17
A̱ma̱li a Mika
1 Vuza yoku wi ta̱ lo a̱ likuci yi nsasan a ɗika i Ifirayimu, vuza na e ci ɗeke Mika.
2 Kanna kete u danai a̱na̱ku a̱ ni, <<Azurufa ka̱kpa̱n ke te n amangatawun (1,100) a na oboki nu aɗa va, m pana ta̱ vu ya'ankai vuma va una̱, la̱na̱, a ɗanna wa̱ va̱, mpa ɗa n ɗikai.>>
Ɗa a̱na̱ku a̱ ni a danai, <<Ka̱sukpa̱ Vuzavaguɗu u zuwaka wu una̱singai.>>
3 Ana u bonokoi a̱na̱ku a̱ ni n azurufa ka̱kpa̱n kete n amangatawun (1,100) a. Ɗa a̱na̱ku a̱ ni a danai, <<Adama a na ka̱ta̱ una̱ u ka̱na̱ maku ma̱ va̱ ba, me erengu ta̱ azurufa a nampa u Vuzavaguɗu n ka̱ɗu kete. Adama a na i ta̱ a kufuɗa kushe'we ka̱ma̱li, ka̱ta̱ kpamu a sura ka'a n azurufa a. Adama a nannai mi ta̱ o kubonoko wu n aɗa.>>
4 Ana u bonokoi a̱na̱ku a̱ ni n ikebe ya, ɗa a̱na̱ku a̱ ni a ɗikai azurufa amangatawenre (200) ɗa u nekei kawakana, ɗa u she'wei a̱ma̱li a nu nɗanga ɗa u surai a ɗa n azurufa. Ɗa a zuwai a ɗa a kpa'a ku Mika.
5 A̱yi Mika va tana wi ta̱ m ma̱va̱li. Ɗa u ya'in efodu vu kula̱nsa̱ kuyeve ku Ka̱shile ɗa kpamu u ya'in a̱ma̱li. Ɗa u zagbai maku ma̱ ni mete mo okpo yi ganu.
6 A ayin a nanlo aza a Isaraila i m mogono ba. Yaba dem a kuya'an tsu na u cigai.
7 A ayin a nanlo a tana, a ya'an ta̱ kolobo ko yoku a kumaci ka aza e Levi vuza na wi ida̱shi a Batalami vu Yahuda.
8 Ɗa u ka̱tsukpa̱i likuci i Batalami vu Yahuda. Adama a na u la̱nsa̱ ubuta̱ u na wa̱ kuda̱sa̱ngu. A̱yi a nwalu ɗa u yawai a kpa'a ku Mika a̱ likuci ya aginda ya aza a Ifirayimu.
9 Ɗa Mika we ecei ni, <<Teɗei vu uta̱i?>>
Ɗa wu ushuki u danai, <<Mpa vuza va aza e Levi ɗa a Batalami vu Yahuda, mu uta̱ ta̱ kula̱nsa̱ ubuta̱ u na ma̱ kuda̱sa̱ngu.>>
10 Ɗa Mika u danai ni, <<Shamgba vu da̱sa̱ngu koɓolo nu mpa, ka̱ta̱ vu okpo keneki ko odoki ka̱ va̱, ka̱ta̱ kpamu vu okpo ganu vu va̱. Ka̱ta̱ ka̱ya̱ lakam n neke wu azurufa kupa n ntogu koɓolo ni ilikulya'a.>>
11 Ɗa vuza va aza e Levi va wu ushuki kuda̱sa̱ngu m Mika, ɗa wo okpoi an maku ma̱ ni.
12 Ɗa Mika we erengi vuza va aza e Levi va wo okpoi ganu vu ni, ɗa u da̱sa̱ngi a kpa'a ku ni.
13 Ɗa Mika u danai, <<Gogo na n yeve ta̱ Vuzavaguɗu wi ta̱ a̱ kuka̱sukpa̱ mu m ba̱ruwa̱, a na n ciya̱i vuza va aza e Levi wo okpoi ganu vu va̱.>>