8
Asiriya, ili yu ulinga i kuvon i Vuzavaguɗu
Vuzavaguɗu u danai mu, <<Ɗika meshemberu ma katali mu wanshi, ka̱ta̱ vu ɗana punu mayin Maha-shala-hasha-baza* n kayakiɗani ka na a kiwanakai. Mi ta̱ e kuɗeke ganu Uriya n Zakariya kolobo ka Jeberekiya o okpo mu ngan n singai.>>
Ɗa n vaki n vuka vu va̱ keneki, ɗa u ya'in ka̱tsuma̱ ɗa u matsai maku mo koloɓo. Ɗa Vuzavaguɗu u danai mu, <<Ne'e yi kula Maha-shala-hasha-baza. Kafu maku ma fuɗa kuɗeke <Dada> ko <Mma,> mogono ma Asiriya mi ta̱ a̱ kupura̱ uciyi u Dimaska koɓolo n wa aza Samariya.>> Vuzavaguɗu u ya'in kadanshi nu mpa kpamu, <<Adama a na uma a nampa a iwan ta̱ kuyene ku mini ma sawu ma Shilo, ɗa a ya'in ma̱za̱nga̱ adama e Rezin koɓolo m maku ma Ramaliya, Adama a nannai Vuzavaguɗu wi ta̱ a̱ kutuka̱ le m mini ma gbayin me kuyene ma na ma kaya, ɗaɗa mogono ma Asiriya n utsura u ni dem. Mi ta̱ e kuyene ma lya'a nyeneke n ni dem koɓolo ni nka̱riki feu, ka̱ta̱ ma̱ pura̱ngu ali ma lya'a a kubana a Yahuda, tsu na mini ma ci lya'a ali a kubana e kuɗeku. Wi ta̱ a̱ kuba̱rukpa̱ evelyu a̱ ni ka̱ta̱ u la̱na̱ iɗika i ɗa̱, avu Imanuwelu.>>
 
Ɓolongi Ra̱ka̱ vu ɗa̱ adama o wovon a̱ɗa̱ iɗika kakau,
panai a̱ɗa̱ iɗika i da'in,
lya'i kelime n ofoɓuso adama o kuvon, ama i ta̱ a kugbasha ɗa̱,
mayun ɗa foɓusoi adama o kuvon i ta̱ a kugbasha ɗa̱.
10 Sheshei ili i na i kuya'an, ama ya̱ kuciya̱ uye ba,
doki ugboji u ɗa̱ utsura, ama u ɗa wi a kubana ɗa̱ nanlo ba,
adama a na Ka̱shile ki ta̱ koɓolo n a̱ tsu.
Panai wovon u Ka̱shile, tonoi Vuzavaguɗu
11 Vuzavaguɗu u ya'in kadanshi nu mpa n utsura u danai ka̱ta̱ n tono uye u uma a nampa a ba, 12 <<Ka̱ta̱ i ɗeke kusheshe ku gbani-gbani ili i na uma e ci ɗeke kusheshe ku gbani-gbani ba, ka̱ta̱ kpamu i pana wovon wi ili i na ele a tsu pana wovon ba. 13 Vuzavaguɗu Mala'imili a̱yi ɗa koci vuza na va kindana tsu vuza ciɗa, a̱yi ɗa va kupana wovon, ya'an a̱yi wo okpo wu ili i wovon koci, 14 wi ta̱ o kokpo a̱'isa̱, ama wi i'uwa ya aza a Isaraila dem wi ta̱ o kokpo katali ka na ka tsu zuwa uma a̱ ta̱ɗa̱tsa̱ n kakpanlai ka na ka tsu zuwa uma a̱ yikpa̱. Ama wa aza a Urushelima wi ta̱ o kokpo maza koɓolo m maza ma̱ nnu a kubana we le. 15 Aza e le o yoku n a̱bunda̱i i ta̱ a̱ kuta̱ɗa̱tsa̱, ka̱ta̱ a̱ yikpa̱ ali o koɗo, i ta̱ a kaza le ali e reme le a lazaka.>> 16 Ɓa̱na̱i kuyotsongusu ku Ka̱shile, ka̱ta̱ i dana kadanshi ka̱ ni wa aza a na i o kutono mu. 17 Mi ta̱ a kuvana Vuzavaguɗu, a̱yi na u shirikpa̱ka̱i kpa'a ku Yakubu kucina̱. Mi ta̱ e kuneke katsura ka̱ va̱ wa̱ ni. 18 Mpa ɗa na, koɓolo m muku n na Vuzavaguɗu u nekei mu. A̱ tsu urotu u ɗa u Vuzavaguɗu Mala'imili wa aza a Isaraila, u na wi ida̱shi a Kusan ku Sihiyona.
19 Uma o yoku a dana wu baci vu bana vu takpa uteku wa aza a̱ a̱guma̱ n oboci, n aza a na a tsu kumba ibori, u ga'an uma a bana o folono Ka̱shile ke le ba? Yiɗa̱i i zuwai ɗa vuza u kubana wa̱ a̱kpisa̱ a̱ una̱ wa aza a wuma? 20 A ukuna u kadanshi ka̱ wila̱ n kuyotsongusu, a dansa baci ili i na kadanshi ka nampa ki a kudansa ba, i ɗaɗa adama a na i n kutashi ba. 21 I ta̱ a kupasamgbanai punu a iɗika ya, n atakaci a gbayin koɓolo n kambulu. Ayin a na baci a panai kambulu, i ta̱ a kuya'an wupa ka̱ta̱ a dansa kadanshi ka gbani-gbani a kubana u mogono me le n Ka̱shile ke le, ka̱ta̱ a kpatala a̱shi e le a uɓon u yoku. 22 Ka̱ta̱ a indana a iɗika e ene atakaci koɓolo n ka̱yimbi n ka gbani-gbani ka na ki lo, ka̱ta̱ a vakangu le a̱ ubuta̱ u ka̱yimbi wa.
* 8:1 Kupura̱ ku gogo'o n kulazaka gogo'o,