60
Tsugbayin tsu Urushelima tsu na ci kelime.
1 <<Ɗenga̱, ka̱ta̱ vu akana adama a na kutashi ku nu ku yawa ta̱,
tsugbayin tsu Vuzavaguɗu ci cipa̱ ta̱ wa̱ nu.
2 La̱nuku, ka̱yimbi ka pala ta̱ aduniyan ra̱ka̱,
ɗa ka̱yimbi ka gbangam ka palai uma,
ama wa̱ nu u ɗa kutashi ku Vuzavaguɗu ki a kakana,
tsugbayin ci ni tsu ta̱wa̱ wa̱ nu.
3 Aduniyan dem i ta̱ a̱ kuta̱wa̱ a̱ ubuta̱ u kutashi ku nu,
ngono tamkpamu i ta̱ a̱ kuta̱wa̱ a̱ ubuta̱ u kutashi ku usana ku nu.
4 <<Ɗengusa̱ a̱shi a̱ nu vu ka̱ra̱ka̱ a̱ ubuta̱ dem,
ka̱ta̱ ye ene tsu na o ɓolongi a̱ ubuta̱ u te, ɗa a̱ ta̱wa̱i wa̱ nu,
muku n ɗa̱ mi ta̱ a̱ kuta̱ da'angi,
ɗa a̱ ka̱na̱i nkere n nu e ekiye.
5 A̱shi a̱ nu i ta̱ e kene ka̱ta̱ a tasa,
ka̱ɗu ka̱ nu ki ta̱ a kushana ka̱ta̱ ka shita adama a̱ ma̱za̱nga̱,
uciyi u na wi a mala i ta̱ a̱ kutuka̱ u ɗa wa̱ nu,
wa̱ nu u ɗa uciyi wa aduniyan ra̱ka̱ u kubono.
6 Ka̱bunda̱i ka arakuma ki ta̱ a kupala wu,
arakuma a wawa'a a Midiya koɓolo n Ifa,
aza na i a Sheba ra̱ka̱ i ta̱ a̱ kuta̱wa̱,
ucaniki n azanariya koɓolo n ili i ma̱gula̱ni,
n a salai ukuna u kucikpa Vuzavaguɗu.
7 Ushiga wi ilikuzuwa ya aza a Kida i ta̱ o kuɓolongu u ɗa wa̱ nu,
a̱giri a aza a Nebatu i ta̱ a kuya'anka wu ulinga,
i ta̱ a kisa a ɗa ci ili i kune'e a katalikalyuka ka̱ va̱,
ka̱ta̱ kpamu n lapulaka kpa'a ku singai ku va̱.
8 <<Anan yayi a imkpai gaɗi tsa eleshu tsa,
tsu moɗoi a kubana a̱ ubuta̱ u cikinda u le?
9 Mayun aza o kotogu i ta̱ a kuzuwa a̱pa̱'a̱ e le wa̱ va̱,
antsu a aza a Tarishi a ɗa o kokpo aza a ugiti,
a̱ kutuka̱ muku n ɗa̱ na ɗe da'angi,
koɓolo n azurufa n azanariya e le,
adama a kucikpa kula ku Vuzavaguɗu Ka̱shile ka̱ ɗa̱,
n Vuza Ciɗa va aza a Isaraila,
adama a na a̱yi ɗa u zuwai nu vo okpo n tsuloboi.
10 <<Omoci i ta̱ a kuma'asaka ɗa̱ nshilya n ɗa̱,
ka̱ta̱ ngono n le mo okpo aza a na a kuya'anka ɗa̱ tsugbashi,
ko a na wi n wupa u ɗa n lapai ɗa̱,
ama n ucigi u ɗa n kuyotsongu ɗa̱ asuvayali a̱ va̱.
11 Utsutsu u ɗa̱ wi ta̱ o kuyongo uɓa̱yuwi ayin tutu,
a̱ kuɓa̱ya̱ngu u ɗa ba kanna n kayin dem,
adama a na uma a̱ tuka̱ wu n uciyi wa aduniyan dem,
n ngono n le a kuwalaka le kelime udari a̱ kuta̱wa̱ wa̱ nu.
12 Adama a na iɗika ko tsugono tsu na tsu tonoi nu ba, ci ta̱ a̱ kukuwa̱,
i ta̱ o kubonoko i ɗa agali ra̱ka̱-ra̱ka̱.
