19
Hezekaya u la̱nsa̱i uɓa̱nki u Vuzavaguɗu.
1 Ana Hezekaya mogono u panai i na a danai, ɗa u karai ntogu n ni ɗa u ukai akashi a kpalu ɗa u banai a̱'isa̱ a Vuzavaguɗu.
2 Ɗa u suki Eliyakimu vuzagbayin vu kefeku ko mogono, n Shebuna kaɗani, koɓolo n anan ganu a gbagbain, ra̱ka̱ vu le u uki n akashi a kpalu ɗa a banai u keneki Ishaya kolobo ka Amazo.
3 Ɗa a danai ni, <<I na Hezekaya mogono u danai i ɗanna. Anana kanna ka atakaci ka'a, ki ishikushi, n ko wono. Ki ta̱ an kanna ka̱ a̱ga̱nda̱, kpamu vuka va vu buwa n utsura u na wa kufuɗa wa matsa ba.
4 Ugan ba Vuzavaguɗu Ka̱shile ka̱ nu ka pana ta̱ kadanshi ka̱ a̱ra̱ɗi ka na vuza kelime vo osoji a Asiriya u dansai, a na vuzagbayin vi ni mogono ma Asiriya ma̱ suku ni u dana Ka̱shile ka wuma, yoku ba Vuzavaguɗu Ka̱shile ka̱ nu ki ta̱ o ku ɓongo yi adama a kadanshi ka. Adama a nannai vasa adama a̱tsu na tsu buwai na.>>
5 Ana nkoshi n gba̱ra̱-gba̱ra̱ o mogono Hezekaya a yawai u Ishaya,
6 ɗa Ishaya u danai, <<Dana vuzagbayin vu nu, <I na Vuzavaguɗu u dansai i ɗanna. Ka̱ta̱ vu takacika ka̱ci ka̱ nu adama a kadanshi kagbanigbani ka na vu panai adama a̱va̱ a ubuta̱ wa aza a usuki o mogono ma Asiriya ba.
7 La̱na̱, mi ta̱ a kuzuwaka yi ayinviki o yoku a na a kuzuwa yi u pana kadanshi ka na ka kuzuwa yi u kpatala o kubono a iɗika i ni, a̱ ubuta̱ u na n kuzuwa una yi ɗe n kotokobi.> >>
8 Ana vuza kelime vu mogono ma u panai a danai mogono ma Asiriya ma ka̱sukpa̱i Lakishi, ɗa u loloi ɗa u banai u cinai mogono a vishili n aza a Libina.
9 Ana mogono ma panai ukuna adama Tirihaka mogono ma Itopiya, <<Adama na wu uta̱i ku shilika̱ n a̱yi.>> Ɗa kpamu u doku ɗa u suki aza a usuki u Hezekaya a dana yi.
10 <<Nanai ɗa ya kudana Hezekaya mogono ma a Yahuda. <Ka̱ta̱ vu ka̱sukpa̱ Ka̱shile ka̱ nu, ka na vushuki n a̱yi, ka̱ ya̱nsa̱ wu n kadanshi ba, a kudana a kuneke Urushelima ekiye a mogono ma Asiriya ba.
11 La̱na̱, vu pana ta̱ i na ngono n Asiriya n ya'ankai iɗika ra̱ka̱, tsu na a unai le gbende. Avu vi ta̱ a kulaka?
12 A̱ma̱li uduniyan a nampa isa le ta̱, uduniyan u na ikaya i va̱ i la̱nga̱sa̱i, Gozan, n Haran, n Rezefa, n uma Adini aza a na i a Telasaru?
13 Teɗei mogono ma Hamata, n mogono ma Arapadu, n mogono ma likuci i Sefaravim, n Hena koɓolo n Iva?> >>
Avasa a Hezekaya
14 Ana Hezekaya wi isai akaka a katagarda ka na aza a usuki a a̱ tuka̱i ɗa u kecei, ɗa u ɗikai ka'a ɗa u uwai a̱'isa̱ a Vuzavaguɗu ɗa u ɓa̱yuwa̱i ka'a e kelime ka Vuzavaguɗu.
15 Ɗa Hezekaya u ya'in avasa u Vuzavaguɗu, u danai, <<Vuzavaguɗu Ka̱shile ki Isaraila, avu na vi ida̱shi a kakuba ko tsugono e mere mo Corobi, avu ende'in avu ɗa Ka̱shile ko tsugono tsu aduniyan ra̱ka̱. Avu ɗa vu ya'in gaɗi n iɗika.
16 Zuwa atsuvu, vu pana, Vuzavaguɗu. Ɓa̱yuwa̱ a̱shi a̱ nu ka̱ta̱ vu ene. Vu Pana kadanshi ki ishikushi ka na Sanakaribu u ya'ankai nu Ka̱shile ka wuma.
17 Mayun ɗa, Vuzavaguɗu, ngono ma Asiriya n la̱nga̱sa̱ ta̱ uduniyan n iɗika i le.
18 kpamu ɗa u variki a̱ma̱li e le akina. Adama a na e le a̱ma̱li a ɗa ba, ama nɗanga n atali a ɗa, a na uma a ya'in n ekiye.
19 Gogo na, Vuzavaguɗu Ka̱shile ka̱ tsu, isa tsu ekiye a̱ ni, adama a na tsugono tsu uduniyan ra̱ka̱ ci yeve an avu ɗa koci Vuzavaguɗu, Ka̱shile.>>
Kene ku Ishaya adama uyikpi u Sanakaribu
20 Ɗa Ishaya kolobo ka Amazo ka̱ suki n akaka a kubana u Hezekaya. U danai, <<Ili i na Vuzavaguɗu Ka̱shile ki Isaraila ka danai i ɗaɗa na, m pana ta̱ avasa a̱ nu adama Sanakaribu mogono ma Asiriya.
