22
Kune'e ku na ki ciɗa
1 Ɗa Vuzavaguɗu u danai Musa,
2 <<Dana Haruna m muku mo olobo n ni e reme kune'e ku na aza a Isaraila e nekei mu va n ekiye e re, adama a na ta lo a̱ kula̱nga̱sa̱ kula ku ciɗa ku va̱. Mpa ɗa Vuzavaguɗu.
3 Dana le, ili i na i ɗikai gogo na ali a kubana ntsukaya n na n kuta̱wa̱, ɗa baci yaba dem a kumaci ku ɗa̱ wi n unata ɗa kpamu u yawai ɗevu n alyuka a ciɗa a na uma a Isaraila i e kuneke Vuzavaguɗu, vuma nanlo wo kudoku kuyawa ɗevu nu mpa ba. Mpa ɗa Vuzavaguɗu.
4 Ɗa baci vuza a kumaci ku Haruna wi n ila̱ga̱jishi i gbani-gbani ko mali ma tsali, wi a kulya'a ilikulya i ciɗa ba, sai ayin a na wo okpoi ciɗa. U sa'wa baci ili i na i kuwa̱i, ko ugapu u loloi ni, wi ta̱ feu o kokpo n unata.
5 Ko ɗa baci u sa'wai ili i wuma i na i tsu rono a̱tsuma̱ a iɗika i na yi n unata, ko vuza yoku na wi n unata, ko we ne u ɗa baci,
6 vuza na baci u sa'wai ili tsu nanlo dem, wi ta̱ o kokpo n unata ali a kubana kulivi. Wa kulya'a kune'e ku ciɗa ba, sai ayin a na u sumba̱i m mini.
7 Ama kanna ka̱ yikpa̱ baci, wi ta̱ o kubono ciɗa, a ayin a nanlo a ɗa u kufuɗa wa lya'a kune'e ku ciɗa ka, adama a na ilikulya'a i ni i ɗa.
8 Ka̱ta̱ u takuma agifa ba, ko kpamu ili i na toku manama wu unai ba. Nannai wi ta̱ a kuzuwa yi wo okpo n unata. Mpa ɗa Vuzavaguɗu.
9 Mayun ɗa anan ganu o tono wila̱ u va̱, adama a na ta lo a ya'an unushi ka̱ta̱ a̱ kuwa̱ a na a iwain kutono wila̱ u va̱. Mpa ɗa Vuzavaguɗu vuza na u bonokoi ɗa̱ ciɗa.
10 <<Ka̱ta̱ vuza gbani na wi ganu ba u lya'a kune'e ku ciɗa ba, ka̱ta̱ feu komoci ko vuza vu zamalinga vi ni feu a lya'a ba.
11 Ama ɗa baci ganu u tsulai kagbashi n ikebe i ni, kagbashi ka ki ta̱ a kufuɗa ka lya'a, n yaba dem vu na a matsai a kpa'a ku ni wi ta̱ a ku fuɗa ku lya'a.
12 Ɗa baci mekere ma ganu mo oloi vuza gbani na wi ganu ba, wi a kulya'a ilikulya'a i ciɗa ba.
13 Ama ɗa baci mekere ma ganu mo okpoi kagapa, ko wu uta̱i a kpa'a ku yolo, ka̱ta̱ kpamu u matsa maku ba, ɗa u bonoi u da̱sa̱ngi a kpa'a ku dada ni, uteku tsu na wi ishi mekere ɗe, wi ta̱ a kufuɗa kulya'a ilikulya'a i ciɗa. Ama vuza gbani na wi ganu ba, ka̱ta̱ u lya'a ba.
14 Ɗa baci vuza na wi ganu ba u lya'i kune'e ku ciɗa babu u yeve, mayun ɗa u bono u tsupa ganu derere i na u lya'i va, koɓolo n ugana u na u yawai i te a̱ ka̱tsuma̱ ki ili i tawun.
15 Ka̱ta̱ anan ganu a̱ la̱nga̱sa̱ kune'e ku ciɗa ku na uma a Isaraila a̱ tsu tuka̱ a̱ ubuta̱ u Vuzavaguɗu ba,
16 kuka̱sukpa̱ le a lya'a ilikulya ya, nannai va wi ta̱ a kuzuwa le o ronoko ka̱ci ke le unushi u na a takacika le. Mpa ɗa Vuzavaguɗu, Mpa vu na m bonokoi le ciɗa.>>
Nnama n na n ga'in a ya'anka alyuka.
