1 Vuzavaguɗu u danai Musa, 2 <<Dana aza a Isaraila, vuza u ya'an baci unushi n ucikali u ni ba, u ya'in i na Vuzavaguɗu u sa̱nka̱i le a̱ ka̱tsuma̱ ka̱ wila̱ u ni, 3 Ganu vu gbayin ɗa baci u ya'in unushi, unushi u ni wa wi ta̱ o kuronoko uma unushi, mayun ɗa u ya'an kune'e adama a̱ unushi a kubana u Vuzavaguɗu n kobomburon ka na ki babu usa̱n, adama a̱ unushi u na u ya'in va. 4 U tuka̱ n kobomburon ka a̱ utsutsu u Ma̱va̱li mo Oɓolo u Vuzavaguɗu, ka̱ta̱ u zuwa kukiye ku ni a gaɗi vu kaci ko kobomburon ka, ka̱ta̱ u kiɗa ka'a u Vuzavaguɗu. 5 Ka̱ta̱ ganu vu gbayin u kenuku mpasa n kobomburon ma, ka̱ta̱ u uka n ɗa a̱ Ma̱va̱li ma. 6 Wi ta̱ a kudyaɓa mpasa ma n ka̱jivu, ka̱ta̱ u vishangu n ɗa kucindere e kelime ka kakashi ko Mololo ma na ma la'i n Ciɗa a̱ ubuta̱ u Vuzavaguɗu. 7 Ganu wi ta̱ a̱ kutsungu mpasa n yoku a avana a na i gaɗi vu katalikalyuka ka na o tsu songu ili i ma̱gula̱ni i singai, ka na ki a̱ ubuta̱ u Vuzavaguɗu a̱ Ma̱va̱li mo Oɓolo. Mpasa n na m buwai wi ta̱ a̱ kutsungu n ɗa a̱ kumi ku katalikalyuka ke kune'e ku kusongu lo a̱ utsutsu u Ma̱va̱li mo Oɓolo. 8 Wi ta̱ a kutakpa ushuma u na wi punu dem o kobomburon ka na u kuya'anka kune'e ku unushi ka, koɓolo n ushuma ra̱ka̱ u na u palai ili i ka̱tsuma̱ ya n u na ili i ka̱tsuma̱ ya i palai, 9 koɓolo m muku n ka̱tsuma̱ n re n ushuma u le dem, ɗevu n uɓon wa asuvu. Na va ra̱ka̱ i ta̱ a̱ kuta̱ka̱ le. 10 Ganu va wi ta̱ kutakpa ushuma u kobomburon wa uteku u na u takpai a̱ ubuta̱ wa alyuka a̱ ma̱ta̱na̱ a. Ka̱ta̱ ganu u songu le dem a katalikalyuka ko kusongu ili i kune'e. 11 Ama ukpan, n inyama, n ene, n kaci, n ci'in n a̱wiya̱n a̱ ni dem, 12 ɗaɗa kagimi ka na ka buwai ko kobomburon ka, u ɗika wu uta̱ka̱ pulai a kubanka a̱ ubuta̱ u na a raɗai ciɗa, a̱ ubuta̱ u ka̱kiza̱ ko kokomo. Ta ɗe o kusongu inyama i na i buwai va a̱ ka̱kiza̱ ka ɗe n akina o ogboli.

13 <<Aza a Isaraila ra̱ka̱ ɗa baci a ya'in unushi u na wi n ucikali u le ba, a ya'in i na Vuzavaguɗu u sa̱nka̱i le a̱ ka̱tsuma̱ ka̱ wila̱ u ni, ko a na wo okpoi e yeve n unushi wa ba, a nusa ta̱. 14 A̱ ta̱wa̱ baci e yeve unushi u na a ya'in, uteku u na i ka̱tsura̱ ke le a̱ tuka̱ m mobomburon ma na a̱ utuka̱i a ushiga adama e kune'e ku kushika̱ unushi, ka̱ta̱ a banka m ma'a a̱ Ma̱va̱li mo Oɓolo. 15 Nkoshi m gba̱ra̱-gba̱ra̱ n likuci ma, a kiyangu ekiye e le a kaci ko kobomburon ka ka̱ta̱ a kiɗa ka'a e kelime ka Vuzavaguɗu. 16 Ganu vu gbayin, wi ta̱ e kukenuku mpasa n yoku n kobomburon ma ka̱ta̱ u uka n ɗa a̱ Ma̱va̱li mo Oɓolo. 17 Wi ta̱ a kudyaɓa n ka̱jivu ka̱ ni punu a mpasa ma, ka̱ta̱ u vishangu n ɗa ali kucindere e kelime ka kakashi ku utsutsu ka u Vuzavaguɗu. 18 Ka̱ta̱ u ɗarukpa mpasa n yoku zuva va avana a na i gaɗi vu katalikalyuka a̱ ubuta̱ u Vuzavaguɗu a̱ Ma̱va̱li ma. Mpasa n na m buwai wi ta̱ a̱ kuva̱ma̱ n ɗa a̱ kumi'i ku katalikalyuka ko kusongu ili i kune'e a̱ utsutsu u Ma̱va̱li mo Oɓolo ma. 19 Wi ta̱ a kutakpa ushuma wa dem, ka̱ta̱ u songu u ɗa a katalikalyuka. 20 Ta wa kuya'an n kobomburon ka nannai, uteku tsu na u ya'in n kobomburon ke kune'e ku kutakpa ku unushi. Nannai ɗa ganu u kutakpaka le unushi u le, ka̱ta̱ a cinukpaka le n u ɗa. 21 Ka̱ta̱ u ɗika kobomburon ka wu uta̱ka̱ a pulai vu ka̱tsura̱ ka̱ta̱ u songu uteku tsu na u songi kobomburon ka iyain ka. Na va kune'e ka adama a̱ unushi ku ɗa adama a uma dem.

