65
Afada n Wishi
1 <<Mu uta̱ka̱i ka̱ci ka̱ va̱ wa aza a na e ecei mu ba,
Mpa mu uta̱i e keteshe wa aza a na a̱ la̱nsa̱i mu ba.
M banai a̱ likuci i na i ɗekei kula ku va̱ ba,
n danai, <Mpa ɗa na, mpa ɗa na.>
2 Mo oɓongi ekiye a̱ va̱ a kanna gbaga
adama a aza a ugbamukaci,
aza a na i a kuya'an ukuna u na u ga'in ba,
a̱ kula̱nsa̱ka̱ ka̱ci ke le i na i kuyokpo le,
3 Uma a na a tsu shika mu
a̱shi n a̱shi ayin dem,
a kuya'ansa alyuka a ashina
koɓolo n kusongu ili i ma̱gula̱ni a atalyalyuka a na a ma'i n iputa̱,
4 ele na a̱ tsu da̱sa̱ngu a̱ ubuta̱ wa asaun
ka̱ta̱ kpamu a una kayin gbaga a̱ ubuta̱ u na a kucikpa a̱ma̱li o yoku,
ele na a tsu takuma inyama yi ngurusunu,
ele na mgbodo n le n ci yongo n inyama i na yi ni nshinda̱.
5 Ele na a tsu dana, <Ɗenga̱ lo, ka̱ta̱ vi yawa ɗevu nu mpa ba,
adama a na uga'in u ka̱ɗu u va̱ u la'a ta̱ utsura u nu.
Uma a nanlo i ta̱ an ka̱nga̱ a̱ vunu vu va̱,
a zuwai wupa u va̱ a̱ kukula̱ tsa akina a na a̱ tsu kula̱ a kanna gbaga.
6 <<Indanai, ɗa na uɗani kelime ka̱ va̱,
mi a kupaɗa bini ba, ama mi ta̱ a kutsupa derere,
mi ta̱ a kutsupa i ɗa tsu na u ga'in a ya'anka le,
7 unushi u nu koɓolo n unushi wi isheku i nu,>>
Vuzavaguɗu u danai, <<Adama a na o songu ta̱ alyuka a nsasan
ɗa kpamu a ukai mu nshinda̱ a aginda,
mi ta̱ a kugisanku a̱ nkuta̱ n le
katsupu ka derere adama a ili i na a ya'in cau va ɗe.>>
8 Ili i na Vuzavaguɗu u danai i ɗaɗa na,
<<Ci ili i kuso'o i na ka̱ta̱ a pishai a umaci u ni ba,
ɗa uma a danai, <Ka̱ta̱ i la̱nga̱sa̱ u ɗa ba,
ka̱ta̱ u kotso kuge'we ba,>
ta n kuya'an n agbashi a̱ va̱ nannai,
n kuna le ra̱ka̱ ba.
9 Mi ta̱ a̱ kutuka̱ nu ntsukaya mu ugboku u na̱shi u Yakubu,
n aza o yoku kpamu a Yahuda ele na a̱ kuka̱na̱ uɓon wu nsasan wo okpo u le,
uma a̱ va̱ a na n zagbai a̱ kuka̱na̱ ta̱ u ɗa wo okpo u le,
ta ɗe agbashi a̱ va̱ o kuyongo.
10 Ka̱ra̱ ka Sharon ki ta̱ o kokpo ubuta̱ u kalina wi nkyon,
ka̱ta̱ Ka̱ra̱ ka Ako kokpo tamkpamu ubuta̱ u kuvuka wa anaka
a uma a̱ va̱ a na a̱ la̱nsa̱i mu.
11 <<Ama a̱ɗa̱ na i ka̱sukpa̱i Vuzavaguɗu
ɗa kpamu i cinukpai nu nsasan n ciɗa n ni,
aza a na e nekei alyuka a ilikulya u ka̱ma̱li ka Gadu, a̱yi na u tsu tuka̱ m ma̱ta̱na̱
ɗa kpamu a shatangi nko m ma̱ra̱ kakau ma na a satarai ɗa e nekei ka̱ma̱li ka na e ci ɗeke Uzuwi.
12 N ya'anka wu ta̱ ɗe uzuwi u na va kubana ukpa̱ u kotokobi,
ra̱ka̱ vu ɗa̱ yi ta̱ a kuya'an ukiɗi,
adama a na n ɗeke ta̱ ama yu ushuku ba,
n ya'in kadanshi ama i pana ba.