17 Ɗa Vuzavaguɗu u ya'in kadanshi m Musa u danai,
18 <<Dana Haruna n olobo a̱ ni koɓolo n uma a Isaraila ra̱ka̱ kadanshi ka nampa. Ɗa baci vuza a̱ ka̱tsuma̱ ka̱ ɗa̱ ko vuza vi Isaraila ko komoci ka na ki punu ida̱shi, ke nekei kune'e adama e kune'e ku kusongu u Vuzavaguɗu, ko adama a na u shatangu akucina ko kune'e ku ucikali,
19 mayun ɗa u neke kobomburon ko ka̱giri ko ma̱ga̱ji, ma babu u'iwin u Ka̱shile, adama a na kune'e ku ni ku ciya̱ wishi adama a̱ ni.
20 Ka̱ta̱ i tuka̱ n ili yu usa̱n ba, adama a na Vuzavaguɗu wa kisa a ɗa adama a̱ ɗa̱ ba.
21 Ɗa baci vuza u tuka̱i n ili i kune'e ku ma̱ta̱na̱ u Vuzavaguɗu a ushiga adama a na u shatangu akucina ko kune'e ku ucikali, mayun ɗa vi neke ili i na yi babu u'iwin u Ka̱shile adama a na ku ɗa kuciya̱ wishi.
22 Ka̱ta̱ i neke Vuzavaguɗu manama ma na ma̱ yimba̱na̱i ba, ko ma na mo koɗoi, ko ma na ma uwakai muna, ko ma na mi n kuntsu a ikyamba, ko ila̱nishi, ko a̱ra̱ga̱ji ba, ka̱ta̱ i kiyangu ili i nampa a katalikalyuka uteku tsu kune'e ka akina u Vuzavaguɗu ba.
23 Yi ta̱ a kufuɗa kuneke kobomburon ko ka̱giri ka na kune ku na̱mgba̱i tsu kune'e ku ucikali, ama a kisa a ɗa adama e kune'e ku kushatangu akucina ba.
24 Ka̱ta̱ i neke Vuzavaguɗu manama ma na o ɓosoi arawa ba, ka̱ta̱ i ya'an ili i nampa a iɗika i ɗa̱ ba,
25 ka̱ta̱ kpamu yi isa icu'u yi nnama n nampa e ekiye omoci ka̱ta̱ i ya'anka alyuka u Ka̱shile ka̱ ɗa̱ ba. Icu'u yi nnama i nanlo, a kisa n ɗa adama a̱ ɗa̱ ba.>>
26 Ɗaɗa Vuzavaguɗu u danai Musa kpamu,
27 <<A matsa baci medendem, ko maku mo mokyon, ko maku ma maraɗika, mayun ɗa a̱ ka̱sukpa̱ yi n a̱na̱ku a̱ ni ali ayin e cindere, ama ili i na i ɗikai a kanna ka̱ kunla̱i, alyuka a na a ya'in n ili i nanlo ya dem yo okpo ta̱ kune'e ku singai ka akina u Vuzavaguɗu.
28 Ka̱ta̱ i kiɗa ka̱na̱ku m maku ma̱ ni a kanna ke te ba.
29 Vi baci a kulyuka kune'e ku ucikpi u Vuzavaguɗu, ka̱ta̱ vi ya'an a ɗa mayin uteku tsu na a ɗa a̱ kuciya̱ wishi adama nu.
30 A kanna ka nanlo ka ɗaɗa a kutakuma inyama ya ra̱ka̱, ka̱ta̱ i ka̱sukpa̱ kagimi ali kayin washi ba. Mpa ɗa Vuzavaguɗu.
31 <<Mayun ɗa i ka̱na̱ wila̱ u va̱ n ka̱ɗu ke te, ka̱ta̱ i tono u ɗa. Mpa ɗa Vuzavaguɗu.
32 Ka̱ta̱ i la̱nga̱sa̱ kula ku ciɗa ku va̱ ba, nannai ɗa aza a Isaraila e kuyeve mu a na mi ciɗa. Mpa ɗa Vuzavaguɗu na u bonokoi ɗa̱ ciɗa,
33 vuza na kpamu wu uta̱ka̱i ɗa̱ a iɗika i Masar adama a na mo okpo Ka̱shile ka̱ ɗa̱. Mpa ɗa Vuzavaguɗu.>>