14
Kutakpa ku nshinda̱ ku mɓa̱la̱ mu ukutu
1 Ɗa Vuzavaguɗu u danai Musa,
2 <<Na wi ta̱ o kokpo wila̱ wa aza a̱ mɓa̱la̱ mu ukutu a kanna ka na a kutakpa le nshinda̱. I ta̱ a̱ kutuka̱ yi u ganu.
3 Ganu wi ta̱ a̱ kuta̱ pulai vu ka̱tsura̱ va, ka̱ta̱ u la̱na̱ vuma vu mɓa̱la̱ vu ukutu ma mayin. Ɗa baci u cinai vuma va wana ɗai u ta̱na̱,
4 ganu wi ta̱ a kuzuwa a̱ tuka̱ nu nnu n ciɗa n re koɓolo nu ncaka n sidan tsugbere ci shili tsu kuca'a, koɓolo n izobu adama a vuza na a kutakpaka nshinda̱ ma.
5 Ka̱ta̱ ganu u zuwa a kiɗa manunu me te gaɗi vu mogbodo ma̱ ci'in, ma na mi m mini ma na mi e kuyene ma singai.
6 Ka̱ta̱ u ɗika manu ma wuma ma koɓolo m macaka ma sida, n tsugbere tsu shili, n izobu ka̱ta̱ u pitiku punu a mpasa m manu ma na a kiɗai o mogbodo ma̱ ci'in ma na mi m mini ma singai ma.
7 Ka̱ta̱ u vishanku vuza na a kutakpaka nshinda̱ mu ukutu ma ali kucindere, ka̱ta̱ u dana vuma va wi ta̱ ciɗa. Ka̱ta̱ u ka̱sukpa̱ manu ma wuma ma ma laza.
8 Ka̱ta̱ vuza na a kutakpaka nshinda̱ ma u za̱'a̱ aminya a̱ ni, u puna ka̱nji ka̱ ni ra̱ka̱, ka̱ta̱ u sumba̱ ka̱ci ka̱ ni m mini, wo okpo ciɗa. Ka̱ta̱ ayin a nanlo u yeve u bono a asuvu a̱ ka̱tsura̱ ka, ama wi ta̱ a̱ kuda̱sa̱ngu pulai vu ulanga u ma̱va̱li ma ali ayin e cindere.
9 A kanna ke cindere wi ta̱ a kupuna ka̱nji ka kaci ka̱ ni ra̱ka̱, nu ntsa̱ka̱ n ni, n a̱ga̱la̱ a̱ a̱shi a̱ ni, koɓolo n ubuta̱ u na u buwai n cileme dem. Ka̱ta̱ u za̱'a̱ aminya a̱ ni, ka̱ta̱ kpamu u doku u sumba̱ m mini ka̱ta̱ wo okpo ciɗa.
10 <<A kanna ka̱ kunla̱i ka̱ta̱ u tuka̱ ni ngiri n re koɓolo m mashan mo mokyon ma̱ ka̱ya̱ me te ele na i babu u'iwin u Ka̱shile, n kune'e ki ishina, n ifa vu tatsu vu kiya ku singai ku na ki usatari m mani'in ma zaitu.
11 Ganu vu na u danai vuma va wi ta̱ ciɗa va, wi ta̱ a kubanka n vuza na a kutakpaka nshinda̱ ma koɓolo n kune'e ku ni u Vuzavaguɗu, a̱ utsutsu u Ma̱va̱li mo Oɓolo.
12 Ka̱ta̱ ganu u ɗika ma̱giri me te, u neke ma'a tsu kune'e ku kuna ku unushi, koɓolo m mani'in ma zaitu, ka̱ta̱ u ɗengusa̱ le gaɗi u Vuzavaguɗu tsu kune'e ku kuɗa̱ngusa̱.
13 Ka̱ta̱ u kiɗa ma̱giri ma a̱ ubuta̱ ciɗa u na a tsu kiɗa alyuka e kune'e ku unushi koɓolo n kune'e ku kusongu. Adama a na kune'e ku unushi ku ganu ku ɗa ku na ku la'i n ciɗa.
