59
Unushi, kushika̱ ku unushi n ushibi
1 Panai, kukiye ku Vuzavaguɗu ku gusa̱ ali ku ɗa kukpa̱ɗa̱ kisa ɗa̱ ba,
ko kutsuvu ku ni ku gulana ali u kpa̱ɗa̱ kufuɗa kupana ba.
2 Ama unushi u ɗa̱
u pece ɗa̱ ta̱ n Ka̱shile ka̱ ɗa̱,
ukuna u wuya u ɗa̱ u ɗa u zuwai u sheɗeki n a̱shi a̱ ni
adama a na u kpa̱ɗa̱ kupanaka ɗa̱.
3 Adama a na ekiye a̱ ɗa̱ a̱ na̱mgba̱ ta̱ nu mpasa m munuka,
a̱jivu a̱ ɗa̱ kpamu a shana ta̱ tukpa n unushi.
Una̱ u ɗa̱ u dansa ta̱ a'uwa,
elentsu a̱ ɗa̱ kpamu a dansa ta̱ kadanshi ka wuya.
4 Babu vuza na u cigai afada a mayun,
babu kpamu vuza na u folonoi a ya'anka yi afada a singai.
A zuwai katsura ke le a̱ ubuta̱ u kadanshi ka a'uwa,
e sheshei ukuna u gbani-gbani u ɗaɗa u bonoi u vazai kawuya.
5 A tsu gya'wan ta̱ oko a gbani-gbani
ka̱ta̱ kpamu a ca'a tsugbere tsu kanata.
Vuza na baci de dem u takumai okowo a̱ ni wi ta̱ a̱ kukuwa̱,
kokowo ka na baci de dem ko ɓosoi, koko ka'a ki a̱ kuta̱.
6 Tsu na tsunata ci le ci a kufuɗa kuca'a kuminya ba,
ta feu nannai i a kufuɗa kupala ka̱ci ke le ni ili i na a ya'in ba.
Ulinga u le ra̱ka̱ wi ta̱ tukpa n kawuya,
ibori i vishili i ɗaɗa le ili i kuya'an.
7 A ci ya'an ta̱ moloko a̱ ubuta̱ u kuya'an ku unushi,
koɓolo m moloko mu ubuta̱ u kuna aza a na i babu unushi.
Ukuna wu unushi u ɗa o ci yongo e kusheshe koci,
asuvu awuya n vishili ɗaɗa ili i na o ci yonko.
8 E yeve uye u ma̱ta̱na̱ ba,
ko tsu na o kuyongo n uga'in ba.
O bonokoi uye u le uye wa atakaci,
babu kpamu vuza na wi a kuwala a uye u le ɗa u yevei ili i na e ci ɗeke ma̱ta̱na̱.
9 Ci m ma̱ta̱na̱ a̱ ubuta̱ u tsu ba,
usuɓi feu wi punu a̱ a̱ɗu a̱ tsu ba.
Tsu la̱nsa̱i kutashi, ama kucikpa ce enei ka̱yimbi.
Tsu la̱nsa̱i wakani na ɗe gaɗi, ama ɗa tsu kucukpai tsu walai a̱ ka̱ta̱m.
10 Ci yongoi a kupapa tsusaki tsu ka̱yimba̱,
a̱ kula̱nsa̱ uye tsu uma a na i n a̱shi ba.
N kanna e keteshe ci yongoi a̱ kuta̱ɗa̱tsa̱sa̱ adanshi ka̱yimbi ka'a ki lo,
a̱ ka̱tsuma̱ ka aza a utsura ɗa tso okpoi a na a̱kpisa̱.
11 Ci yongoi a̱ yura̱ dem vu tsu tsa anama,
tsu ka̱na̱i ma̱shi tsu moɗoi.
Tsu la̱nsa̱ ta̱ afada a singai, ama ci ciya̱ ba,
tsu la̱nsa̱i kpamu wishi ama ci ciya̱ u ɗa ba.
12 Adama a na unushi u tsu u ya'an ta̱ a̱bunda̱i wa̱ nu,
unushi wa kpamu wu uta̱ka̱ tsu ta̱ e keteshe.
Unushi u tsu wi ta̱ punu koɓolo n a̱ tsu,
a̱ tsu ta na feu ci uyevi n u ɗa,
13 Ci yeve ta̱ a na ci ya'in ugbamukaci ɗa tsu nanai Vuzavaguɗu.
Tsu zuwakai Ka̱shile ka̱ tsu kucina̱,
ci yeve ta̱ tsu na tsu kpa̱ɗa̱i kuya'an i na yi derere,
a kudansa a'uwa a na i tukpa a̱ a̱ɗu a̱ tsu.
14 Kasingai ka̱ kpa̱ɗa̱i kudoku kuya'an ulinga,
ɗa tsu zuwai usuɓi u shamgbai da'angi n a̱ tsu,
ukuna u mayun u buwa kuciya̱ a̱ ubuta̱ u uma ba,
ama a̱ tsu ci iwain kuya'an ka mayun.
15 Ukuna u mayun u buwa kuciya̱ ba,
vuza na baci u iwain kawuya i ta̱ a̱ kugba̱da̱la̱ngu yi.
Vuzavaguɗu u la̱na̱i ɗa u kpa̱ɗa̱i kupana uyo
an kasingai ko kotsoi.
16 Ɗa we enei babu vuza na u buwai lo
a na wa uwa e mere ko u ɓa̱nka̱ aza a na i o kuso'o atakaci.
Ɗa a̱yi a̱ ka̱ci ka̱ ni u uwai adama a na wi isa le n kukiye ku utsura ku ni,
ɗa ta na ukuna u singai u ni u tonoi n a̱yi.
17 U ukai usuɓi wo okpoi ni an ma̱ra̱ga̱ mi ikyamba,
m ma̱kun ma̱ wishi a kaci ka̱ ni,
u ukai ka̱ci ka̱ ni motogu ma na u kutsupaka,
ɗa kpamu u lapangi mali ma kuya'an ili i singai tsu kalaba.
18 Derere uteku wi ili,
nannai ɗa u kutsupa irala i ni
n wupa u gbayin koɓolo n kawuya dem,
wi ta̱ kpamu a kutsupa aza a na i a iɗika yo otogu i na a ya'in.
19 Ili i na i ɗikai a̱ ka̱livi, uma i ta̱ a kupana wovon u kula ku Vuzavaguɗu,
ka̱ta̱ ili i na i ɗikai a kasana a̱ gita̱ kupana wovon u tsugbayin.
Adama na a̱yi wi ta̱ a̱ kuta̱wa̱ tsu kuɗolu ku na ki e kuyene n utsura,
ku na wunla̱i u Vuzavaguɗu wi a̱ kuvula̱ ka̱u.
20 Vuzavaguɗu u danai, <<Ka̱shibi ka ki ta̱ a̱ kucipa̱ a Sihiyona,
wa aza a Yakubu ele na a̱ shika̱i unushi u le.>>
21 Vuzavaguɗu u danai <<Na ɗa uzuwakpani u va̱ n ele, n neke ɗa̱ ta̱ ayinviki a̱ va̱, n kadanshi ka̱ va̱, ka̱ta̱ kadanshi ka nanlo ka̱ ka̱sukpa̱ una̱ u ɗa̱, m muku n ɗa̱, ko una̱ wu ntsukaya n ɗa̱ ba. Na uzuwakpani u ɗa u gogo na ali a kubana uteku.>>