21 Kadanshi ka na Vuzavaguɗu u ya'in adama a̱ ni ka ɗaɗa na,
<<Likuci i Sihiyona
i goyo wu ta̱ ɗa kpamu i zo'oshi nu,
likuci i Urushelima
a̱ kugba̱ɗa̱sa̱ ka̱ wu kaci tsu na vi ilaɗi.
22 <<Yayi vu goyoi ɗa vi a kushika?
Yayi vi a̱ kuɗa̱ngusa̱ka̱ ka̱la̱ka̱tsu
yayi kpamu vi a kinda n a̱shi a̱ra̱ɗi?
Vuza ciɗa vi Isaraila ɗa.
23 Vu suku ta̱ aza a usuki a̱ nu a shika Vuzavaguɗu,
ɗa vu danai, <N ka̱bunda̱i ka keke odoku a̱ va̱
a ɗa n kumbai nsasan mu ugaɗi,
n na n la'i n ugaɗi ra̱ka̱ a Lebano.
Ɗa n poloi nɗanga n sida n na n la'i n ugaɗi,
nu nɗanga n Firi n na n la'i n uga'in,
n uwa ta̱ punu e mere ma̱ kutsun,
kutsun ku umaci u singai ku ni.
24 N ga̱va̱i ayinva a̱ likuci i yoku
ɗa n so'i mini mo omoci,
ɗa n ɗekpetengi n ataka e ene a̱va̱
nyeneke m masar ra̱ka̱.>
25 <<Vu pana ba?
A na n sheshei ukuna u nampa ɗe ali megeshe?
Ili i na n sheshe ɗe megeshe
i ɗaɗa yi a kushana gogo na,
tsu na vi o kubonoko
likuci yi ukanji agali.
26 Ka̱ta̱ uma a na i ida̱shi punu okpo babu utsura,
i ta̱ e kuje'eke ikyamba, ka̱ta̱ a̱ ripula̱.
Okpo tsu mita̱ ma̱ ka̱pula̱ka̱,
tsu mita̱ ma na muta̱i a kashina,
tsu mita̱ ma na mu uta̱i gaɗi vu kukpa̱'a̱,
ma na ma tsu ɗekpe babu mo gbonguro.
27 <<Ama n yeve ta̱ mayin
ubuta̱ u na vu ci yongo, kuta̱wa̱ ku nu n kulaza ku nu.
N yeve ta̱ tsu na vi a wupa nu mpa.
28 Adama a na vu ya'an ta̱ wupa nu mpa,
n ugbamukaci u nu, m pana ta̱ arabali a̱ nu n ka̱ci ka̱va̱,
gogo na mi ta̱ a kuzuwa kuɗopi a̱ vunu vu nu,
ka̱ta̱ n uka mojubo a̱ una̱ u nu,
ka̱ta̱ n zuwa wu vu kpatala
o kubono n uye u na vu tuka̱i.
29 <<Ɗa Ishaya u danai Hezekaya, na va wi ta̱ o kokpo urotu wa̱ nu, ka̱ya̱'a̱ ka lala yi ta̱ a kulya'a ili i na yi uta̱i n ka̱ci ka̱ ni, ka̱ta̱ ka̱ya̱'a̱ ka̱ e re i lya'a uta̱ci. Ama a̱ ka̱ya̱ ka tatsu i ca̱'a̱ ishina i ɗa̱ ka̱ta̱ i kya'a, i ca̱'a̱ ashina itacishi ali i lya'a umaci u le.
30 Kagimi ka ka kpa'a ku Yahuda, ki ta̱ o kutopo tsu nɗanga n na n zuwai aralu e le a iɗika ɗa a matsai.
31 Kagimi ka uma a na a buwai n wuma uta̱ ta̱ a Urushelima n ka̱tsura̱ ka uma a na a la'akai a kusan ku Sihiyona, adama a na ucigi u Vuzavaguɗu Mala'imili ɗa u sheshei kuya'an nanai.
32 <<Adama a nannai, ili i na Vuzavaguɗu u danai i ɗanna a ukuna u mogono ma Asiriya. Wi a ku'uwa a̱ likuci i nampa ko u taɗuku kaya'a punu ba. Wi tana feu a̱ kuta̱wa̱ nu nra̱ga̱ ko u ma'a adasukpatsu adama a na u kumba mashilya ma̱ ni ba.
33 Wi ta̱ o kubono n uye u na wu uta̱ka̱i, wi a ku uwa a̱ likuci i nampa ya ba. Mpa Vuzavaguɗu n dansa ta̱.
34 Mi ta̱ a̱ kuɓa̱nka̱ likuci i nampa ka̱ta̱ mi isa i ɗa, adama a tsugbayin tsu va̱ n uzuwakpani u na n ya'in n kagbashi ka̱va̱ Dawuda.>>
35 N kayin ka nanlo ɗa kalingata ka Vuzavaguɗu ka banai ɗa ka unai osoji aza a Asiriya a̱kpa̱n amangatawun na amanga̱na̱shi n a tawun (185,000). Ana kayin kasai ɗa a cinai uma vagali ukpa̱.
36 Ɗa Sanakaribu mogono ma Asiriya u sumai ɗa u bonoi a Niniva ɗa u da̱sa̱ngi ɗe.
37 Kanna kete, a̱yi a̱ ma̱va̱li a kucikpa ka̱ma̱li ka̱ ni Nisaroku, ɗa muku nre n ni Adurameleki koɓolo n Shareza unai ni n kotokobi, ɗa a sumai a kubana iɗika i Arara. Ɗa kolobo ka̱ ni, Isarahadon wo okpoi mogono a̱ una̱ u ni.