3
Kune'e ku Ma̱ta̱na̱
1 <<Vuza wi baci a kuya'an kune'e ku ma̱ta̱na̱, u ya'an kune'e ka m manama ma na mi kogono ko mashan punu a ushiga u ni, u neke Vuzavaguɗu kune'e ka m manama ma na mi babu u'iwin u Ka̱shile.
2 Ka̱ta̱ u kiyangu kukiye ku ni a kaci ka manama me kune'e ma̱ ni ma, ka̱ta̱ u kiɗa ma'a a̱ utsutsu u Ma̱va̱li mo Oɓolo. Anan ganu muku n Haruna i ta̱ a kuvishangu mpasa ma a katalikalyuka a akambu dem.
3 A̱ ka̱tsuma̱ ka alyuka e kune'e ku ma̱ta̱na̱ ka, ili i na ganu u kuneke alyuka a na o songi n akina a ɗa na. Ushuma u na u palai ili i ka̱tsuma̱ n u na ili i ka̱tsuma̱ i palai feu,
4 koɓolo m muku n ka̱tsuma̱ n re n ushuma u le dem, n uɓon wa asuvu dem. Na va ra̱ka̱ i ta̱ a̱ kuta̱ka̱ le.
5 Muku n Haruna mi ta̱ o kusongu le zuva a katalikalyuka a gaɗi vu kune'e ku kusongu, a na i ɗe zuva vu nɗanga n na mi ɗe akina. Na va kune'e ku ɗa ku na a ya'in n akina ku singai, ku ma̱gula̱ni u Vuzavaguɗu.
6 <<Vi ya'an baci kune'e ku ma̱ta̱na̱ m manama ma na vu uta̱ka̱i a ushiga tsu kune'e u Vuzavaguɗu, vi ta̱ e kuneke ka̱giri ko mashan, ma na mi babu u'iwin u Ka̱shile.
7 Vi baci e kuneke ma̱giri adama e kune'e ku nu, vi neke ma'a u Vuzavaguɗu.
8 Vi ta̱ a kukiyangu kukiye ku nu gaɗi vu kaci ka manama me kune'e ku nu, ka̱ta̱ vu kiɗa ma'a e kelime ka̱ Ma̱va̱li mo Oɓolo. Ka̱ta̱ muku mo olobo n Haruna n vishangu mpasa ma a akambu a katalikalyuka dem.
9 A̱ ka̱tsuma̱ ke kune'e ku ma̱ta̱na̱, ka̱ta̱ u neke a ɗa a̱ ubuta̱ u Vuzavaguɗu tsu kune'e ki ilikulya. Ili i na u kuneke i ɗaɗa na: ushuma u ni, n ushuma wu uɓon u kagun u na a gbatyai ɗevu n ketele ko kokondo, n ili i ka̱tsuma̱, n ushuma u na wi a uɓon wi ili i ka̱tsuma̱ dem,
10 Koɓolo m muku n ka̱tsuma̱ n re n ushuma u le dem, ɗevu n uɓon wa asuvu. Na va ra̱ka̱ i ta̱ a̱ kuta̱ka̱ le.
11 Ka̱ta̱ ganu u songu le a katalikalyuka tsu kune'e ki ilikulya i na o songi u Vuzavaguɗu.
12 <<Kune'e ku nu m maraɗika ma baci, vu tuka̱ m ma'a a̱ ubuta̱ u Vuzavaguɗu.
13 Vi ta̱ a kukiyangu kukiye ku nu gaɗi vu kaci ka manama me kune'e ku nu, ka̱ta̱ vu kiɗa ma'a e kelime ka̱ Ma̱va̱li mo Oɓolo ma. Ka̱ta̱ muku n Haruna n vishangu mpasa ma a akambu a katalikalyuka dem.
14 Punu a̱ ka̱tsuma̱ ki na vi nekei va, i na ve kuneke kune'e ki ilikulya u Vuzavaguɗu i ɗa na: ushuma u na u palai ili i ka̱tsuma̱ n ushuma u na wi uɓon wi ili i ka̱tsuma̱ dem,
15 koɓolo m muku n ka̱tsuma̱ n re n ushuma u le dem, koɓolo n uɓon wa asuvu dem. Na va ra̱ka̱ i ta̱ a̱ kuta̱ka̱ le.
16 Ka̱ta̱ ganu u songu le a gaɗi vu katalikalyuka, uteku tsu kune'e ki ilikulya. Kune'e ku ɗa ku na a ya'in n akina i ma̱gula̱ni i singai u Vuzavaguɗu. Ushuma dem u Vuzavaguɗu u ɗa.
17 Na va wi ta̱ o kokpo wila̱ u ko wannai ali a kubana wu ntsukaya n na n kuta̱wa̱ a̱ ubuta̱ u na yi dem, yi baci de n wuma, i takuma mpasa ko n ushuma ba.>>