14 Ganu wi ta̱ e kukenuku mpasa n kune'e ku kuna ku unushi n yoku, ka̱ta̱ u dyaɓa n ɗa e melebu ma kutsuvu ku usingai ma vuza na a kutakpaka nshinda̱ ma, n ka̱jivu ka gbayin ke kukiye ku usingai, n ka̱jivu ka gbayin ke kune ku usingai feu.
15 Ganu wi ta̱ kpamu e kukenuku mani'in ma zaitu mo yoku, ka̱ta̱ u tsungu ma'a a kataka ke kukiye ku ugula̱ ka̱ ni,
16 ka̱ta̱ u dyaɓasa mani'in n ka̱jivu ku usingai ka̱ ni ma na mi e kukiye ku ugula̱ ku ni ka, ka̱ta̱ u vishangu n yoku ali kucindere u Vuzavaguɗu.
17 Kagimi ka mani'in ka na ka buwai e kukiye ku ni, ganu wi ta̱ a ku dyaɓaka vuma na i a kutakpaka nshinda̱ ma e melebu ma kutsuvu ku usingai ku ni, n ka̱jivu ka gbayin ke kukiye ku usingai, koɓolo n ka̱jivu ka gbayin ke kune ku usingai ɗe a gaɗi vu mpasa vu kune'e ku kuna ku unushi.
18 Kagimi ka mani'in ka na ka buwai e kukiye ku ganu ka, wi ta̱ a kuputala ma'a a kaci ka vuza na a kutakpaka nshinda̱ ma. Ka̱ta̱ ganu u takpaka yi unushi u ni a̱ ubuta̱ u Vuzavaguɗu.
19 Ka̱ta̱ ganu u neke alyuka e kune'e ku unushi, adama a na u takpaka vuza na a kutakpaka nshinda̱ ma nshinda̱ n ni. Ka̱ta̱ ayin a nanlo u yeve u kiɗa manama me kune'e ku kusongu,
20 ka̱ta̱ u neke a ɗa a gaɗi vu katalikalyuka, koɓolo n kune'e ki ishina, ka̱ta̱ u takpaka yi unushi u ni, u bonoko yi ciɗa.
21 <<Ama vuma va wi baci n uciyi ba, wi ta na feu a kufuɗa kutuka̱ n ili i makara ba, ka̱ta̱ u tuka̱ m ma̱giri me te adama e kune'e ku kuna ku unushi ku na a̱ kuɗa̱ngusa̱. Adama a na a takpaka yi unushi u ni. Koɓolo n ifa vi te vu kiya ku singai usatari m mani'in adama e kune'e ki ishina m mani'in ma zaitu,
22 koɓolo kpamu m moɗoi n re ko muku mu ntapambara n re, n na u kufuɗa wa̱ tuka̱. Me te ma ya'an me kune'e ku unushi, me te kpamu adama e kune'e ku kusongu.
23 A kanna ka̱ kunla̱i wi ta̱ a̱ kutuka̱ le u ganu adama a kutakpa ku nshinda̱ ku ni a̱ utsutsu u Ma̱va̱li mo Oɓolo a̱ ubuta̱ u Vuzavaguɗu.
24 Ganu va wi ta̱ a kuɗika ma̱giri me kune'e ku kuna ku unushi ka, koɓolo m mani'in ma zaitu ka̱ta̱ u ɗengusa̱ le a̱ ubuta̱ u Vuzavaguɗu tsu kune'e ku kuɗa̱ngusa̱.
25 Ganu wi ta̱ a kukiɗa ma̱giri me kune'e ku kuna ku unushi ka, ka̱ta̱ u kenuku mpasa n kune'e ku kuna ku unushi ka ka̱ta̱ u dyaɓaka vuza na a kutakpaka nshinda̱ ma e melebu ma kutsuvu ku usingai ku ni, n ka̱jivu ka gbayin ke kukiye ku usingai ka̱ ni, koɓolo n ka̱jivu ka gbayin ke kune ku usingai ka̱ ni feu.