22 <<Vuza kelime u nusa baci babu ucikali u ni, ali ɗa u ya'in ili i gbani-gbani i te a̱ ka̱tsuma̱ ki ili i na Ka̱shila̱ Vuzavaguɗu u sa̱nka̱i, mayun u nusa ta̱. 23 Ayin a na baci u zukai n unushi u ni, u tuka̱ n kune'e ku ma̱ga̱ji ma na mi babu u'iwin u Ka̱shile. 24 Wi ta̱ a kukiyangu kukiye ku ni zuva a kaci ka̱ ma̱ga̱ji ka, ka̱ta̱ u kiɗa ma'a a̱ ubuta̱ u na o tsu songu kune'e ku kusongu a̱ ubuta̱ u Vuzavaguɗu. Na va kune'e ka adama a̱ unushi ku ɗa. 25 Ganu wi ta̱ a kudyaɓa mpasa n kune'e ka adama a̱ unushi ka n ka̱jivu, ka̱ta̱ u vishangu n ɗa ɗe zuva a avana a katalikalyuka ko kusongu kune'e. Ka̱ta̱ u va̱ma̱ mpasa n na m buwai ɗe a̱ kumi'i ku katalikalyuka ka. 26 U songu ushuma dem a katalikalyuka, tsu na u songi u nan ɗe a̱ ubuta̱ wa alyuka a̱ ma̱ta̱na̱. Nannai ɗa ganu u kutakpa yi unushi, ka̱ta̱ ta na a cinukpaka yi n u ɗa.

27 <<Ɗa baci vuza te a̱ ka̱tsuma̱ ka̱ ɗa̱ u nusai babu na u cikalai, ɗa u ya'in ili i te a̱ ka̱tsuma̱ ka̱ wila̱ i na Vuzavaguɗu u sa̱nka̱i, mayun u nusa ta̱. 28 Ɗa baci u ta̱wa̱i u zukai n unushi u ni, u tuka̱ n ka̱na̱ku ka maraɗika ma na mi babu u'iwin u Ka̱shile tsu kune'e adama a̱ unushi u na u ya'in. 29 U kiyangu kukiye ku ni zuva vu kune'e ka adama a̱ unushi wa, ka̱ta̱ u kiɗa ma'a a̱ ubuta̱ u na o tsu songu kune'e ku kusongu. 30 Ganu wi ta̱ kudyaɓa mpasa a̱ ka̱jivu ka̱ ni ka̱ta̱ u vishangu ɗe a avana a katalikalyuka ko kusongu ili i kune'e, ka̱ta̱ u va̱ma̱ mpasa n na m buwai ɗe a̱ kumi'i ku katalikalyuka ka. 31 Wi ta̱ a kutakpa ushuma wa ra̱ka̱, tsu na u takpai ushuma u na u ya'ankai kune'e ku ma̱ta̱na̱ ka, ka̱ta̱ ganu u songu ku ɗa a katalikalyuka ci ili i ma̱gula̱ni i singai u Vuzavaguɗu. Nannai ɗa ganu u kutakpaka yi unushi u ni, ka̱ta̱ a cinukpaka yi n u ɗa.

32 <<U tuka̱ baci m mokyon adama e kune'e ku unushi u ni, ka̱ta̱ ma ya'an mashan ma na mi babu u'iwin u Ka̱shile. 33 Wi ta̱ a kukiyangu kukiye ku ni zuva a kaci, ka̱ta̱ u kiɗa ma'a adama e kune'e ku unushi, a̱ ubuta̱ u na a tsu kiɗa nlala n kune'e ku kusongu. 34 Ganu wi ta̱ a kudyaɓa mpasa ma n ka̱jivu ka̱ta̱ u vishangu n ɗa avana a katalikalyuka ko kusonku kune'e ka, ka̱ta̱ mpasa n na m buwai u va̱ma̱ n ɗa a̱ kumi'i ku katalikalyuka ka. 35 U takpa ushuma wa dem, tsu na u ya'in m malala ma alyuka e kune'e ku ma̱ta̱na̱, ka̱ta̱ ganu u songu ma'a a katalikalyuka, a gaɗi vu kune'e ki ilikulya i Vuzavaguɗu. Nannai ɗa ganu u kutakpaka yi unushi adama a̱ unushi u na u ya'in, ka̱ta̱ a cinukpaka yi n unushi u ni.