55
Ubaniki u Vuzavaguɗu adama a̱ wishi
1 <<Ta̱wa̱i, yaba dem vu na wi a kupana kakuli,
ta̱wa̱i a̱ ubuta̱ u mini,
vuza na baci de dem wi n ikebe ba,
u ta̱wa̱, u tsula ili ka̱ta̱ u lya'a.
Ta̱wa̱i, i gasa ma̱kya̱n m mani
babu ikebe ko babu katsupu.
2 Yiɗa̱i i zuwai ɗa i la̱nga̱sa̱i ikebe i ɗa̱ a̱ ubuta̱ wi ili i na yi ilikulya ba,
adama a̱ yiɗa̱i yi a̱ kula̱nga̱sa̱ ikebe i katsupu i ɗa̱ a̱ ubuta̱ wi ili i na yi a̱ kuciya̱ punu ili ba?
Panakai mu mayin, lya'i ili i singai,
ka̱ta̱ i ɓa̱nka̱ wuma u ɗa̱ n ilikulya'a i singai.
3 Zuwakai mu atsuvu ka̱ta̱ i ta̱wa̱ wa̱ va̱,
panakai mu, adama a na wuma u ɗa̱ u yongo lo.
Mi ta̱ a kuya'an uzuwakpani n a̱ɗa̱ u na u kukpa̱ɗa̱ kukotso,
mi ta̱ e kuneke ɗa̱ ucigi u mayun u na u tsu kpa̱ɗa̱ kukotso tsu na n ya'ankai Dawuda.
4 La̱na̱i, n zuwa yi ta̱ wo okpo maga'an a̱ ubuta̱ u uma,
vuzagbayin n kovonshi ka uma.
5 Mayun yi ta̱ e kuɗeke uma a̱ likuci kakau i na i yevei ba,
ka̱ta̱ likuci i na i yevei ɗa̱ ba i suma a̱ kuta̱wa̱ wa̱ ɗa̱,
adama a Vuzavaguɗu Ka̱shile ka̱ ɗa̱,
n Vuza Ciɗa va aza a Isaraila,
adama a na a̱yi ɗa u nekei ɗa̱ tsugbayin.>>
6 La̱nsa̱i Vuzavaguɗu a ayin a na wi kuciya̱,
ɗekei ni a makyan ma na wi ɗevu.
7 Ya'an vuza gbani-gbani u ka̱sukpa̱ uye u gbani-gbani u ni,
ka̱ta̱ vuza na u kpa̱ɗa̱i kusuɓa̱ u ka̱sukpa̱ feu kusheshe ku ni,
ya'an u bono u tono Vuzavaguɗu adama a na u pana asuvayali a̱ ni,
n Ka̱shile ka̱ tsu, a̱yi na u kucinukpaka le unushi u le ba̱ri.
8 Vuzavaguɗu u danai,
<<Adama a na kusheshe ku va̱ ku ɗaɗa kusheshe ku ɗa̱ ba, nwalu n ɗa̱ n ɗaɗa nwalu n va̱ ba.>>
9 <<Uteku tsu na gaɗi wi da'angi n iɗika,
ta feu nwalu n va̱ mi da'angi nu nwalu n ɗa̱ nannai,
kusheshe ku va̱ kpamu ku la'a ta̱ kusheshe ku ɗa̱.
10 Tsu na mini ma zuva n kuta̱nu ku minimatali
a̱ tsu uta̱ gaɗi,
ka̱ta̱ kpamu a̱ kpa̱ɗa̱ kubono ɗe
sai a̱ ta̱na̱ta̱ngu iɗika ali i ɗa i ta̱na̱ ka̱ta̱ i shama,
nannai aza a̱ vica̱'a̱ a̱ kuciya̱ kuca̱'a̱,
ka̱ta̱ aza a na a kulya'a ilikulya a̱ ciya̱ a lya'a,
11 Ta feu kadanshi ka na ka̱ tsu uta̱ una̱ u va̱ ki nannai,
ka ki o kubono wa̱ va̱ ekiye a agaɗa ba,
ama ki ta̱ a kushatangu i na n sheshei kuya'an,
ka̱ta̱ kpamu ka fuɗa ka ya'an i na n su'uki ni.
12 Yi ta̱ a̱ kuta̱ m ma̱za̱nga̱
ka̱ta̱ kpamu o tono n a̱ɗa̱ m ma̱ta̱na̱,
nsasan koɓolo n aginda
i ta̱ o kuɓosongu ishipa a kubana wa̱ nu,
ka̱ta̱ nɗanga n kakamba ra̱ka̱
m ɓasa ekiye e le.
13 Ubuta̱ u na wi ishi a kumatsasa awana wi ta̱ o kubono wa matsa mambulu,
ka̱ta̱ kpamu ubuta̱ u na wi ishi u tsu matsa mataci u bono matsa igeɓetsu. U ɗa wi ta̱ a kuya'an kula adama a Vuzavaguɗu,
n urotu u na u kuyongo ko wannai,
u na wi kula̱nga̱sa̱ ba.>>