ɗa̱ vu na yi a kuguva kasingai,
ɗa kpamu yi a̱ kula̱nsa̱ Vuzavaguɗu,
la̱na̱i a kakpanlai ka na e she'wei ɗa̱
koɓolo n ubuta̱ u ka̱ta̱mba̱ u na a̱ ga̱va̱i ɗa̱.
2 Indanai Ibirahi eshekpu a̱ ɗa̱,
koɓolo n Saratu a̱yi na u matsai ɗa̱.
A ayin a na n ɗekei ni wi m maku ba,
ama ɗa n zuwakai ni una̱singai ɗa n doku n zuwai kumaci ku ni ku yimkpai n ka̱bunda̱i.
3 Adama a na Vuzavaguɗu wi ta̱ e kuneke Sihiyona kadanshi ku uremi u ka̱ɗu
ka̱ta̱ kpamu wi indana agali a̱ ni ra̱ka̱ n asuvayali,
u bonoko kakamba ka̱ ni tsu Adini,
akamba a̱ ni o bono tsu kashina ka Vuzavaguɗu.
A̱ kuciya̱ ta̱ ma̱za̱nga̱ n izoshi wa̱ ni,
koɓolo n kucikpa ali n ishipa.
4 <<Panakai mu uma a̱ va̱,
ka̱ta̱ i zuwaka mu atsuvu, a̱ɗa̱ aduniyan a̱ va̱,
adama a na mi ta̱ e kuneke wila̱,
ka̱ta̱ n zuwa kasingai ka̱ va̱ ko okpo kutashi a̱ ubuta̱ u uma.
5 Usuɓi u va̱ wi ta̱ lo a kuyawa ɗevu m moloko,
wishi u va̱ wi ta̱ lo a uye a̱ kuta̱wa̱,
obolu a utsura a̱ va̱ i ta̱ a̱ kutuka̱ aduniyan n kasingai.
Aza a na i ida̱shi a ka̱kina̱ ka̱ mini i ta̱ e kukeɗe a̱pa̱'a̱ wa̱ va̱,
ka̱ta̱ kpamu a vana obolu a utsura a̱ va̱.
6 Ɗengusa̱i a̱shi a̱ ɗa̱ gaɗi zuva,
ka̱ta̱ yi inda ɗaka vi iɗika,
adama a na gaɗi wi ta̱ a̱ kupuwa̱nka̱ tsu ka̱nga̱,
ka̱ta̱ iɗika i shama tsu kakashi,
ka̱ta̱ aza a na i o kuyongo punu a̱ kuwa̱ tsa ayun.
Ama wi ishi u va̱ wi o kukotso ba,
usuɓi u va̱ feu wo kokpo uye ba.
7 <<Panakai mu, a̱ɗa̱ vu na i yevei kasingai,
a̱ɗa̱ aza na yi n wila̱ u va̱ a̱ a̱ɗu a̱ ɗa̱,
Ka̱ta̱ i pana wovon wu ujari u uma ba
ko wovon wi ishikushi i le ba.
8 Adama a na kayan ki ta̱ a kutakuma le tsu kuminya,
ka̱ta̱ okpoɗou o sovo le o okpo an tsugbere,
ama usuɓi u va̱ wi o kukotso ba,
wishi u va̱ feu wi ta̱ o kuyongo ko wannai.>>
9 Jimgba, jimgba, Vuzavaguɗu, ɗengusa̱ obolu a̱ nu n utsura,
ɗa̱nga̱ tsu ayin cau,
tsu na ili yi ishi n tsumani.
Avu ɗa vu gbatyai Rahapu miri-miri ba,
yayi u gbatyasai ka̱di ka nanlo ka?
10 Avu ɗa vu ɗekpetengi mala ma ba,
mini ma na mi n uga̱vi ka̱u,
yayi u ya'in uye punu a mala mu uga̱vi
adama a na aza a na a̱ ciya̱i ushibi a pasa punu?
11 Ka̱ta̱ aza a na a̱ ciya̱i wishi u Vuzavaguɗu o bono.
I ta̱ a ku'uwa a Sihiyona n ishipa,
ma̱za̱nga̱ ma babu kukotso mi ta̱ o kokpo le tso oroliko.
