3
Vuzavaguɗu wi ta̱ a kuya'anka uduniya afada
1 Vuzavaguɗu u danai, <<A ayin a nanlo,
mi ta̱ o kubonoko Yahuda n Urushelima n una̱singai u le,
2 Mi ta̱ o kuɓolongu uduniyan ra̱ka̱,
n tuka̱ le a̱ ka̱ra̱'a̱ ka Jehoshafatu.
Ta ɗe mi a kutakacika le adama a uma a̱ va̱,
adama a na a wacuwa ta̱ aza a Isaraila, ili yi uka̱ni i va̱.
ɗa kpamu e pecekushi iɗika i va̱.
3 A ya'ain kazagba adama uma a̱ va̱,
e dengei muku mo olobo nu nkere okpoi agbashi,
adama a na a tsupaka ashakanlai n ma̱kya̱n.
4 <<A̱ɗa̱ aza a Taya n aza a Sidon n uɓon Filisitiya, yiɗa̱i i cigai kuya'anka mu? Yi ta̱ e kusheshe i tsupa ili i na n ya'ankai ɗa̱? Ta baci nannai, gogo na mi ta̱ a ku kucikpa kubonoko ka'a a kaci ka̱ ɗa̱.
5 Adama a na i pura̱ ta̱ azurufa n azanariya a na i ucanuku u singai u va̱ i bankai a̱ nva̱li ma̱ a̱ma̱li a̱ ɗa̱.
6 Ɗa kpamu i pura̱i uma a̱ va̱ aza a Yahuda n aza a Urushelima, i denke yi aza e Helene, adama a na i banka le da'angi n iɗika i le.
7 La̱na̱i, gogo na mpa mi ta̱ a kuzuwa le o bono a̱ ubuta̱ u na yi ishi i dengei le va, ka̱ta̱ n ya'anka ɗa̱ ili i na i ya'ankai le.
8 I ta̱ e kudenke aza a Yahuda muku n ɗa̱ olobo nu nkere, ka̱ta̱ e le tamkpamu e denke aza a Sabina, a̱ ubuta̱ wu mɓa̱ri a iɗika ya aza Arabiya, mpa Vuzavaguɗu n dansai.>>
9 Salai ukuna u nampa wa a̱ ka̱tsuma̱ ku uduniyan,
i dana, foɓusoi kuya'an kuvon.
i ɗengusa̱ eyevi o kuvon,
i zuwa osoji a yawa ɗevu, a laza a kubana kuvon.
10 Lapai mba̱ri n vicimba n ɗa̱ mo okpo otokobi,
i bonoko muwun n vikya'a n ɗa̱ nsara,
ya'an vuza babu utsura u dana,
<<Mpa vuza vu utsura ɗa.>>
11 Dakakai i ta̱wa̱, a̱ɗa̱ uduniyan u na yi uka̱ra̱'i n uma a̱ va̱,
i ɓolongu ɗe a̱ ka̱ra̱'a̱.
Vuzavaguɗu, zuwa osoji a̱ nu a gasa a̱ ubuta̱ wa.
12 <<Ya'an uduniya u ɗa̱nga̱,
a̱ ka̱na̱ uye a kubana a̱ ka̱ra̱'a̱ ka afada ka Jehoshafatu,
adama a na ta ɗe n ku da̱sa̱ngu,
n ya'anka uduniyan u na wi uka̱ra̱'i n uma a̱ va̱ afada.
13 Ka gbani-gbani ke le ka yimkpa ta̱,
remei nkawun n ɗa̱ i kana le, tsu ishina i na i ge'wei.
Ta̱wa̱i i dasa le, tsu na a tsu pisha ma̱kya̱n,
adama a na okotsu a kupisha ma̱kya̱n a shana,
ogbodo a gbagba'in a shana a pasa.>>
14 Ka̱bunda̱i ka uma,
ki ta̱ punu a̱ ka̱ra̱'a̱ ka afada a̱ Ka̱shile,
adama a na kanna ka Vuzavaguɗu ka yawa ta̱ ɗevu,
a̱ ka̱ra̱'a̱ ka kukiɗa afada.
15 Kanna n wotoi i ta̱ o ko okpo ka̱yimbi,
azangata feu kpamu e kuneke kutashi ba.
16 Vuzavaguɗu wi ta̱ a kuya'an yura̱ a Sihiyona,
wi ta̱ a̱ kuɗa̱ngusa̱ ka̱la̱ka̱tsu ka̱ ni a Urushelima,
gaɗi a̱da̱nga̱shile n iɗika yi ta̱ a̱ kugba̱ɗa̱.
Ama Vuzavaguɗu ɗa ubuta̱ u kusheɗeku u uma a̱ ni,
mashilya kpamu a uma a Isaraila.
Una̱singai adama a uma a̱ Ka̱shile.
17 <<Talo ye kuyeve a na mpa ɗa Vuzavaguɗu Ka̱shile ka̱ ɗa̱,
yi ta̱ e kuyeve a na mi a ida̱shi a Sihiyona,
kusan ku ciɗa ku va̱,
Urushelima wi ta̱ o okpo ciɗa,
babu kpamu irala i na i kudoku kuciya̱ ulya'i wa̱ a̱ ni.
18 <<A kanna ka nanlo, nsansa mi ta̱ kushana n ma̱kya̱n,
ka̱ta̱ aginda tamkpamu a shana n mani ma anaka,
nyeneke ma aza a Yahuda ra̱ka̱ n shana n mini.
ka̱shi ka̱ mini ki ta̱ a̱ ku uta̱ ɗe a kpa'a ku Vuzavaguɗu,
ka̱ta̱ me neke ka̱ra̱'a̱ ka nɗanga n Akashiya kuta̱nu.
19 <<Ama Masar wi ta̱ o ko okpo agali,
Edom tamkpamu wo okpo kakamba,
adama a ka gbani-gbani ka na a ya'ankai aza a Yahuda,
a unai aza a babu unushi a iɗika i Yahuda.
20 Ama Yahuda wi ta̱ o ko okpo ubuta̱ wi ida̱shi i uma ayin dem
Urushelima tamkpamu a kubana a tsukaya dem
21 Mi ta̱ a kutsupa unushi u munuka ma aza a babu unushi,
mi a kucinukpa ka le u ɗa ba,
mpa Vuzavaguɗu mi ta̱ o kuyongo a Sihiyona.>>