19
Wila̱ adama a ukuna u ciɗa n kuya'an ku kasingai
1 Ɗa Vuzavaguɗu u danai Musa,
2 <<Ya'an kadanshi n uma a Isaraila ka̱ta̱ vu dana le, yongoi ciɗa adama a na Mpa Vuzavaguɗu Ka̱shile ka̱ ɗa̱ mi ta̱ ciɗa.
3 Yaba dem u cikpa a̱na̱ku a̱ ni n esheku a̱ ni, ka̱ta̱ kpamu u ciɓa n kanna ka Ashibi ka̱ va̱. Mpa ɗa Vuzavaguɗu Ka̱shile ka̱ ɗa̱.
4 Ka̱ta̱ i bono kutono a̱ma̱li ko i yimaka ka̱ci ka̱ ɗa̱ a̱ma̱li a̱ iyum ba. Mpa ɗa Vuzavaguɗu Ka̱shile ka̱ ɗa̱.
5 <<Ayin a na baci yi e kuneke alyuka a ida̱shi i singai u Vuzavaguɗu, nekei a ɗa tsu na a ɗa a̱ kuciya̱ wishi adama a̱ ɗa̱.
6 I ta̱ a kutakuma inyama ya a kanna ka na i lyukai i ɗa ko kpamu kayin ka asa baci, i na baci i buwai ali a kanna ka tatsu, i ta̱ o kusongu i ɗa.
7 Ɗa baci a lya'i a ɗa a kanna ka tatsu, o okpo ta̱ unata, alyuka a i kisa ba.
8 Vuza na baci de dem u lya'i a ɗa, atakaci i ta̱ o kokpo a kaci ka̱ ni, adama a na u la̱nga̱sa̱ ta̱ ili i ciɗa i Vuzavaguɗu, Vuma nanlo i ta̱ e kupece yi n uma a̱ ni.
9 <<Yi baci a kukya'a ili i na i cimbai, ka̱ta̱ i kya'a ali a kubanka iga̱'in a ashina a̱ ɗa̱ ba, ko kpamu i tono i ɗaya i na i buwai ɗa̱ ba.
10 Ka̱ta̱ kpamu i bana kuɗayu ka ashina a itacishi a̱ ɗa̱ ba, ko kpamu i ta̱ɗa̱ umaci wu nɗanga u na u yikpa̱i a iɗika ba. ka̱sukpa̱ka̱i aza a unambi n omoci. Mpa ɗa Vuzavaguɗu Ka̱shile ka̱ ɗa̱.
11 <<Ka̱ta̱ i ya'an uboki ba. Ka̱ta̱ i ya'an a'uwa ba. Ka̱ta̱ i doronoi ba.
12 Ka̱ta̱ i ya'an akucina a a'uwa n kula ku va̱ ba, nannai va ɗa i kugoyo kula ku Ka̱shile ka̱ ɗa̱. Mpa ɗa Vuzavaguɗu.
13 <<Ka̱ta̱ i ya̱nsa̱ vuza na yi ida̱shi koɓolo i fa̱ba̱na̱ ili i ni ba. Ka̱ta̱ i ka̱na̱ katsupu ka vuza na u ya'ankai ɗa̱ ulinga ali a kubana a kanna ko yoku ba.
14 Ka̱ta̱ i shika kagulani ko kpamu i shikpa̱ka̱ ka̱yimba̱ kaguta adama a na u ta̱ɗa̱tsa̱ ba, ama pana wovon u Ka̱shile ka̱ ɗa̱. Mpa ɗa Vuzavaguɗu.
15 <<Ka̱ta̱ i ya'ansaka kasingai ba, ka̱ta̱ i iwan aza a unambi i kucikpa i ciga aza a̱ uciyi ba. Ama kiɗa afada derere n tovu.
16 Ka̱ta̱ i ka̱na̱ kuka̱ra̱'a̱ n i la̱nga̱sa̱i otoku a̱ ɗa̱ n kadanshi ka a'uwa ba. Ka̱ta̱ vu dansa kagbanigbani ka na ka kutakacika wuma u tovu ba. Mpa ɗa Vuzavaguɗu.
17 <<Ka̱ta̱ vu iwan toku nu a̱ ka̱ɗu ba. Ama dansuka tovu mejege adama a na ka̱ta̱ avu feu vi ya'an unushi adama a̱ ni ba.
18 Ka̱ta̱ vu la̱nsa̱ uye u kutsupa ko vu ka̱na̱ tovu a̱ ka̱ɗu ba, ama ciga tovu tsu ka̱ci ka̱ nu. Mpa ɗa Vuzavaguɗu.
19 <<Tonoi wila̱ u va̱. Ka̱ta̱ i ka̱sukpa̱ ilikuzuwa kakau i zamansanai ba. Ka̱ta̱ i ca̱'a̱ icu'u kakau ali ugboku u re a kashina ke te ba. Ka̱ta̱ i uka motogu ma na a ca'i n tsugbere kakau ba.