I ya'in ili i gbani-gbani a̱ a̱shi a̱ va̱,
ɗa kpamu i zagbai i na i kukpa̱ɗa̱ kuneke mu ma̱za̱nga̱.>>
13 Adama a nannai ili i na Vuzavaguɗu Uba̱nga̱ri u danai i ɗaɗa na,
<<Agbashi a̱ va̱ i ta̱ a kulya'a ilikulya,
ama a̱ɗa̱ yi ta̱ o kuyongo n kambulu,
agbashi a̱ va̱ i ta̱ o kuso'o,
ama a̱ɗa̱ yi ta̱ o kuyongo n kakuli,
agbashi a̱ va̱ i ta̱ o kuyongo m ma̱za̱nga̱,
ama a̱ɗa̱ yi ta̱ o kokpo n wono.
14 Agbashi a̱ va̱ i ta̱ a kucanana ishipa
adama a̱ ma̱za̱nga̱,
ama a̱ɗa̱ yi ta̱ a̱ kushika̱
adama a una̱mgbuka̱tsuma̱
ma na ma̱ kula̱nga̱sa̱ ɗa̱ a̱ɗu.
15 Mpa Vuzavaguɗu n danai,
uma a na n zagbai i ta̱ a kuya'an ulinga n ula̱ a̱ ɗa̱ wo okpo le tsu una̱ u wuya,
Vuzavaguɗu Uba̱nga̱ri wi ta̱ a kuna ɗa̱,
ama wi ta̱ e kuneke uma a̱ ni ula a savu.
16 Vuza na baci de dem a iɗika ya u ciɓalai una̱singai
wi ta̱ a kuya'an nannai n kula ku Ka̱shile ka mayun,
vuza na baci u ya'in akucina punu a iɗika ya
wi ta̱ kpamu a kukucina n kula ku Ka̱shile ka mayun.
Adama a na mi ta̱ a kuzuwa wupa u va̱ paki ka̱ta̱ n cinukpa n u ɗa
ka̱ta̱ kpamu n sheɗeku n a̱shi a̱ va̱ wa̱ ni.
Gaɗi vu savu n iɗika i savu
17 <<Indanai, mi ta̱ a kuya'an
gaɗi vu savu n iɗika i savu.
Ili i cau i kuya'an kpamu uciɓi ba,
vuza wo kudoku we sheshe le a̱ ka̱ɗu ba.
18 Ama ya'in ma̱za̱nga̱ ko wannai
mi ili i na n kuya'an,
adama a na mi ta̱ a kuya'an Urishelima wo okpo ubuta̱ u ma̱za̱nga̱
n uma a̱ ni feu m ma̱za̱nga̱.
19 Mi ta̱ a kuya'an ma̱za̱nga̱ adama a Urushelima
koɓolo kpamu n uma a̱ va̱,
vuza wo kudoku wa pana kaca'a ka̱ ma̱shi
n izumgbi i kusa̱ka̱ɗa̱ngusu ba.
20 <<Babu kpamu punu
mereɓu ma na mo kuyongo n wuma punu ayin kenu koci,
ko mokoshi ma na ma̱ kukuwa̱ babu ayin a̱ ni a yawa.
Vuza na baci u kuwa̱i babu u laza a̱ya̱ amangatawun (100)
i ta̱ a kuɗika yi bi'i ka̱ɗa̱nga̱ni,
vuza na baci u yawai a̱ya̱ amangatawun (1,000) ba,
i ta̱ a kuɗika yi tsu vuza vu unushi.
21 I ta̱ a kuma'a i'uwa ka̱ta̱ o yongo punu,
ka̱ta̱ kpamu a cimba kashina ki itacishi ali a lya'a umaci u le.
22 O kudoku a ma'a i'uwa ka̱ta̱ kpamu aza o yoku kau a uwa o yongo punu ba,
ko a̱ ca̱'a̱ ka̱ta̱ aza o yoku a lya'a ba.
Tsu na maɗanga matsu yongo n ayin,
ta feu uma a̱ va̱ e kugeshe nannai,
aza na mpa n zagbai o kuyongo n ayin n a̱bunda̱i a kupana uyo'o wi ili i na
a ya'in ne ekiye e le.
23 A kuya'an ulinga u gbani ba,
ko muku n le mokpo agulani ka̱ta̱ wo okpo le uta̱ɗa̱ci ba,
adama a na i ta̱ o kokpo uma a na Vuzavaguɗu u zuwakai una̱singai,
ele koɓolo nu ntsukaya n le n na n kuta̱wa̱.
24 Kafu e ɗeke mi ta̱ a̱ kushuku,
ele bi'i a̱ ka̱tsuma̱ ka kadanshi mi ta̱ e kuyeve i na a̱ ciya̱i.
25 Vuzavaguɗu u danai, ma̱kunzukunzu m malala i ta̱ a kulya'a ilikulya a̱ ubuta̱ u te,
kawu wi ta̱ a kutakuma kalu an kanaka,
ama kubuta̱ ku ɗaɗa ilikulya i koko,
a kuluma ko a una kusan ku ciɗa ku va̱ ba.>>