NEHEMIYA
Kuɓa̱yuwa̱
A̱ ciya̱ kuyeve vuza na u ɗanai katagarda ke Nehemiya ba. Katagarda ke Ezira n ka Nehemiya i ta̱ an nwalu koɓolo. Ali ma a katagarda ka ciɗa ka na a ɗanai n tsa aza a Ibirahi, katagarda ka Ezira n ke Nehemiya katagarda kete ka'a.
Ili i na katagarda ka nampa ki a kadanshi ɗaɗa e neke arabali tsu na Vuzavaguɗu u yotsongi usuɓi u ni a̱ ubuta̱ u kubono n uma a Isaraila a na uta̱i a iɗika i tsugbashi a kubana a Urushelima, n tsu na kpamu u ma'asakai mashilya ma̱ likuci ma. Katagarda ka kpamu ko yotsongu ta̱ tsu na e nekei aza a Isaraila kadanshi o yongo n usuɓi o kuyotsongusu ku Musa.
Na ɗa ili i gita̱i punu a katagarda ke Nehemiya ka.
1 Uboni u Nehemiya a Urushelima tsu na mogono ma Pashiya me nekei kadanshi adama a na wo okpo vuza vu tsugono a uɓon u Yahuda.
2 A ma'asakai mashilya ma Urushelima.
3 Uga'in u kukece kuyotsongusu ku Musa n tsu na uma a Isaraila a̱ shika̱i unushi u le.
4 Ulinga u Nehemiya u na u buwai o tsugono ci a uɓon u Yahuda.
Ili i na yi punu
Nehemiya u bonoi a Urushelima 1:1--2:20
A ma'asakai mashilya ma Urushelima 3:1--7:73
E kecei kuyotsongusu ku Musa ɗa kpamu a sabasakai uzuwakpani 8:1--10:39
Kagimi ka ulinga u Nehemiya 11:1--13:31
1
Avasa e Nehemiya
1 Na ɗa arabali e Nehemiya maku ma Hakaliya. A̱ ka̱tsuma̱ ko wotoi u Kishilebu ɗaɗa wotoi u kuci a̱ ka̱ya̱ ka kamanga ka na Atazesu wi a kulya'a tsugono tsu Pashiya, mpa Nehemiya a̱ ubuta̱ u mashilya a Susa, a̱ likuci i gbayin yi iɗika ya.
2 Ɗa Hanani vuza te a̱ ka̱tsuma̱ ka̱ aza a̱ va̱ koɓolo n uma o yoku a na uta̱i a̱ likuci i Yahuda, a̱ ta̱wa̱i adama a na ene mu. Ɗa me ecei le arabali a Urushelima n arabali aza a Yahuda a na uta̱i a̱ ubuta̱ u tsugbashi na ɗe a Babila.
3 Ɗa a danai mu,<<Kagimi ka uma a na uta̱i a̱ ubuta̱ u tsugbashi o bonoi, a na i a uɓon u Yahuda, i ta̱ a̱ ka̱tsuma̱ ka atakaci ka̱u. Ɗa kpamu a danai mu a̱ fa̱da̱ ta̱ mashilya ma Urushelima ɗa kpamu o songi agbaguratsu a̱ utsutsu a̱ ni.>>
4 Ana m panai ukuna u nampa, ɗa n da̱sa̱ngu n shika̱i. Ayin n a̱bunda̱i mpa a̱ una̱mgbi u ka̱tsuma, ɗa n ya'in kakuli n avasa u Ka̱shile ka gaɗi.
5 Ɗa n danai, <<Vuzavaguɗu Ka̱shile ka gaɗi, vuzagbayin Ka̱shile ili i wovon. Avu na vu tsu shatangu uzuwakpani, vuza vu ucigi u na u tsu kpa̱ɗa̱ kusaba'a wa aza a na i a kuciga wu, ɗa kpamu i e kere wila̱ u nu,
6 mi ta̱ ufolu u nu zuwaka mu atsuvu, ka̱ta̱ kpamu vu la̱na̱ mu, vu pana avasa a kagbashi ka̱ nu, a na mi a kuya'an kanna n kayin adama agbashi a̱ nu aza a Isaraila. Mi ta̱ a̱ kushika̱ unushi u na a̱tsu aza a Isaraila ci ya'ankai nu. Mayun mpa ni ikaya i va̱ ci ya'anka wu ta̱ unushi.
7 Tsu nusaka wu ta̱ gbani-gbani a na tsu kpa̱ɗa̱i kuya'an ili i na vu cigai. Ɗa kpamu tsu kpa̱ɗa̱i kutono kadanshi ka̱ nu n ili i kutono i nu n wila̱ u na vu neke kagbashi ka̱ nu Musa.
8 Ciɓa n kadanshi ka na vu danai kagbashi ka̱ nu Musa. <Ɗa baci i kpa̱ɗa̱i kutono wila̱ u va̱, mi ta̱ a kuwacuwa ɗa̱ a̱ ka̱tsuma̱ ka uduniya.
9 ama i bono baci wa̱ a̱va̱ ɗa i tonoi wila̱ uva̱ u na n nekei ɗa̱, mi ta̱ o kuɓolongu ɗa̱ ko yi ishi baci i yawa uteku wa aduniyan, mi ta̱ o kubonoko ɗa̱ a̱ ubuta̱ u na n zagbai adama a na i cikpa kula ku va̱.>
10 Ele agbashi a̱ nu aɗa, n uma a̱ nu kpamu. Aza a na vu shiba̱i n utsura u gbayin u nu.
11 Vuzavaguɗu, pana avasa a̱ va̱ kagbashi ka̱ nu n avasa agbashi a̱ nu a na buwai aza a na i a kupana uyo'o u tsugbayin tsu kula ku nu. N folono wu ta̱ neke kagbashi ka̱ nu ulya'i anana, ka̱ta̱ vu zuwa u ciya̱ mapasa ma singai a̱ ubuta̱ u mogono.>>
A makya'a ma nanlo ma mpa ɗa vuza na u tsu neke mogono ili i kuso'o.