13 <<Tsugbayin tsa aza a Lebano ci ta̱ a̱ kuta̱wa̱ wa̱ nu,
koɓolo nu nɗanga n singai sipirus n firi, n pini dem,
adama a na n lapulaka ubuta̱ u ma̱va̱li ma̱ va̱,
ka̱ta̱ kpamu n neke ubuta̱ u kuzuwa adasukpatsu a̱ va̱ tsugbayin.
14 Muku ma aza a na a takacikai ɗa̱ mi ta̱ a̱ kuta̱wa̱ ka̱ta̱ a̱ kuɗa̱nku ɗa̱,
aza a na o goyoi ɗa̱ dem i ta̱ a̱ kuta̱wa̱ ka̱ta̱ a̱ kuɗa̱ngu a idasakpatsu i ɗa̱,
ka̱ta̱ e ɗeke ɗa̱ likuci i Vuzavaguɗu,
Sihiyona vu ciɗa va aza a Isaraila.
15 <<Ko an wi ishi a iwain nu ɗa a̱ ka̱sukpa̱ nu,
ali babu vuza te vu na u kuwala punu a̱ ubuta̱ u nu,
mi ta̱ o kubonoko wu ili ya̱ a̱ra̱ɗi i na i kukotso ba,
koɓolo m ma̱za̱nga̱ ma babu uteku.
16 Yi ta̱ a kupana uyo wi uciyi wa aduniyan,
ka̱ta̱ a lyatangu ɗa̱ n ilikulya yi ngono.
Nannai ɗa i kuyeve a na Mpa ɗa Vuzavaguɗu, Kishi ka̱ ɗa̱
n Ka̱shibi ka̱ ɗa̱, Vuzagbayin va aza a Isaraila.
17 A na me neke ɗa̱ viyum vi shili ya'an n kucukpa n neke ɗa̱ azurufa,
n azanariya o okpo una̱ u vuyum.
Ka̱ta̱ n neke ɗa̱ viyum vi shili a̱ una̱ wu nɗanga,
vuyum tamkpamu vo okpo una̱ wa atali.
Ka̱ta̱ n zuwa ma̱ta̱na̱ mo okpo vuzagbayin vu ɗa̱,
usuɓi tamkpamu wo okpo mogono ma̱ ɗa̱.
18 Ibori i vishili yo kudoku ya ya'an a iɗika i nu ba,
babu kula̱nga̱su ko moɓosu mu ubuta̱ a uteku wi iɗika i ɗa̱,
ama yi ta̱ e kuɗeke nshilya n ɗa̱ nshilya mu wishi,
i ɗeke utsutsu u ɗa̱ kpamu ucikpi.
19 Kanna ki o kudoku kuneke ɗa̱ kutashi n kanna ba,
ko kutashi ku wotoi ku akana ɗa̱,
adama a na Vuzavaguɗu wi ta̱ kokpo kutashi ku ɗa̱ ku na ko kukotso ba,
ka̱ta̱ Ka̱shile ka̱ ɗa̱ kpamu kokpo tsugbayin tsu ɗa̱.
20 Kanna ka̱ ɗa̱ ko kudoku kuta̱ ba,
ka̱ta̱ wotoi feu u kpa̱ɗa̱ kuta̱,
Vuzavaguɗu wi ta̱ o kokpo kutashi ku ɗa̱ ku ko wannai,
ka̱ta̱ ayin a̱ una̱mgbuka̱tsuma̱ a̱ ɗa̱ a zuwa uteku.
21 Ka̱ta̱ uma a̱ nu dem o bono a̱ suɓa̱,
ka̱ta̱ a̱ ka̱na̱ iɗika ya ali a kubana uteku n uteku.
Ele ɗa utopi u na n ca̱'i,
n ulinga we ekiye a̱ va̱,
adama a na n ciya̱ ucikpi.
22 Kpa'a ku na ku la'i n kenu a̱ ka̱tsuma̱ ka̱ ɗa̱ ku ɗa ko kokpo ku gbayin,
iɗika i kenu moco yo okpo aduniyan a̱ a̱bunda̱i,
Mpa ɗa Vuzavaguɗu,
makyan ma yawa baci mi ta̱ a kuzuwa i ɗa i ya'an.>>