16
1 Kadanshi ka Vuzavaguɗu ka̱ ta̱wa̱i u Jehu maku ma Hanani adama a ka gbani-gbani ka na Basha u ya'in, ka danai,
2 <<Vi ishi ili yoku ba ɗa m bonokoi nu vuza kelime va aza a Isaraila, ama ɗa vu ya'in tsu na Jerobuwam u ya'in ali ɗa vu zuwai aza a Isaraila kuya'an unushi u na u zuwai mu wupa.
3 Mi ta̱ ɗevu a na ma kuna Basha m kpa'a ku ni dem, ka̱ta̱ m bonoko kpa'a ku ni tsu kpa'a ku Jerobuwam maku ma Nebatu.
4 Vuma vu Basha vu na baci de dem u kuwa̱i punu a̱ likuci ya, nshe'e n ɗa n kutakuma yi, ka̱ta̱ asakali a̱ cuwa̱ tamkpamu n inyama ya aza a na a̱ kuwa̱i a kakamba.>>
5 Ulinga u na u buwai u tsugono tsu Basha, n ili i na u ya'in n ubuta̱ u na u yawai, i ɗa yi ta̱ uɗani a katagarda ka tsumani ko ngono ma aza a Isaraila.
6 Ɗa Basha u bankai anan koko a̱ ni n kiya ɗa a̱ ciɗa̱ngi ni a Tiza, ɗa Ela maku ma̱ ni wu okpoi mogono a una̱ u ni.
7 Ɗa kpamu kadanshi ka Vuzavaguɗu ka̱ ta̱wa̱i u keneki Jehu maku ma Hanani a kubana u Basha n kpa'a ku ni, adama a ukuna u gbani-gbani u na u ya'in dem a kubana u Vuzavaguɗu, u zuwa ni wupa adama a ili i na u ya'in, u ya'in tsu na Jerobuwam u ya'in, n tsu na kpamu wu unai kpa'a ku Jerobuwam ka.
Ela mogono mi Isaraila
8 A̱ ka̱ya̱ ka kamanga n a̱ta̱li o tsugono tsu Asa mogono ma Yahuda, Ela maku ma Basha mo okpoi mogono ma aza a Isaraila, ɗa u lya'i tsugono a Tiza ali a̱ya̱ e re.
9 Ama kagbashi ka̱ ni Zimiri, vuza vu kelime vu kagimi ke te ve ekeke o doku a̱ ni, u sheshei kawuya a kubana wa̱ ni. A makyan ma na Ela wi a Tiza, u so'i ma̱ra̱ ali ma makai ni a kpa'a ku Aza, vuza na a zuwai wi inda kefeku ka Tiza.
10 Ɗa Zimiri u uwai u lapai ni wu unai, ili i nampa i gita̱ ta̱ a̱ ka̱ya̱ ka kamanga n ke cindere ka na Asa wi o tsugono tsu Yahuda. Ɗa wo okpoi mogono a una̱ u ni.
11 Ana u gita̱i kulya'a tsugono, u da̱sa̱ngi a kakuba ka nanlo, ɗa wu unai limata i kpa'a ku Basha ra̱ka̱. U buwaka maku ma vali me te m wuma ba, ko umaci u le ko a̱ja̱'a̱ e le.
12 Ɗa Zimiri wu unai kpa'a ku Basha ra̱ka̱, tsu na kadanshi ka Vuzavaguɗu ka dansai a kubana u Basha a una̱ u keneki Jehu,
13 adama a̱ unushi u na Basha m maku ma̱ ni Ela a ya'in, ɗa kpamu a zuwai aza a Isaraila a ya'in unushi, ali ɗa a zuwai Vuzavaguɗu Ka̱shile ka aza a Isaraila wupa adama a̱ a̱ma̱li a kavama e le.
14 Ulinga u na u buwai u tsugono tsu Ela n ili i na u ya'in ra̱ka̱ a makyan ma na wi o tsugono, yi ta̱ uɗani a katagarda ka tsumani ko ngono ma aza a Isaraila.
Zimiri mogono mi Isaraila
15 A̱ ka̱ya̱'a̱ ka kamanga n ke cindere a na Asa wi o tsugono a Yahuda, Zimiri u lya'i tsugono a Tiza tsu ayin e cindere koci. Ɗa osoji a kanzai likuci i Gibeton, a iɗika ya aza a Filisitiya.
16 Ana osoji a na i ɗe a̱ ubuta̱ u kuvon a panai a danai, <<Zimiri u sheshei kawuya a kubana u mogono ali ɗa wu unai ni.>> ɗa aza a Isaraila ra̱ka̱ a zuwai Omiri, vuza vu kelime vo osoji wo okpoi mogono ma aza a Isaraila ɗe a kanna ka nanlo ɗe a̱ ka̱tsura̱.
17 Ɗa Omiri n osoji a aza a Isaraila ra̱ka̱ a̱ uta̱i a Gibeton, ɗa a banai bopoi a kanzai likuci i Tiza n kuvon.