26 Ganu va wi ta̱ a̱ kutsungu mani'in mo yoku a kataka ke kukiye ku ugula̱ ka̱ ni,
27 n ka̱jivu ke kukiye ku usingai ka̱ ni, u vishangu mani'in ma na mi e kukiye ku ugula̱ ku ni ali kucindere u Vuzavaguɗu.
28 Kagimi ka mani'in ka na ka buwai a kataka ke kukiye ku ni, ganu wi ta̱ a̱ kutsungu n ɗa ɗe a̱ ubuta̱ u na a̱ tsungi mpasa n kune'e ku unushi ka, ɗe e melebu ma kutsuvu ku usingai ku vuza na a kutakpaka nshinda̱ ma, a̱ ka̱jivu ka gbayin ke kukiye ku usingai ka̱ ni koɓolo n ka̱jivu ka gbayin ke kune ku usingai ka̱ ni feu.
29 Kagimi ka mani'in ka na ka buwai e kukiye ku ganu, wi ta̱ a̱ kutsungu ma'a a kaci ka vuza na a kutakpaka nshinda̱ ma, ka̱ta̱ u takpaka yi unushi u ni a̱ ubuta̱ u Vuzavaguɗu.
30 Ka̱ta̱ ganu u lyuka moɗoi n re ma ko muku mu ntapambara ma, n na u fuɗai u tuka̱i va,
31 Me te mi ta̱ o kokpo me kune'e ka adama a̱ unushi, me te kpamu adama e kune'e ku kusongu, koɓolo n kune'e ki ishina. N tsu nampa tsu ɗa ganu u kutakpaka vuma va unushi u ni u Vuzavaguɗu.
32 Na ɗa wila̱ u vuza na wi nu mɓa̱la̱ mu ukutu, vuza na wa kufuɗa kutuka̱ n kune'e ku kutakpa nshinda̱ n ni ba.>>
Wila̱ u kpa'a ku na ki ni nshinda̱
33 Ɗa Vuzavaguɗu u ya'in kadanshi m Musa n Haruna u danai,
34 <<A ayin a na baci i uwai a iɗika i Kana'ana, i na n nekei ɗa̱ yo okpo i ɗa̱, ɗaɗa n zuwai a̱pa̱lu a̱ mɓa̱la̱ mu ukutu a i'uwa i ɗa̱ ya,
35 ka̱ta̱ vuza vu kpa'a va u bana u tonuko ganu, <Me ene ta̱ iyoci yi mɓa̱la̱ mu ukutu a kpa'a ku va̱.>
36 Ka̱ta̱ ganu u zuwa a̱ uta̱ka̱ n ili i na yi punu a kpa'a ka ra̱ka̱, yeve u uwa u goɗumo iyoci yi mɓa̱la̱ ma, Ta baci nannai ba, i na yi punu a kpa'a ka ra̱ka̱ i ta̱ a kudana i ɗa yi ta̱ ni nshinda̱. A makyan ma nanlo yeve ganu u uwa u la̱na̱ kpa'a ka.
37 Ka̱ta̱ u goɗumo iyoci yi mɓa̱la̱ ma, ɗa baci we enei iyoci yi mɓa̱la̱ ma udyabishi a nshilya m kpa'a ma u yotsoi mini ma̱ a̱vuku ko mini ma shili, ɗa baci we enei iyoci yi mɓa̱la̱ ya i uwa ta̱ a tsusaki ka,
38 ka̱ta̱ ganu wu uta̱ punu a kpa'a ka, ka̱ta̱ u gbagura ku ɗa ali ayin e cindere.
39 A kanna ke cindere ganu wi ta̱ o kubono, ka̱ta̱ u doku u la̱na̱sa̱ka̱ ku ɗa. Ɗa baci we enei iyoci yi mɓa̱la̱ ya i ka̱ra̱'a̱ ta̱ kpa'a ka,
40 ka̱ta̱ ganu u zuwa a takpasa atali a na i n iyoci yi mɓa̱la̱ ma, ka̱ta̱ a varuku a ɗa a̱ ubuta̱ u na wi n unata da'angi n likuci.
