56
Una̱singai a kubana u uma dem
1 Na ɗa ili i na Vuzavaguɗu u danai,
<<Ya'in kasingai
ka̱ta̱ kpamu i ya'an ili i na yi derere,
adama a na wishi u va̱ u yawa ta̱ ɗevu,
ka̱ta̱ ukuna u wishi u va̱ kpamu wu uta̱ e keteshe.
2 Una̱singai u ɗa a kubana u vuza na u ci ya'an ili i nampa,
a̱yi na u tsu reme i ɗa n ugbami,
vuza na u ci ya'an ugulani n kanna ka Ashibi ba,
ka̱ta̱ kpamu u takpa ekiye a̱ ni a̱ ubuta̱ u kuya'an ki ili i gbani-gbani.>>
3 Ka̱ta̱ komoci ka na ki o kutono Vuzavaguɗu ka dansa tsu nampa ba,
<<Mayu Vuzavaguɗu wi ta̱ e kupece mu n uma a̱ ni.>>
Ka̱ta̱ kpamu madari ma vali ma̱ kpa̱ɗa̱ kudana,
<<Mpa maɗanga me ɗeku koci.>>
4 Na ɗa ili i na Vuzavaguɗu u danai.
<<A kubana u madari ma vali, a̱yi na wi a̱ kula̱na̱ kanna ka Ashibi ka̱ va̱ mayin,
a̱yi na u tsu zagba i na i ci ya'anka mu uyo
ka̱ta̱ kpamu u ɓa̱na̱ uzuwakpani u va̱ derere,
5 Mi ta̱ e kuneke le kula punu a kpa'a ku va̱
ka̱ta̱ ku ɗa kokpo ili i kuciɓasa a̱ ubuta̱ u uma a̱ va̱
ku na ku la'i ku muku n ali m muku ma̱ a̱ma̱ci,
mi ta̱ e kuneke le kula ku kowannai
ku na ki o kukotso ba.
6 Omoci a na o bonokoi a̱ɗu e le a̱ ubuta̱ u Vuzavaguɗu,
adama a na a ya'anka yi ulinga,
a ciga kpamu kula ku Vuzavaguɗu,
ɗa kpamu a cikpai ni,
vuza na de dem wi a̱ kuɓa̱na̱ kanna ka Ashibi mayin, ɗa kpamu o kugoyo a ɗa ba,
ɗa kpamu wi e kureme uzuwakpani u va̱ n utsura,
7 ele ɗa n kubanka a kusan ku ciɗa ku va̱,
ka̱ta̱ kpamu n zuwa le a ya'an ma̱za̱nga̱ a kpa'a ka avasa ku va̱.
Kune'e ku kusongu ku le koɓolo n alyuka e le
i ta̱ a̱ kuciya̱ wishi a katalikalyuka ka̱ va̱,
adama a na kpa'a ku va̱ uma ra̱ka̱ i ta̱ e kuɗeke ku ɗa
kpa'a ka avasa ku uma ra̱ka̱.>>
8 Vuzavaguɗu Mala'imili,
vuza na u ɓolongi aza a ugbashi a Isaraila u danai,
<<Mi ta̱ o kudoku mo ɓolonku le uma o yoku
kau n aza a na m ɓolongi ɗe.>>
Nsata n Ka̱shile a kubana wa aza a kawuya
9 Ta̱wa̱i ra̱ka̱ a̱ɗa̱ nnama n kakamba,
ta̱wa̱i ra̱ka̱ a̱ɗa̱ nnama n kutsun. Ta̱wa̱i i kpa̱ta̱ra̱ uma a̱ va̱.
10 Aza a kindi a Isaraila a̱yimba̱ a ɗa,
ra̱ka̱ vi le i n kuyeve ba,
nshe'e n ka̱bini n ɗa i,
a ci ya'an wali ba,
o ci yongo ta̱ ucigi wa alavu ka̱u,
sai alatani a ɗa o ci yongo a kuya'an.
11 Ele nshe'e n ɗa n na mi n kutsa̱n ka̱u,
ili i ci yawa le ba.
Ele nguɓi n ɗa n na mi n unambi u kuyeve,
yaba dem vu le u ɓatsai a uye u ni,
yaba dem vu le a̱ kula̱nsa̱ i na i ku'uwa yi.
12 Yaba dem u danai, <<Ta̱wa̱i, ya'an ci ciya̱ ma̱ra̱,
ya'an kpamu tsu so'o ka̱ta̱ ma maka tsu.
Ka̱ta̱ kpamu mkpa tsu doku ci ya'an nannai ali
u la'a tsu nanlo.>>