18 Ana Zimiri we enei a lya'a ta̱ likuci ya, ɗa u uwai a̱ ubuta̱ u wu ukanji e kefeku ko mogono ka, ɗa u songi kpa'a ka n ka̱ci ka̱ ni punu dem, ɗa u kuwa̱i,
19 adama a̱ unushi u na u ya'in, u yongoi a kuya'an ka gbani-gbani u Vuzavaguɗu a kuya'an tsu na Jerobuwam wi ishi a kuya'an ali ɗa u zuwai aza a Isaraila feu a ya'in unushi.
20 Ulinga u na u buwai u tsugono tsu Zimiri n kagbanigbani ka na u ya'ansai, ki ta̱ uɗani a katagarda ko ngono ma aza a Isaraila.
Omiri mogono mi Isaraila
21 Ana Zimiri u kuwa̱i ɗa uma a Isaraila e pecei ugboku u re, ugboku u te u tonoi Tibini maku ma Ginatu wu okpoi mogono, ugboku u te u na u buwai o tonoi Omiri.
22 Ama aza a na i a kuciga Omiri a la'a ta̱ aza na i a kuciga Tibini kolobo ka Ginatu. Ɗa Tibini u kuwa̱i, ɗa Omiri wu okpoi mogono.
23 A̱ ka̱ya̱'a̱ ka kamangankupa n kete ka tsugono tsu Asa mogono ma Yahuda, Omiri u lya'a ta̱ tsugono ci Isaraila, u ya'in a̱ya̱ kupa n e re. A̱ ka̱tsuma̱ ka̱ aya̱'a̱ ka u ya'an ta̱ a̱ta̱li a̱ likuci i Tiza.
24 U tsulai kaginda ka aza Samariya u Shimeru azurufa a̱kpa̱n a̱ta̱li (6,000) u ma'i ɗe likuci ɗa u ɗekei i ɗa Samariya, adama a na a ciɓa sa m Shimeru vuza vu ubuta̱ wa.
25 Ama ɗa Omiri u nusakai Vuzavaguɗu u la'i aza a na lya'i tsugono e kelime ka̱ ni ra̱ka̱.
26 Adama a na u tono ta̱ uye u Jerobuwam kolobo ka Nebatu, uteku tsu na u ya'in u nushi u na u zuwai aza a Isaraila kuya'an unushi, u na u zuwai Vuzavaguɗu Ka̱shile ki Isaraila wupa a̱ adama a̱ma̱li kavama e le.
27 Ulinga u na u buwai u tsugono tsu Omiri n ili i na u ya'in koɓolo n utsura u tsugono u ni ra̱ka̱ yi ta̱ uɗani a katagarda ka tsumani ka ngono mi Isaraila.
28 Ɗa Omiri u bankai anan koko a̱ ni n kiya ɗa a̱ ciɗa̱ngi ni a Samariya. Ɗa Ahabu kolobo ka̱ ni kokpoi mogono mi Isaraila.
Ahabu mogono mi Isaraila
29 A̱ ka̱ya̱'a̱ ka kamangankupa n kunla̱i ko tsugono tsu Asa, mogono ma Yahuda ɗa Ahabu kolobo ka Omiri ka okpoi mogono mi Isaraila, ɗa u lya'i tsugono ci Isaraila a Samariya a̱ya̱ kamanga n e re.
30 Ɗa Ahabu kolobo ka Omiri ka nusakai Vuzavaguɗu u la'i aza a na lya'i tsugono e kelime ka̱ ni ra̱ka̱.
31 Kutono ku uye u gbani-gbani tsu Jerobuwam kolobo ka Nebatu wu okpo yi ili ba ɗa u zuwai Jezebelu mekere ma Etaba'alu, mogono ma Sidon, ɗa u tonoi ka̱ma̱li ke le Balu ɗa kpamu u ya'anka ni tsugbashi.
32 Ɗa u shikpa̱ka̱ yi Balu katalikalyuka a̱ a̱'isa̱ a Balu ka na u ma'in a Samariya.
33 Ahabu u shikpa̱i iyoci i ka̱ma̱li ka Ashera. Ɗa u doku u ya'in u nushi wa a̱bunda̱i adama a na u zuwa ta̱ Vuzavaguɗu Ka̱shile ki Isaraila wupa u na u la'i wu ngono mi Isaraila n na n lya'i tsugono kelime ka̱ ni.
34 A ayin o tsugono tsu Ahabu tsu ɗa Hiyelu vuza va aza Betelu u ma'in Jeriko. A ayin a na u varai kuma'a ka ɗa maku mu ugiti ma̱ ni Abiram ma̱ kuwa̱i, ana kpamu u kotsoi kuma'a ka, ɗa Segubu maku ma ukocishi ma̱ ni ma̱ kuwa̱i, ili ya i ya'an ta̱ derere uteku tsu na Vuzavaguɗu u dansai a una̱ u Jesuwa kolobo ka Nun.