41 Wi ta̱ a kuzuwa a̱ ka̱ga̱lukpa̱ kasaka ka kpa'a ka ra̱ka̱, alakpa a kasaka a na a̱ ka̱ga̱lukpa̱i va a̱ pura̱ a ɗa a bana a̱ va̱ma̱ a̱ ubuta̱ wu unata pulai vu likuci.
42 Ka̱ta̱ a̱ ɗika atali o yoku o bonoko a ɗa a̱ ubuta̱ u na a takpai aza a nan ɗe a, ka̱ta̱ a̱ na̱na̱ ci'in tsu savu a sura kpa'a ka.
43 <<Ɗa baci iyoci yi mɓa̱la̱ ma i doku yu uta̱i a kpa'a ka, wana ɗai a takpa atali a ɗa kpamu a surasakai kpa'a ka,
44 ganu wi ta̱ a kubana ka̱ta̱ u la̱na̱sa̱ka̱ ku ɗa. Ɗa baci iyoci yi mɓa̱la̱ ya i ka̱ra̱'i kpa'a ka, mɓa̱la̱ m gbani-gbani mu ukutu n ɗa mi punu a kpa'a ka, ku ɗa ki ciɗa ba.
45 Kpa'a ka ka kuya'an ta̱ ufa̱di n atali a ni dem, nu nɗanga koɓolo n usuri u kpa'a wa dem, ka̱ta̱ a̱ pura̱ a bana a̱ va̱ma̱ a pulai vi likuci a̱ ubuta̱ wu unata.
46 Vuma na baci u uwai a kpa'a ka, a ayin a na kpa'a ka ki ugbaguri, wi ta̱ o kokpo n unata ali kulivi.
47 Vuza na baci wa asai punu ko u lya'i ilikulya'a punu a kpa'a ka, mayun ɗa u za̱'a̱ aminya a̱ ni.
48 <<Ama ɗa baci ganu u ta̱wa̱i u la̱na̱sa̱ka̱i kpa'a ka, ɗa kpamu we enei iyoci yi mɓa̱la̱ ya i ka̱ra̱'a̱ punu ba, cina ɗe a surasaka ku ɗa ta na, ganu wi ta̱ a kudana uma kpa'a ka ki ta̱ ciɗa adama a na iyoci yi mɓa̱la̱ ya i puwa̱nka̱ ta̱.
49 Adama a kutakpa nshinda̱ m kpa'a ma, ganu wi ta̱ a kuɗika nnu n re, m macaka ma sida, koɓolo n tsugbere ci shili n izobu.
50 Ka̱ta̱ u kiɗa manu me te a gaɗi vu mogbodo ma̱ ci'in ma na mi tukpa m mini ma na e kenuki e kuyene.
51 Ka̱ta̱ u ɗika macaka ma sida, n izobu, n tsugbere ci shili koɓolo m manu ma wuma ma, ka̱ta̱ u pitiku le punu a mpasa m manu ma na a kiɗai gaɗi vu mini me kuyene ma, ka̱ta̱ u vishanku kpa'a ka ali kucindere.
52 N tsu nampa tsu ɗa u kutakpa nshinda̱ m kpa'a ma nu mpasa m manu, m mini me kuyene, m manu ma wuma, koɓolo m macaka ma sida, n izobu, koɓolo n tsugbere ci shili.
53 Ka̱ta̱ u ka̱sukpa̱ manu ma wuma ma ma laza a kakamba. N tsu nanlo tsu ɗa u kutakpaka kpa'a ka unushi ka̱ta̱ ko okpo ciɗa.>>
54 Na ɗa wila̱ wu mɓa̱la̱ mu ukutu dem u na u yotsoi una̱wuntoku,
55 adama a̱ mɓa̱la̱ mu ukutu a kuminya ko a kpa'a,
56 n kashita, n kalana, ko kubalu.
57 A dama a na u yotsongu ayin a na wi n unata n ayin a na wi ciɗa. Na ɗa wila̱ wu mɓa̱la̱ mu ukutu.