6
Sulemanu u ma'i A̱'isa̱ a gbayin
1 A̱ ka̱tsuma̱ ka̱ a̱ya̱ amangatawa̱na̱shi n amanga̱na̱shi (480) a na aza a Isaraila a̱ ka̱sa̱kpa̱i a iɗika i Masar, a̱ ka̱ya̱ ka̱ na̱shi ko tsugono tsu Sulemanu a̱ ubuta̱ wa aza a Isaraila, o wotoi u Zivu u na u ɗaɗa wotoi u ire, ɗa u gita̱ngi kuma'a A̱'isa̱ a gbayin a Vuzavaguɗu.
2 A̱'isa̱ a gbayin a na mogono Sulemanu u ma'akai Vuzavaguɗu, ugaɗi u ni u yawa ta̱ udashi amanga̱na̱shinkupa (90), wanshi udashi kamangankupa, n uɗa̱ngi udashi amangere n u tawun.
3 Utsutsu u kafalaka n tsu kelime ka̱ A̱'isa̱ a, wanshi u ni u yawa ta̱ udashi kamangankupa, Derere n wanshi wa̱ A̱'isa̱ wa. N tsupulai tsa̱ A̱'isa̱ a gbayin a wanshi u ni u yawa ta̱ udashi gendu derere.
4 U ya'in atusu una̱ wa a suvu u la'i una̱ u pulai n wanshi.
5 A̱ ubuta̱ u na a ya'in kuma'a ka u ma'i kpamu unu u ka̱ra̱ka̱i a akambu a̱'isa̱ dem, unu a kpamu i ta̱ ugbaɓi n kuma'a ka.
6 Kpa'a ku zuva ku ukiyangbani u tatsu, anunu a ɗaka wanshi u le u ɗaɗa udashi u cindere n kagimi, anunu a ire wanshi u le udashi kuci, ku tatsu ku na ki gaɗi gbende-gbende, wanshi u ni u ɗaɗa udashi kupa n kagimi. Unu a i ta̱ ugbatyangi ni nshilya ma̱ A̱'isa̱ a gbayin. A gbatyangi unu a koɓolo ni nshilya ma̱ a̱'isa̱ ma nu nshikpu mu utsura n na a tsubaki a nshilya ma̱ a̱'isa̱ ma. A sapa punu nɗanga ma a nshilya ma̱ a̱'isa̱ ma ba.
7 A ma'a ta̱ A̱'isa̱ a n atali a na e she'wei ɗe a̱ ubuta̱ u na a̱ ga̱va̱i atali a, adama a na ka̱ta̱ a pana izumgbi i matalaka, ko i kogovu ko ili yi ulinga dem i na yi viyum, a makyan ma na i a kuma'a A̱'isa̱ a ba.
8 Utsutsu u ku'uwa anunu a ɗaka wi ta̱ a uɓon u ɗakai n a̱'isa̱ a, adasukpatsu i ta̱ lo a na walai a ku'uwa a̱ unu e mere ali a kubana a̱ kunu ku tatsu.
9 Ɗa Sulemanu u kotsoi kuma'a a̱'isa̱ a, ɗa u shamkpai a ɗa nu nɗanga n sida koɓolo n aburakpatsu.
10 U ma'i unu a akambu u ka̱ra̱ka̱i a̱'isa̱ a dem. Uɗa̱ngi u kunu dem u ɗaɗa udashi u cindere n kagimi, ɗa a matyangi le aburakpatsu a nɗanga n sida a̱ ubuta̱ u te n a̱'isa̱ a.
11 Ɗa Vuzavaguɗu u ya'in kadanshi n Sulemanu,
12 <<Adama a̱ a̱'isa̱ a na vi a kuma'a na, vu tono baci kadanshi ka̱ va̱ koɓolo n wila̱ u va̱, ɗa kpamu vi ya'in ili i na n tonokoi nu dem, mi ta̱ a kushatangu wa̱ nu uzuwakpani u na n ya'ankai Dawuda esheku a̱ nu.
13 Mi ta̱ o kuyongo a̱ ka̱tsuma̱ ka aza a Isaraila, mi a̱ ku ka̱sukpa̱ uma a̱ va̱ aza a Isaraila ba.>>
14 Ɗaɗa Sulemanu u kotsoi kuma'a a̱'isa̱ a.
15 U kumai a suvu a kasaka a, ili i na i gita̱i ɗaka ali a kubana gaɗi ni nshemberu mu nɗanga n sida, ɗa kpamu u kumai iɗika ya̱ a̱'isa̱ a ni nshemberu mu nɗanga n Firi.
16 U ma'i mololo ma a suvu ma ɗe ukocishi punu a̱'isa̱ a, u ma'i mololo ma na ma la'i n ciɗa. Ugaɗi u kunu wa udashi kamangankupa, ɗa u kumai iɗika n kasaka dem ali a kubana a̱ kukpa̱'a̱ ni nshemberu n sida.
17 Kefeku ka gbayin ka na ki punu a̱ a̱'isa̱ a, n tsupulai tsu ubuta̱ u na u la'i n ciɗa ugaɗi u ni u yawa ta̱ udashi amangatatsu.