20 <<Ɗa baci vuza u ya'in tsugbani n kagbashi ke mekere ka na a̱ ka̱na̱ka̱i ɗe vuza yoku, ama ka̱ta̱ ta na a tsupa a na a̱ uta̱ka̱ yi a ugbashi wa ba. Dem n nannai u ga'an ta̱ a takacika le ama ka̱ta̱ a una le ba, adama a na ka̱ta̱ u kotso tsugbashi tsa ba.
21 Mayun ɗa vuza va u tuka̱ n ka̱giri tsu kune'e adama a katsupu ku unushi, ka̱ta̱ e neke Vuzavaguɗu a̱ utsutsu u Ma̱va̱li mo Oɓolo.
22 N ka̱giri ke kune'e adama a katsupu ku unushi ka ɗaɗa ganu u kuya'anka yi kavasa ka kutakpa unushi u Vuzavaguɗu adama a̱ unushi u na u ya'in ka̱ta̱ a cinukpaka yi u ɗa.
23 <<Ayin a na baci i uwai a iɗika i Kana'ana ya ɗa i shikpa̱i nɗanga n kulya'a, i ɗika umaci u le wo okpo ɗa̱ ili yu unata, ali a̱ya̱ a tatsu. A̱ ka̱tsuma̱ ka̱ a̱ya̱ a nanlo a, ka̱ta̱ vuza u lya'a ba.
24 A̱ ka̱ya̱'a̱ ka̱ na̱shi umaci wa ra̱ka̱ wi ta̱ o kokpo ciɗa, kune'e ku ucikpi u Vuzavaguɗu.
25 Ama a̱ ka̱ya̱'a̱ ka tawun yi ta̱ a kufuɗa kulya'a umaci u le wa. I ya'an baci nannai nɗanga n ɗa̱ mi ta̱ a kumatsa n a̱bunda̱i. Mpa ɗa Vuzavaguɗu Ka̱shile ka̱ ɗa̱.
26 <<Ka̱ta̱ i takuma inyama nu mpasa ba. Ka̱ta̱ i ya'an kula̱na̱ ko tsuboci ba.
27 Ka̱ta̱ i puna a̱nji a na i iga̱'in ya aci a̱ ɗa̱ ko kpamu ntsa̱ka̱ n ɗa̱ ba.
28 Ka̱ta̱ i ɗana ikyamba i ɗa̱ a ayin a na yi a kpalu ka aza a na a̱ kuwa̱i ɗe ba, ko kpamu i ɗana ikpoko a ikyamba i ɗa̱ ba. Mpa ɗa Vuzavaguɗu.
29 <<Ka̱ta̱ vu la̱nga̱sa̱ mekere ma̱ nu vu zuwa yi kuya'an tsugbani a̱ ubuta̱ u kutono wa̱ a̱ma̱li ba, ɗa baci vi ya'in nannai vu bono ta̱ kutono a̱ma̱li, iɗika ya ra̱ka̱ yi ta̱ a kushana n kawuya.
30 Ciɓai n kanna ka Ashibi ka̱ va̱, ka̱ta̱ i neke A̱'isa̱ a̱ va̱ tsugbayin. Mpa ɗa Vuzavaguɗu.
31 <<Ka̱ta̱ i bono kutono ko oboci ko i la̱nsa̱ a̱ma̱li ba, ta lo a̱ kula̱nga̱sa̱ ɗa̱ n unata. Mpa ɗa Vuzavaguɗu Ka̱shile ka̱ ɗa̱.
32 <<Cikpai aza e kelime, nekei aza a̱ gba̱ra̱-gba̱ra̱ tsugbayin, ka̱ta̱ kpamu i neke Ka̱shile ka̱ ɗa̱ tsugbayin. Mpa ɗa Vuzavaguɗu.
33 <<Ɗa baci komoci ka̱ da̱sa̱ngi koɓolo n a̱ɗa̱ a̱ likuci, ka̱ta̱ i takacika yi ba.
34 Ya'ankai ni derere tsu vuza na yi umaci u te. Cigai ni tsu na i kuciga ka̱ci ka̱ ɗa̱, adama a na a̱ɗa̱ feu yi ishi ta̱ o limoci a iɗika i Masar. Mpa ɗa Vuzavaguɗu Ka̱shile ka̱ ɗa̱.
35 <<Ka̱ta̱ i ya'an ulinga n kagisamkpatsu ka a'uwa, a̱ ubuta̱ u kugisanku ugaɗi, a̱miki ko ka̱bunda̱i ba.
36 Kagisamkpatsu ka̱ a̱miki n ku ugaɗi, n ki ili ya̱ a̱bunda̱i, ali n ka̱kunzukpa̱tsu ki ili i na yi mini-mini n ifa dem a ya'an ili i mayun. Mpa ɗa Vuzavaguɗu Ka̱shile ka̱ ɗa̱ ka na ka̱ uta̱ka̱i ɗa̱ a iɗika i Masar.
37 Ɓa̱na̱i wila̱ u va̱ koɓolo n kadanshi ka̱ va̱ ra̱ka̱ ka̱ta̱ i tono ka'a. Mpa ɗa Vuzavaguɗu.>>