Uyo m ma̱ta̱na̱ mi ta̱ a̱ kuta̱wa̱ we le,
ka̱ta̱ una̱mgbuka̱tsuma̱ n unambi u ma̱za̱nga̱ u kotso.
12 <<Mpa ɗa vuza na n tsu dokusu wu ka̱ɗu utsura,
avu ɗa ya vu pana wovon u vuza na wi a̱ kukuwa̱,
umaci u vuma u na wi uya'in tsu mita̱?
13 Ali ɗa vu cinukpai n Vuzavaguɗu, Vuza na u ya'in nu,
a̱yi na u ba̱rukpa̱i gaɗi
ɗa kpamu u varai kumi ka aduniyan,
ɗa vi a kulya'a kelime n kupana wovon ali a kanna ka̱ɓa̱la̱
adama a wupa u vuza gbani-gbani,
vuza na u zuwai ɗe ka̱ci ka̱ ni a uye u na u kukuwa̱?
Ama te ɗai bi'i wupa u vuza gbani-gbani wa wi?
14 Aza a na i a kutakacika i ta̱ a kuya'an uba̱ruwi gogo'o,
i ta̱ a kuya'an ayin a̱ a̱bunda̱i n wuma
ka̱ta̱ kpamu a lya'a ilikulya i na a cikalai.
15 Adama a na mpa ɗa Vuzavaguɗu Ka̱shile ka̱ nu,
vuza na u tsu vura̱ mala ka̱ta̱ aɓau a̱ ni a̱ shida̱,
Vuzavaguɗu Mala'imili ɗa kula ku va̱.
16 Mpa n zuwa ta̱ kadanshi ka̱ va̱ punu a̱ una̱ u nu,
ɗa m palai nu n kululu ku kukiye ku va̱.
Mpa na n ya'in gaɗi
ɗa kpamu n varai kumi ka aduniyan,
a̱yi na u danai Sihiyona, <A̱ɗa̱ ɗa uma a̱ va̱.> >>
17 Jimgbai, jimgbai,
Ɗenga̱ kashani, avu Urushelima,
avu na vu so'i ɗe e kukiye ku Vuzavaguɗu,
moko ma wupa ma̱ ni,
avu na vu so'i ali vi tene'i
keɓeletsu ka na ka tsu zuwa uma ma maka le.
18 A̱ ka̱tsuma̱ ka limata i nu
babu vuza te vu na u buwai a na wa kinda wu,
muku n na vu wo'i dem
babu kpamu vuza te vu na u kuɓa̱na̱ yi kukiye a̱ ka̱tsuma̱ ke le
19 Ili i re i nampa ya i ta̱wa̱ ta̱ wa̱ nu,
yayi u kudokusu wu utsura u ka̱ɗu?
Kula̱nga̱su m munuka, n kambulu n kuvon,
yayi u kudokusu wu utsura u ka̱ɗu?
20 Muku n nu n lima̱ ta̱,
a vaku ta̱ a nsanji mu uye dem,
tsu mere'en ma na mazai a̱ bilili,
i ta̱ tukpa n wupa u Vuzavaguɗu,
n Uɓarangi u Ka̱shile ka̱ ɗa̱.
21 Adama a nannai pana ukuna u nampa, a̱ɗa̱ na i ci ya'an kagbanigbani,
yo okpoi oso'i ama ba kuso'o ku ma̱ra̱ ba.
22 Na ɗa ili i na Vuzavaguɗu Mala'imili u danai,
Ka̱shile ka̱ ɗa̱ ka na ko tsu folono adama a uma a̱ ni u danai,
<<La̱na̱, n takpa ta̱ ka'a ekiye a̱ nu
matan ma na ma tsu zuwa vo okpo adanshi ma̱ra̱ ma maka wu ta̱ va,
keɓeletsu ka wupa u va̱ ka na vi ishi
o kuso'o va ka buwa ba.
23 Mi ta̱ a kukucukpa ma zuwa matan ma e ekiye a aza a na i a kutakacika wu,
aza na a danai nu,
<Kuɗa̱ngu adama a na tsu wala gaɗi vu nu.>
Ɗa ta na vu zuwai kokondo ka̱ nu ci iɗika,
tsu uye adama a na uma a wala.>>