18 Punu a̱ a̱'isa̱ a nshemberu mu nɗanga n sida n ɗa a ya'ankai ulinga. Atali a na a ma'akai kasaka ka dem ɗa a palai a ɗa n sida, ko katali vi e kene pulai ba.
19 U lapulai mololo ma ciɗa ma na mi punu a suvu a̱ a̱'isa̱ a adama a na a zuwa ɗe akpati vu uzuwakpani vu Vuzavaguɗu.
20 Mololo ma ciɗa ma ugaɗi u ni u ɗaɗa udashi kamangankupa, wanshi u ni feu udashi kamangankupa, uɗa̱ngi feu nannai udashi kamangankupa. U kumai a suvu a̱ ni n azanariya koci. U kumai katalikalyuka ka feu m maɗanga ma sida.
21 Sulemanu u kumai a suvu a̱ a̱'isa̱ a n azanariya koci, ɗa u shiyai ikani ya azanariya u pasamgbanai punu kelime ka̱ a̱ ubuta̱ u na u la'i n ciɗa va, u na a kumai feu n azanariya.
22 U kumai a̱'isa̱ a dem n azanariya. Ɗa u doku u kumai kpamu katalikalyuka ka na ki punu o mololo ma na ma la'i n ciɗa va n azanariya.
23 O mololo ma ciɗa ma a suvu ma, u ya'in punu corobi vi re m maɗanga ma zaitu, yaba dem vi le ugaɗi u ni udashi gendu.
24 Kuvelyu ku te ku corobi dem ugaɗi u ni u yawa ta̱ udashi u cindere n kagimi, ili na i ɗikai e kuvelyu ku nampa a kubana e kuvelyu ku nan ɗe ugaɗi u ni udashi gendu ɗa.
25 Corobin vi ire a gisanku yi ta̱ ɗa udashi u ni wu uta̱i derere n udashi u corobi vi iyain, mgbayin n wanshi feu derere.
26 Uɗa̱ngi u corobi dem u ɗaɗa udashi gendu.
27 U zuwai i corobi ya punu a mololo ma a suvu ma̱ a̱'isa̱ ma, n evelyu e le upetikpi. Kuvelyu ku corobi vi te ku ba̱rukpa̱i ali ku sa'wai kasaka, ɗa kpamu kuvelyu ku corobi vi ire feu ku sa'wai kasaka ka n tsu nan ɗe. Ɗa evelyu a na a buwai a gasai ali a sa'wanai punu o mololo ma.
28 U kumai anan corobi a n azanariya.
29 U ka̱ra̱i ɗe corobi u ka̱ra̱ka̱i kasaka ko mololo ma a suvu ma̱ a̱'isa̱ a pulai n a suvu dem, koɓolo n ululu a mashuwa ali n a̱pa̱lu feu.
30 U kumai kpamu iɗika i mololo ma pulai m ma a suvu ma dem punu A̱'isa̱ a gbayin a n azanariya.
31 A̱ utsutsu u mololo ma na ma la'i n ciɗa va, u ya'in a̱ɓa̱ya̱mkpa̱tsu nu nɗanga n zaitu. Urotu wu utsutsu dem wi ta̱ nu ngon n tawun.
32 A̱ɓa̱ya̱mkpa̱tsu a na u ya'in nu nɗanga n zaitu ma, u ka̱ra̱i ɗe anan corobi, n urotu wa̱ a̱vuku e kekeme, koɓolo n a̱pa̱lu a na o ɓosoi, ɗa u doku u kumai le n azanariya.
33 Nannai kpamu ɗa u ya'in urotu utsutsu wu ngon n na̱shi adama a̱ utsutsu u mololo ma gbayin nu nɗanga n zaitu.
34 Ɗa kpamu u ya'in a̱ɓa̱ya̱mkpa̱tsu e re m maɗanga ma Firi, a̱ ka̱ta̱la̱ ku te a kubana ugula̱ ku te kpamu a kubana u singai.
35 Ɗa u ka̱ra̱i ɗe i corobi, n a̱vuku e kekeme, koɓolo n a̱pa̱lu a na o ɓosoi, ɗa kpamu u surai le n azanariya a na a̱ uluwi a̱ una̱ u te derere.
36 Ɗa u ma'i mashilya ma a ulanga wa asuvu wa n atali a ushe'wi a gbagbain uwalaki a tatsu, n uwalaki u te u kaburakpatsu ka maɗanga ma sida.
37 A zuwa ta̱ kumi'i ka̱ a̱'isa̱ a Vuzavaguɗu a nan lo a̱ ka̱ya̱ ka̱ na̱shi ko wotoi u ire.
38 A̱ ka̱ya̱ ka kupa n kete ko wotoi u Bulu, ɗaɗa wotoi u kunla̱i, o kotsoi kuma'a a̱'isa̱ a tsu na o foɓusoi kuma'a a ɗa. U ya'an ta̱ a̱ya̱ e cindere a̱yi a kuma'a a ɗa.