12
Jowashi u lapulai A̱'isa̱ a Gbayin.
1 A̱ ka̱ya̱ ke cindere ko tsugono tsu Jehu, Jowashi u gita̱i tsugono ci iɗika i Yahuda. Ɗa u lya'i tsugono a Urushelima a̱ya̱ amangere. Kula ka̱ a̱na̱ku a̱ ni ku ɗa̱ Zibiya, a̱ likuci i Biyasheba.
2 Jowashi u ya'an ta̱ ili i na yi mejege a̱ a̱shi a Vuzavaguɗu, adama a na Jehoyida ganu u pi'isaka yi ta̱ tsu na u kuya'an.
3 Ama n nannai dem, u ɓoso i'uwa ya̱ a̱ma̱li a ba, uma tana a lyai kelime n kubana ɗe na ya'in kune'e ku kusongu n ili ma̱gula̱ni a̱ ubuta̱ wa.
4 Jowashi u danai anan ganu, <<Isai ikebe i na a̱ tukai tsu kune'e ku ciɗa a̱'isa̱ a Vuzavaguɗu, n ikebe i na yi isai a̱ ubuta̱ u mekecu n ikebe i na yi isai wa aza a na a ya'in uzuwakpani, n ikebe i na uma a̱ tukai n kune'e ku ucigi wa̱ a̱ɗu e le.
5 Ka̱ta̱ ganu dem u ɗika punu a̱ ka̱tsuma̱ ki ikebe i na a isai ekiye a uma, u tsupa i na baci a lapulai a kpa'a ku Vuzavaguɗu.>>
6 Ama ali a kubana a̱ya̱ kamanga na tatsu o tsugono tsu Jowashi, anan ganu a fuɗa a lapula kpa'a ku Vuzavaguɗu ka ba.
7 Ɗa Jowashi mogono u ɗekei Jehoyida ganu n anan ganu a na a buwai, u danai le, <<Adama a̱ yiɗa̱i ɗa i kpa̱ɗa̱i kulapula a̱'isa̱ a Vuzavaguɗu? Gogo na ka̱ta̱ i doku yi isa ikebe adama ka̱ci ka̱ ɗa̱ ba. I neke ikebe ya adama kulapula a̱'isa̱ a Vuzavaguɗu.>>
8 Ɗa anan ganu ushuki o kudoku ki isa ikebe ekiye a uma ba, ɗa kpamu ushuki i ta̱ a̱ ku ka̱sukpa̱ uma o yoku feu a ya'an ulinga u kulapula a̱'isa̱.
9 Ɗa Jehoyida ganu u ɗikai akpati ɗa ta̱sa̱i ka̱kuya̱mkpa̱tsu ka, u zuwai a ɗa e kukiye ku usingai ku katalikalyuka a̱ utsutsu wa̱ a̱'isa̱ a Vuzavaguɗu. Anan ganu a na i a kinda utsutsu wa, a zuwai ikebe i na uma a̱ tuka̱i ra̱ka̱ punu a akpati va.
10 Ayin a na baci enei ikebe ya i yimkpa ta̱ punu akpati va, ka̱ta̱ kaɗani ko mogono n ganu vu gbayin a̱ ta̱wa̱ e kece ikebe ya i na a̱ tuka̱i a̱'isa̱ a Vuzavaguɗu ka̱ta̱ a zuwa i ɗa ujika.
11 Ka̱ta̱ e neke ikebe ya wa aza a na a zuwai a̱ la̱na̱ ulinga wa, aza a na a tsu tsupa uma a na i ulinga wa̱ a̱'isa̱ a Vuzavaguɗu, n aza ulinga u kuma'a n eshe'wi a nɗanga,
12 Ama'in, n aza kushe'we atali. I ta̱ ulinga n ikebe ya adama a na tsula nɗanga n atali a na e she'wei adama a̱'isa̱ a Vuzavagɗu, ka̱ta̱ kpamu a tsupa ulinga u na u buwai a̱'isa̱ a Vuzavaguɗu.
13 Ikebe i na a̱ tuka̱i a̱'isa̱ a, a una i ɗa a̱ ubuta̱ u kuya'anka asasu azurufa ba, ko tana ikima̱tsu yi nkuni ba, na nsasu, n ishiyaun ba, ko ucanuku u yoku wa azanariya n azurufa adama a̱'isa̱ a Vuzavaguɗu ba.
14 E neke ta̱ ikebe ya adama a na a tsupa aza ulinga a kulapula a̱'isa̱ a.
15 A zuwa aza a kula̱na̱ ulinga wa a̱ tuka̱ n mekecu mi ikebe i na a unai adama ku lapula a̱'isa̱ a Vuzavaguɗu ba, adama a na a ya'an ta̱ ili yi usuɓi.
16 Ikebe i na e nekei adama e kune'e ku kutakpa unushi n kune'e ku kucinukpa unushi a̱ tuka̱ n i ɗa a̱'isa̱ a Vuzavaguɗu ba. I nanlo i anan ganu i ɗa.
17 Makyan ma nanlo, Haziyelu mogono ma Siriya u banai u ya'in kuvon n likuci Gatu, u lyai le. Ɗa u kpatalai a kubana kuya'an kuvon n Urushelima,
18 Jowashi mogono ma Yahuda u pura̱i ucanuku u ciɗa u na ikaya i ni Jehoshafatu, Joram n Ahaziya, ngono n cau n Yahuda, e nekei Vuzavaguɗu, ɗa u ɓolongi n ili i na a̱yi u nekei Vuzavaguɗu, ɗa u su'uki Haziyelu u ɗa ra̱ka̱, koɓolo n azanariya a na i uzuwi a̱ kunu ku kuzuwa a̱'isa̱ a Vuzavaguɗu n kpa'a ku mogono. Ɗa mogono Haziyelu u ka̱sukpa̱i Urushelima.
19 Ulinga u na u buwai u tsugono tsu Jowashi, n ili i na u ya'in yi ta̱ uɗani a katagarda ka arabali ka ngono n Yahuda.
20 Ɗa aza a̱ gba̱ra̱-gba̱ra̱ o yoku a̱ ka̱tsuma̱ ka aza ulinga a̱ ni aya'in nsata, ɗa unai Jowashi a Betu-milo a uye u na u banai a Sila.
21 Aza a na a una ni ele ɗa, Jozabadu maku ma Shimeyatu n Jehozabadu maku ma Shomeru. A̱ ciɗa̱ngu ni koɓolo n ikaya ni a̱ likuci i Dawuda. Ɗa Amaziya maku ma̱ ni wo okpoi mogono a̱ una̱ u ni.