3
Sulemanu u folonoi kuyeve
1 Sulemanu u la̱nsa̱i kuya'an ida̱shi i ma̱ta̱na̱ n Firi'auna mogono ma Masar, ɗa u zuwai mekere ma̱ ni. U ta̱wa̱i m ma'a a̱ likuci i Dawuda ali sai a ayin a na u kotsoi kuma'a kefeku ko tsugono ka̱ ni n A̱'isa̱ a gbayin a Vuzavaguɗu, koɓolo m mashilya ma na ma̱ ka̱ra̱'i Urushelima.
2 A ayin a nanlo uma o yongo ta̱ a kuya'an alyuka a̱ nva̱li n yoku kau, adama a na ka̱ta̱ a ma'a A̱'isa̱ a gbayin n kula ku Vuzavaguɗu ba.
3 Sulemanu u yotsongi ucigi u ni a kubana u Vuzavaguɗu a kuwalaka tsu na esheku a̱ ni Dawuda u ya'in. Ama u ya'an ta̱ alyuka n kune'e n ili i ma̱gula̱ni a̱ nva̱li.
4 Ɗa mogono ma banai a Gibiyon ciya̱ u ya'an alyuka, adama a na ɗaɗa ma̱va̱li ma na ma la'i nu bgayin. Sulemanu u ya'in alyuka o kusongu ka̱kpa̱n (1,000) a katalikalyuka ka nanlo.
5 N kayin ka nanlo ɗa Vuzavaguɗu u ta̱wa̱i u Sulemanu tsa alatani ɗe a Gibiyon, u danai ni, <<Folono ili i na vi cigai n neke wu.>>
6 Ɗa Sulemanu wu ushuki u danai, <<Vu yotsongu ta̱ uga'in n ucigi u gbayin u na wi kugisanku ba, a kubana u kagbashi ka̱ nu Dawuda esheku a̱ va̱, adama a na u yongo ta̱ n avu n uneki u ka̱ɗu, koɓolo kpamu n usuɓi, n ka̱ɗu ka singai. Ɗa vu lya'i kelime n kuyotsongu yi ucigi u gbayin u nampa u na wi kugisanku ba, ali ɗa vi nekei ni kolobo adama a na ka̱ da̱sa̱ngu a kakuba ko tsugono ka̱ ni a ayin a nampa.
7 Gogo na Vuzavaguɗu Ka̱shile ka̱ va̱, vu zuwa ta̱ kagbashi ka̱ nu kokpoi mogono a una̱ we esheku a̱ va̱ Dawuda. Ama mpa maku me kenu ma'a mi, n yeve tsu na n kutono n ulinga u tsugono u va̱ ba.
8 Mpa kagbashi ka̱ nu ka na e mere ma uma a na vu zagbai, i ta̱ n ka̱bunda̱i ka na ka la'i kukece.
9 A dama nanai neke kagbashi ka̱ nu kuyeve, adama a na u fuɗa u ya'anka uma a̱ nu a fada a singai, ka̱ta̱ kpamu u fuɗa u pece i singai n i gbani-gbani. Adama na yayi vuza vu na wa kufuɗa kutono n uma a̱bunda̱i a nampa?>>
10 Vuzavaguɗu u panai uyo'o a na Sulemanu we ecei ili i nampa.
11 Ɗa Ka̱shile ka danai ni, <<Adama a na ve ece ta̱ ili i nampa, vu kpa̱ɗa̱i keceke ka̱ci ka̱ nu wuma wu ugaɗi, ko uciyi, ko adama a na irala i nu i kuwa̱, ama vu ecekei ka̱ci ka̱ nu kuyeve adama a na vu fuɗa vi sheshe i na yi i singai,
12 mi ta̱ e kuneke wu ili i na vu folonoi. Mi ta̱ e kuneke wu kuyeve n kufuɗa kusheshe i na yi i singai, ku na ka̱ta̱ vuza u sa'wai kuciya̱ ba, kpamu i o kudoku feu kuciya̱ vuza nannai ba.
13 Mi ta̱ e kuneke wu feu ili i na vu ecei ba, ɗaɗa uciyi n tsugbayin, adama a na a ayin a wuma u nu dem a̱ kpa̱ɗa̱ kuciya̱ mogono ma na a kugisanku n avu.
