9
Anan ganu a̱ gita̱ ta̱ ulinga u le.
1 A kanna ka̱ kunla̱i ɗa Musa u ɗekei Haruna n olobo a̱ ni, koɓolo nu nkoshi m gba̱ra̱-gba̱ra̱ ma aza a Isaraila.
2 Ɗa u danai Haruna, <<Ɗika maku mo kobomburon adama e kune'e ku unushi, ka̱giri tamkpamu adama e kune'e ku kusongu, dem vu le okpo babu u'iwin u Ka̱shile, ka̱ta̱ vi neke le a̱ ubuta̱ u Vuzavaguɗu.
3 Ka̱ta̱ vu dana aza a Isaraila, <Ɗikai ma̱ga̱ji adama e kune'e ku unushi, maku mo kobomburon m ma̱giri dem okpo aza a̱ ka̱ya̱ ke te ke te babu u'iwin u Ka̱shile kpamu adama e kune'e ku kusongu,
4 ka̱ta̱ kpamu i doku i ɗika kobomburon n ka̱giri adama e kune'e ku ma̱ta̱na̱, adama a na i lyuka a ɗa u Vuzavaguɗu. N kune'e ki ishina ku na ki usatari m mani'in, adama a na anana Vuzavaguɗu wi ta̱ a̱ kuta̱wa̱ wa̱ ɗa̱.> >>
5 Ɗaɗa a̱ tuka̱i n ili i na Musa u danai le e kelime ka̱ Ma̱va̱li mo Oɓolo, ɗa ka̱bunda̱i ka uma ka ka yawai ɗevu, ɗa a shamgbai kelime ka Vuzavaguɗu.
6 Ɗa Musa u danai, <<Na ɗa ili i na Vuzavaguɗu u danai ɗa̱ i ya'an, ciya̱ tsugbayin tsu Vuzavaguɗu tsu ta̱wa̱ wa̱ ɗa̱.>>
7 Ɗa Musa u danai Haruna, <<Yawa ɗevu n katalikalyuka ka̱ta̱ vi neke kune'e ku unushi ku nu n kune'e ku kusongu adama a kutakpaka ka̱ci ka̱ nu unushi koɓolo n u uma, vu lyuka kune'e ku uma ka ka̱ta̱ vu takpaka le unushi tsu na Vuzavaguɗu u danai.>>
8 Ɗa Haruna u yawai ɗevu n katalikalyuka ka, ɗa u kiɗai maku mo mobomburon me kune'e ku unushi, ma na mi ma̱ ka̱ci ka̱ ni.
9 Ɗa olobo a̱ ni a̱ tuka̱i ni nu mpasa ma, ɗa u dyaɓai mpasa ma n ka̱jivu ka̱ ni ɗa u surakai avana a a na i a katalikalyuka ka. N na m buwai tamkpamu u tsungi n ɗa a̱ kumi'i ku katalikalyuka ka.
10 Ama ushuma, m muku n ka̱tsuma̱ n re ma koɓolo n ubuta̱ u singai wa asuvu, i na a takpai a̱ ka̱tsuma̱ ke kune'e ku unushi, ɗa u songi i ɗa a katalikalyuka uteku tsu na Vuzavaguɗu u danai Musa.
11 Ama inyama ya n ukpan wa, u songi le pulai a̱ ka̱tsura̱ ka na i.
12 Ɗa kpamu Haruna u kiɗai manama me kune'e mo kusongu ma. Ɗa muku n ni n nekei ni mpasa ma, ɗa u vishangi n ɗa a akambu a katalikalyuka ka.
13 Ɗa e nekei ni kune'e ku kusongu ka akiɗi-akiɗi, koɓolo n kaci, ɗa u songi le gaɗi vu katalikalyuka.
14 Ɗa u za̱'i ili i ka̱tsuma̱ koɓolo n ene, ɗa u songi i ɗa koɓolo n kune'e ku kusongu ɗe a katalikalyuka.
15 Ɗa kpamu Haruna u lyukai kune'e ku uma ka. U ɗikai ma̱ga̱ji adama e kune'e ku unushi ku uma ɗa u kiɗai ma'a, ɗa u nekei ma'a adama e kune'e ku unushi tsu na u ya'in n mu ugiti.
16 Ɗa u tuka̱i n kune'e ku kusongu, ɗa u nekei ku ɗa uteku u na wila̱ u danai.
17 Ɗa kpamu u tuka̱i n kune'e ku kiya ki ishina, ɗa u kenuki ka̱ku'un tukpa ɗa u songi ku ɗa a gaɗi vu katalikalyuka, ɗevu n kune'e ku kusongu ku usana.
18 Ɗa Haruna u kiɗai kobomburon ka n ka̱giri ka adama a alyuka e kune'e ku ma̱ta̱na̱ a uma. Ɗa muku n Haruna n nekei ni mpasa ma, ɗa u vishangi n ɗa a akambu a katalikalyuka ra̱ka̱.
19 Ama ushuma u kobomburon n u ka̱giri wa, n ushuma u winja koɓolo n uɓon n ushuma u na u palai ili i ka̱tsuma̱, m muku n ka̱tsuma̱ n re koɓolo kpamu n ubuta̱ u singai wa asuvu wa,
20 ɗa a kiyangi ushuma wa gaɗi vu nka̱nga̱ vu nnama, ɗa u songi le a gaɗi vu katalikalyuka.
21 Haruna ta na u ɗengusa̱i nka̱nga̱ ma koɓolo nu nkuta̱ mu usingai u Vuzavaguɗu, tsu kune'e ku kuɗa̱ngusa̱, tsu na Musa u danai.
22 Ɗa Haruna u ɗengusa̱i ekiye a̱ ni gaɗi a uɓon u uma ɗa u zuwakai le una̱singai. Ana u kotsoi kuneke alyuka e kune'e ku unushi, n kune'e ku kusongu, n kune'e ku ma̱ta̱na̱, ɗa u cipa̱i u ka̱sukpa̱i katalikalyuka.
23 Ɗaɗa Musa ele n Haruna a uwai a̱ Ma̱va̱li mo Oɓolo, ana a̱ uta̱i ɗa a zuwakai uma una̱singai kpamu, ɗa tsugbayin tsu Vuzavaguɗu tsu ta̱wa̱i u yaba dem.
24 Ɗa akina a̱ uta̱i a̱ ubuta̱ u Vuzavaguɗu ɗa e leɓecei kune'e ku kusongu ka, n uɓon wu ushuma dem u na wi a katalikalyuka. Ana uma ra̱ka̱ e enei nannai ɗa a ya'in yoroli i ma̱za̱nga̱, ɗa a̱ kuɗa̱ngi sapu a lya'i kayala a cikpai Vuzavaguɗu.