54
Tsugbayin tsu Urushelima tsu na ci kelime
1 Vuzavaguɗu u danai, <<Ya'an ishipa avu madari ma vuka,
avu na ka̱ta̱ vu sa'wai kumatsa maku ba,
ɓosongu vishipa ka̱ta̱ vu orukpo adama a̱ ma̱za̱nga̱,
avu na vu sa'wai a̱ga̱nda̱ a limata ba,
adama a na ka̱bunda̱i ka̱ muku n vuka vu na vi madari
ki ta̱ a kula'a ka vuka vu na vi n vali.>>
2 <<Doku ka̱ba̱nga̱ ka̱ ma̱va̱li ka̱ nu,
ba̱rukpa̱ akashi a̱ utsutsu o doku a ya'an wanshi.
Ka̱ta̱ vu shikpa̱ aguta a a ya'an utsura mayin,
vu dokusu awin a ya'an ugaɗi,
vu dokusu le utsura.
3 Adama a na vi ta̱ a̱ kuka̱ra̱'a̱ a̱ ubuta̱ dem usingai n ugula̱ feu,
ka̱ta̱ ntsukaya n nu n ka̱na̱ iɗika kakau
ali a̱ da̱sa̱ngu punu a̱ likuci i na yo okpoi ɗe agali.
4 <<Ka̱ta̱ vu pana wovon ba, vi a kuya'an feu wono ba.
Ka̱ta̱ vu pana wovon ba, babu ili i wono i na i kuta̱wa̱ wu kpamu.
Vo kudoku va ciɓa n ili i wono i na vi ya'ansai a ayin a na vi ka̱ɗa̱nga̱ni ba,
koɓolo n una̱mgbuka̱tsuma̱ u na kpamu vi ishi n u ɗa a ayin a na vi ishi babu vali.
5 Adama a na Vuza na u ya'in nu a̱yi ɗa vali nu,
kula ku ni ku ɗa Vuzavaguɗu Mala'imili.
Vuza Ciɗa vi Isaraila a̱yi ɗa u shiba̱i nu,
a̱yi ɗa e ci ɗeke Ka̱shile ka aduniyan ra̱ka̱.
6 Vuzavaguɗu wi ta̱ e kuɗeke wu u bonoko,
tsu vuka vu na o lokoi ɗa a̱ ka̱sukpa̱i ni n una̱mgbuka̱tsuma̱
tsu vuka vu na vali vi ni vu lokoi,
a ayin o yolo i savu i ni,>>
7 <<M megeshe kenu n loko wu ta̱,
ama n asuvayali a gbayin mi ta̱ o kubonoko wu.
8 Vuzavaguɗu Ka̱shibi ka̱ ɗa̱ u danai,
a̱ ka̱tsuma̱ ka wupa wa̱ a̱bunda̱i ɗa m paɗai bini ali megeshe kenu,
ama n ucigi u babu kukotso
mi ta̱ a kupana asuvayali a̱ nu.>> Vuzavaguɗu ɗa u dansai vuza na u shiba̱i ɗa̱.
9 <<N tsu va̱ na wi ta̱ derere n tsu ayin a̱ Nufu,
ana n kucinai n danai, mini ma ayin a̱ Nufu mi o kudoku kupala aduniyan ba.
Adama a nannai gogo na n kucina ta̱ mi o kudoku kuya'an wupa n avu ba,
mi kpamu o kudoku kudansaka wu ba.
10 Ko nsansa m puwa̱nka̱
ka̱ta̱ kpamu aginda a̱ muɗa̱,
ama ucigi u gbangam u va̱ wi o kukotso wa̱ nu ba,
uzuwakpani u ma̱ta̱na̱ u va̱ vuza wa kutakpa u ɗa ba,>>
Vuzavaguɗu vu na wi a kupana asuvayali a̱ nu u danai.
11 Vuzavaguɗu u danai, <<Avu Urushelima, likuci i na yi o kuso'o atakaci n wunla̱i u mini ma atali, babu vuza na u kuya'anka wu kadanshi ku uremi u ka̱ɗu,
mi ta̱ a kuvarasaka kuma'a ku nu n atali a singai.
12 Mi ta̱ a kuma'a nshilya n nu n atali a langu-langu,
utsutsu u nu kpamu n atali a na i tsa̱ a̱ta̱mba̱,
nshilya m kpa'a kpamu n atali a na o yotsoi yaza.
13 Vuzavaguɗu wi ta̱ a kuya'anka muku n nu ra̱ka̱ kuyotsongusu,
ma̱ta̱na̱ ma gbayin mi ta̱ a̱ kuta̱wa̱ u muku n nu.
14 N kasingai koɓolo n ka mayun ɗa vo ku yonko,
ka̱ta̱ kpamu kawuya ka ya'an da'angi n avu,
vi a kupana wovon wi ili ba,
i ta̱ a kutakpa ka kagbanigbani a banka da'angi,
ki a kuyawa ɗevu n avu ba.
15 Vuza na baci u kumbai nu n vishili, na lo kusheshe ku va̱ ku ɗa ba,
vuza na baci u kumbai nu wi ta̱ o kubono wo kokpo n wono.
16 <<La̱na̱, Mpa ɗa vuza na n ya'in kawakana
ka na ka̱ tsu fa̱la̱ akina ali a tasa,
ka̱ta̱ u yuma ucanuku u munuka adama a ulinga u le.
Mpa ɗa kpamu vuza na u ya'in ka̱la̱nga̱shi adama a na u la̱nga̱sa̱,
17 Vuzavaguɗu u danai, babu ucanuku u munuka u na a kuya'an adama a̱ ɗa̱ ka̱ta̱ u ɗa u lya'a ɗa̱,
ka̱ta̱ kpamu i ɓa̱ya̱ngu kelentsu dem ka na ka kubanka ɗa̱ nu nsata.
Na va ɗaɗa agadu a kagbashi ka Vuzavaguɗu,
ɗaɗa kpamu wishi u na wu uta̱i wa̱ va̱.>>