52
Vuzavaguɗu wi ta̱ a kisa Urushelima
1 Jimgba, jimgba, avu Sihiyona,
zuwa utsura,
uka ntogu n singai n nu,
avu Urushelima likuci i ciɗa.
Adama a na babu vuza na u kudoku wa̱ ta̱wa̱ wa̱ nu
babu ukiɗi u kavaja ko n unata.
2 Ka̱pa̱tsa̱ kubuta̱ ki ikyamba ku ɗa̱
ka̱ta̱ vu ɗa̱nga̱ vu da̱sa̱ngu, avu Urushelima,
Shikpa kawin ka na ki e kuɗeku ku nu,
avu Sihiyona kagbashi.
3 Adama a na i na Vuzavaguɗu u danai i ɗa na,
<<Gbani ɗa e dengei nu,
gbani ɗa kpamu a̱ kushiba̱ wu babu ikebe.>>
4 Na ɗa ili i na Vuzavaguɗu Ka̱shile ka danai,
<<N ugiti uma a̱ va̱ a bana ta̱ a Masar adama a na a̱ da̱sa̱ngu ɗe,
ɗa aza a Asiriya a̱ ta̱wa̱i a takacikai le gbani.
5 Ɗa Vuzavaguɗu we ecei <<Gogo na yiɗa̱i mi n i ɗa punu na>>?
Me enei a ɗikai uma a̱ va̱ gbani,
ɗa kpamu aza a na i a kulya'a tsugono we le
a̱ ka̱na̱i kuya'anka le ma̱ka̱n,>> u doku u danai,
<<Ɗa kpamu a̱ ka̱na̱i kugoyo kula ku va̱ a kanna dem.
6 Adama a nannai uma a̱ va̱ i ta̱ e kuyeve kula ku va̱.
Adama a nannai a kanna ka nanlo i ta̱ e kuyeve
a na mpa ɗa mi a kadanshi,
mayun, mpa ɗa na.>>
7 Indana bi'i tsu na wi n uga'in a gaɗi vu nsasan,
ene a aza a na i a̱ kuta̱wa̱ n arabali a singai,
aza a na a kusala arabali a̱ ma̱ta̱na̱.
U salai ukuna wu ulya'i
ɗa kpamu u salai ukuna u wishi,
a̱yi na u danai Sihiyona,
<<Ka̱shile ka̱ ɗa̱ mogono ma'a.>>
8 Panai, aza kindi a̱ nu a̱ ɗengusa̱ ta̱ a̱la̱ka̱tsu e le
koɓolo ɗa a ya'in ishipa i ma̱za̱nga̱.
Ayin a na baci Vuzavaguɗu u bonoi a Sihiyona,
i ta̱ e kene yi n a̱shi e le.
9 Ɓosongi ishipa i ma̱za̱nga̱ koɓolo,
a̱ɗa̱ agali a na i a Urushelima,
adama a na Vuzavaguɗu u neke ta̱ ɗe uma a̱ ni kadanshi ku udokushi wa̱ a̱ɗu,
a̱yi u shiba̱ ta̱ ɗe Urushelima.
10 Vuzavaguɗu wi ta̱ a̱ kuba̱rukpa̱ ekiye a ciɗa a̱ ni
e kelime ka̱ a̱shi a aduniyan dem,
ka̱ta̱ uteku wa aduniyan ra̱ka̱ we ene
wishi u Ka̱shile ka̱ tsu.
11 Lazai, lazai, uta̱i punu ɗe,
ka̱ta̱ i sa'wa ili yu unata ba,
uta̱i punu wa̱ ni ka̱ta̱ yo okpo ciɗa,
a̱ɗa̱ vu na i ɗikai ucanuku u Vuzavaguɗu.
12 Adama a na a̱ɗa̱ yi a̱ kuta̱ m moloko ba,
ko kpamu n ilaɗi ba,
adama na Vuzavaguɗu wi ta̱ a kuwala kelime ka̱ ɗa̱,
ka̱ta̱ Ka̱shile ki Isaraila ke geɓemgu ɗa̱ kucina̱.
13 La̱na̱i, kagbashi ka̱ va̱ ki ta̱ a kuya'an ulinga n ugboji,
wi ta̱ a̱ kuciya̱ ucikpi n tsugbayin tsu gbangam.
14 Ama tsu na uma n a̱bundei i a kuya'an mereve adama a̱ ni.
Wuti u ni tsu vuma u saba'a ta̱, u doku u yotso vuza kpamu ba,
vi o kudoku ve yeve yi a na vuma ɗa wi kpamu ba,
15 ta u kuzuwa uma a aduniyan n a̱bunda̱i a̱ rikpa̱ nannai,
ka̱ta̱ ngono m paɗa una̱ u le bini adama a̱ ni.
Adama a na ili i na ka̱ta̱ a sa'wai kudana le ba, i ta̱ e kene i ɗa,
i na kpamu a sa'wai kupana ba, e yeve i ɗa.