14 Vu wala baci a uye u va̱, ɗa kpamu vu tonoi wila̱ u va̱ n kadanshi ka̱ va̱, tsu na esheku Dawuda u ya'in, mi ta̱ o kudoku wu wuma wu ugaɗi.>>
15 Ɗa Sulemanu u jimgbai, ɗa u yevei a na alatani a ɗa yi.
U bonoi a Urushelima ɗa u banai e kelime ka akpati vu uzuwakpani u Vuzavaguɗu ɗa u ya'in alyuka o kusongu koɓolo n kune'e ku ma̱ta̱na̱. Ɗa u ya'in ka̱ɗiva̱ adama a agbashi a̱ ni ra̱ka̱.
Afada a̱ usuɓi
16 Kanna ko yoku ɗa ashakanlai e re a̱ ta̱wa̱i a̱ ubuta̱ u mogono ɗa shamgbai kelime ka̱ ni.
17 Vuza te a̱ ka̱tsuma̱ ke le u danai, <<Vuzagbayin vu va̱, mpa n vuka vu nampa ci ta̱ o kuyongo a kpa'a ku te. M matsai a̱yi punu a kpa'a ka koɓolo nu mpa.
18 A kanna ka tatsu wana ɗai m matsa, ɗa vuka vu nampa va feu u matsai. A̱ tsu ɗa uteku u tsu, vuza yoku wi punu a kpa'a ka koɓolo n a̱ tsu ba, sai a̱ tsu aza e re koci.
19 N kayin ɗa vuka vu nampa vu tsugbai maku ma̱ ni ɗa ma̱ kuwa̱i.
20 Ana kayin ke pecei ɗa u ɗa̱nga̱i, u ɗikai maku ma̱ va̱ mpa alavu. U va'ankai ma'a wa̱ ni, ɗa u bonoi u zuwakai mu ma̱ ni ma na ma̱ kuwa̱i va a a suvu a̱ va̱.
21 Ana kayin ka asai, n ɗa̱nga̱i kune'e maku ma̱ va̱ mani ɗa n cinai ma'a ukpa̱. Ana n la̱na̱i ma'a mayin, ɗa me enei maku ma na m matsai va ma ɗa ba.>>
22 Ama ɗa vuka vu te va vu danai, <<A̱'a̱, maku ma wuma ma ɗaɗa ma̱ va̱, ma na ma̱ kuwa̱i ma ɗaɗa ma̱ nu.>> Ama vuka vu iyain va vu gbagbalai, <<A̱'a̱, ma na ma̱ kuwa̱i ma ɗaɗa ma̱ nu, ma wuma ma ɗaɗa ma̱ va̱.>> Nannai ɗa o yongoi a kanananai a̱ ubuta̱ u mogono.
23 Ɗa mogono ma danai, <<A̱yi na a kudana, <Maku ma̱ va̱ ma'a mi n wuma, ma̱ nu ma'a mi ukpa̱,> a̱yi nan ɗe feu a kudana, <A̱'a̱, ma̱ nu ma'a mi ukpa̱, ma̱ va̱ ma'a mi n wuma.> >>
24 Ɗaɗa mogono ma danai, <<Tuka̱i mu n kotokobi.>> Ɗa a̱ tuka̱i mogono n kotokobi.
25 Ɗa u danai, <<Pecei maku ma wuma ma kure, ka̱ta̱ i neke vuza te kagbati ke te, ke te kpamu i neke vuza i re.>>
26 Ɗa vuka vu na maku ma̱ ni mi n wuma wa u danai mogono adama a na wi ta̱ a kupana asuvayali a maku ma̱ ni ma, <<Vuzagbayin vu va̱, neke yi maku ma wuma ma, ka̱ta̱ vu una ma'a ba.>> Ama vuka vu te va vu danai, <<A̱'a̱, ko vuza a̱ ka̱tsuma̱ ka̱ tsu u kuciya̱ ma'a ba. Pecei ma'a kure.>>
27 Ɗa mogono Sulemanu u kiɗai afada u danai, <<Nekei vuka vi iyain maku ma wuma ma. Ka̱ta̱ yu una ma'a ba, a̱yi ɗa a̱na̱ku a maku a.>>
28 Ana aza a Isaraila ra̱ka̱ a panai afada a na mogono ma ma ya'in, ɗa a cikpa yi ni adama a na e ene ta̱ u ciya̱ ta̱ kuyeve n ugboji u kuya'an ka afada asingai a̱ ubuta̱ u Ka̱shile.