10
Ukpa̱ u Nadabu n Abihu
1 Ana i lo ɗa olobo a Haruna, Nadabu n Abihu a ɗikai a̱mbu e le ɗa e kenuki punu akina ɗa kpamu o doki a̱ tsungi ili i ma̱gula̱ni. Ɗa e nekei akina a na o yotsoi ba e kelime ka Vuzavaguɗu, tsu na u danai a ya'an ba.
2 Ɗaɗa akina a̱ uta̱i u Vuzavaguɗu ɗa a unai le, ɗa a̱ kuwa̱i a̱ ubuta̱ u Vuzavaguɗu.
3 Ɗa Musa u danai Haruna, <<Na ɗa ili i na Vuzavaguɗu u danai, <A̱ ka̱tsuma̱ ka aza a na i a kuya'anka mu a̱ga̱nda̱ mayun ɗa o tono ukuna u ciɗa u va̱, ka̱ta̱ o yotsongu tsugbayin tsu va̱, u uma a̱ va̱.> >> Ɗa Haruna u paɗai bini.
4 Ɗa Musa u ɗekei Mishalu n Elzapanu, muku n Uziyelu esheku e ke'en a Haruna, ɗa u danai le, <<Ta̱wa̱i ɗevu, ɗikai even a ikyamba a uma a̱ ɗa̱ i banka da'angi vu ka̱tsura̱ ka na yi, da'in m Ma̱va̱li ma̱ Ka̱shile.>>
5 Ɗa a yawai ɗevu ɗa a ɗikai le nu ntogu n le a̱ uta̱ka̱i le pulai vu ka̱tsura̱ ka na i, uteku tsu na Musa u tonokoi le.
6 Ɗa Musa u danai Haruna koɓolo m muku mo olobo n ni Eliyaza n Itama, <<Ka̱ta̱ i ka̱sukpa̱ a̱nji a̱ ɗa̱ babu uza̱ɗukpi ba, ka̱ta̱ kpamu i karasa ntogu n ɗa̱ ba, ta baci nannai ba yi ta̱ a̱ kukuwa̱, ka̱ta̱ Vuzavaguɗu u ya'an wupa ra̱ka̱ n uma. Ama kumaci ku ɗa̱ n aza a Isaraila ra̱ka̱ i ta̱ a kuya'an kpalu ku ukpa̱ ka aza a na Vuzavaguɗu wu unai n akina.
7 Ka̱ta̱ yu uta̱ punu a̱ utsutsu u Ma̱va̱li mo Oɓolo ma ba, ta baci nannai ba yi ta̱ a̱ kukuwa̱, adama a na mani'in me kerengu ma Vuzavaguɗu mi ta̱ a kaci ka̱ ɗa̱.>> Ɗa tana a̱ ya'in uteku u na Musa u danai.
8 Ɗa Vuzavaguɗu u ya'in kadanshi n Haruna u danai,
9 <<Avu n olobo a̱ nu ka̱ta̱ i so'o ma̱ra̱ ko ili i na i kuzuwa a̱shi a̱ ɗa̱ a̱ puwa̱nka̱ ba, a ayin a na baci de dem yi a ku'uwa a̱ Ma̱va̱li mo Oɓolo, ta baci de nannai ba yi ta̱ a̱ kukuwa̱. Wi ta̱ o kokpo wila̱ u ayin dem ali n tsukaya tsu na tsa̱ kuta̱wa̱.
10 Yi ta̱ a kuzagba ka̱ta̱ i pece i na yi ciɗa n ili yu unata, koɓolo kpamu n aza a nshinda̱ n aza a singai,
11 Mayu ɗa i yotsongu uma a Isaraila wila̱ u na Vuzavaguɗu u danai Musa u dana le.>>
12 Ɗa Musa u ya'in kadanshi n Haruna koɓolo Eliyaza n Itama, muku n ni n na m buwai, <<Ɗikai kagimi ke kune'e ki ishina, ke kune'e ki ilikulya i Vuzavaguɗu, ka̱ta̱ i lya'a i ɗa babu usatari n yisiti a kakambu ka katalikalyuka. Adama a na i ɗaɗa i la'i n ciɗa.
13 Yi ta̱ a̱ kulya'a i ɗa a̱ ubuta̱ u ciɗa, adama a na upecu u nu u ɗa m muku n nu, a̱ ka̱tsuma̱ ke kune'e ku na a ya'ankai Vuzavaguɗu n akina. Adama a na ta o tonokoi mu nannai.
14 Ama Ma̱ka̱nga̱ ma na a̱ ɗengusa̱i va m ma̱kuta̱ ma na e nekei va, yi ta̱ a kutakuma ma'a a̱ ubuta̱ u ciɗa. Avu n olobo a̱ nu ni nkere n nu, adama a na e neke ta̱ i ɗa yo okpo upecu u nu n upecu u muku n nu, a̱ ka̱tsuma̱ ka alyuka e kune'e ku ma̱ta̱na̱ ka aza a Isaraila.
15 Ma̱kuta̱ ma na e nekei va m ma̱ka̱nga̱ ma na a̱ ɗengusa̱i va i ta̱ a̱ kuta̱ka̱ koɓolo n kune'e ki ilikulya ku uɓon wu ushuma u na a̱ ɗengusa̱i adama e kune'e ku kuɗa̱ngusa̱ ku Vuzavaguɗu, ka̱ta̱ yo okpo upecu u nu n upecu wu muku n nu ayin dem tsu na Vuzavaguɗu u danai.>>
16 Ana Musa we ecei uteku tsu na a ya'ansai m ma̱ga̱ji me kune'e mu unushi ma, ɗa u cinai wana ɗai o songu ma'a. Ɗaɗa u ya'in wupa n Eliyaza koɓolo n Itama, muku n Haruna n na m buwai. Ɗa we ecei,
17 <<Yiɗa̱i i zuwai ɗa i kpa̱ɗa̱i kutakuma kune'e ka adama a̱ unushi ka a̱ Ma̱va̱li ma̱ Ka̱shile? Ili i ɗa i na i la'i n ciɗa, e neke ɗa̱ ta̱ i ɗa adama a na i folonoko uma unushi, ka̱ta̱ a takpaka le u ɗa u Vuzavaguɗu.
18 An wo okpoi ka̱ta̱ a uka nu mpasa ma a̱ ubuta̱ u ciɗa ba, wi ishi ta̱ u la'a n kuga'an i takuma inyama ya a̱ ubuta̱ u Ma̱va̱li ma̱ Ka̱shile, uteku tsu na n danai ɗa̱.>>
19 Ɗa Haruna wu ushuki Musa, <<Anana ɗa muku n va̱ n nekei kune'e ku unushi ku le koɓolo n kune'e ku kusongu u Vuzavaguɗu. N nannai dem ɗa ili tsu nampa i ciya̱i mu. Mi ishi baci n takuma kune'e ku unushi ku uma ku nampa anana, Vuzavaguɗu u kupana ta̱ uyo'o?>>
20 Ana Musa u panai nannai ɗa wu ushuki n kadanshi ka.