5
1 <<Vuza u kpa̱ɗa̱ baci kudansa a̱ ubuta̱ wa afada ukuna wu ili i na we enei, ko i na u yevei ɗa u kpa̱ɗa̱i kudansa, wo okpo ta̱ vuza vu unushi adama a ili i na u yevei,
2 ko kpamu ɗa baci vuza yoku u sa'wai ili i na yi m ma̱shinda̱ babu na u yevei, ko manama ma kakamba ma na mi ni nshinda̱ ɗa ma̱ kuwa̱i, ko ilikuzuwa ko ili i wuma i na yi o kurono a̱tsuma̱ a iɗika ɗa yi ni nshinda̱ feu. A̱yi feu u ka̱na̱ ta̱ nshinda̱ ɗa kpamu u ya'in unushi.
3 Ko vu sa'wa baci ili i na i tsu zuwa vuma wo okpo ni nshinda̱ babu na vi yevei. Ɗa vu ta̱wa̱i vu zukai ili i na vi ya'in va i ga'an ba, vo okpo ta̱ vuza vu unushi.
4 Ko kpamu vuma u ya'an baci akucina a na u kuya'an ili i yoku babu na u sheshei mayin, ko i singai ko i gbani-gbani. Ɗa u ta̱wa̱i u zukai nannai va u ga'an ba, wo okpo ta̱ vuza vu unushi.
5 Ɗa baci vuza u zukai a na u ya'in unushi a̱ ka̱tsuma̱ ki ili i nampa, mayun ɗa u dansa e keteshe unushi u na u ya'in.
6 Ugana u na a kiɗakai ni adama a̱ unushi u na u ya'in u ɗaɗa, wi ta̱ a̱ kutuka̱ m mashan mo mokyon ko maraɗika a̱ ka̱tsuma̱ ku ushiga ka̱ta̱ u neke Vuzavaguɗu. Na ɗaɗa kune'e ku unushi ku na ganu u kutakpaka yi unushi adama a̱ ni.
7 <<Vi baci a̱ kuciya̱ ma̱giri ba, vi ta̱ a kufuɗa va̱ tuka̱ nu ntapambara n re ko moɗoi n re u Vuzavaguɗu a agisana a ugana a̱ unushi u nu. Manu me te ma ɗaɗa adama e kune'e ku unushi, me te tamkpamu adama e kune'e ku kusongu.
8 Vi ta̱ a̱ kutuka̱ n ele a̱ ubuta̱ u ganu, a̱yi ɗa vuza na u kuneke manu ma iyain adama e kune'e ku unushi. Ka̱ta̱ u pinda̱ra̱ kuɗeku, ama ka̱ta̱ u taɓa ku ɗa ba.
9 Ka̱ta̱ u vishangu mpasa n yoku n kune'e ku unushi a akambu a katalikalyuka. Mpasa n na m buwai wi ta̱ a̱ kutsungu n ɗa a̱ kumi'i ku katalikalyuka ka. Na va ɗaɗa kune'e ku unushi.
10 Manu me ire wi ta̱ kuneke ma'a kune'e ku kusongu, uteku tsu na a ci ya'ansa. Ta ganu u kutono nannai ka̱ta̱ u takpaka yi unushi u ni, ka̱ta̱ a cinukpaka yi n u ɗa.
11 <<Wi baci an wa̱ kuciya̱ moɗoi n re ko ntapambara n re n na we kuneke ba, u tuka̱ n kiya ku na ku yawai ifa vi te u neke ku ɗa tsu kune'e adama a̱ unushi u ni. Wi a̱ kutsungu mani'in ko ili i ma̱gula̱ni ba, adama a na kune'e ku unushi ku ɗa.
12 U banka n kiya ka a̱ ubuta̱ u ganu, ka̱ta̱ a̱yi tamkpamu u kenuku ka̱kun ku te ka na ko kokpo ili i kuciɓasa. Ka̱ta̱ u songu ɗe a katalikalyuka tsu kune'e ki ilikulya u Vuzavaguɗu. Ɗaɗa kune'e ku unushi.
13 Nannai ɗa ganu u kufolonoko yi a takpaka yi unushi u na u ya'in dem. Ka̱ta̱ a cinukpaka yi u ɗa. Kagimi ke kune'e ka na ko okpoi ka ganu ka'a, uteku u na a ci ya'an n kune'e ki ishina.>>
Kune'e adama a kuna ku unushi
14 Ɗaɗa Vuzavaguɗu u danai Musa,
15 <<Vuza u pasa baci wila̱ ɗa u ya'in unushi babu na u yevei, u na u la̱nga̱sa̱i ili i ciɗa i Vuzavaguɗu, mayun ɗa u tuka̱ n ka̱giri ka na u kuɗika a ushiga u ni tsa alyuka e kune'e u Vuzavaguɗu. Ka̱giri ka nanlo ka ya'an babu u'iwin u Ka̱shile, ka̱ta̱ a kiɗaka ka'a ikebe i ni yu uta̱ derere n azurufa i na a tsu ya'anka ulinga a̱ kunu ka avasa. Na va ɗaɗa kune'e ku kuna unushi.
16 Mayun ɗa u tsupa ili i na u la̱nga̱sa̱i a̱ ka̱tsuma̱ ku ucanuku u ciɗa u nanlo. Ka̱ta̱ kpamu u doku ili i te a̱ ka̱tsuma̱ ki ili i tawun u neke ganu. Ka̱ta̱ ganu tamkpamu u folonoko yi a takpaka yi unushi u ni n ka̱giri ke kune'e adama a kutakpa ku unushi, ka̱ta̱ Vuzavaguɗu u cinukpaka yi unushi u ni.
17 <<Vuza u ya'an baci unushi u na u pasai wila̱ u Vuzavaguɗu. Ko n uyevi u ni u ɗa baci u ya'in u ɗa ba, u nusa ta̱, wo okpo ta̱ kpamu vuza vu unushi. Wi ta na a kutakacika adama a̱ unushi u ni.
18 Wi ta̱ a̱ kutuka̱ ganu n ka̱giri ka na wu utuka̱i a ushiga ka na ki babu u'iwin u Ka̱shile, ko i na yu untsai derere n kune'e adama a katsupu ku unushi. Ka̱ta̱ ganu u folonoko yi a takpaka yi unushi u na u ya'in n ucikali u ni ba, ka̱ta̱ a cinukpaka yi n u ɗa.
19 Na va ɗaɗa kune'e adama a̱ unushi, adama a na mayun ɗa vu nusakai Vuzavaguɗu.>>