12
Anan ganu n aza e Levi
1 Na ɗa anan ganu n aza e Levi a na o bonoi n ugbashi ele ɗa, Zarubabelu maku ma Shiyatiyelu n Jesuwa.
Anan ganu
Ele ɗa Serayiya n Irimiya n Ezira,
2 Amariya n Maluka n Hatushi,
3 N Shekaniya n Rehum n Meremotu,
4 n Ido n Ginetoyi n Abija,
5 Mijamin n Ma'adiya n Biliga,
6 Shemaya n Joyaribu n Jedaya,
7 Salu n Amoku n Hilikiya n Jedaya. Ele ɗa aza e kelime anan ganu koɓolo na aza e le a ayin Jesuwa.
8 Aza Levi ele ɗa,
Jesuwa m Binuyi n Kadimiyelu n Sherebiya n Yahuda n Mataniya vuza na a̱yi n aza a̱ na a ci canana ishipa i kucikpa.
9 Bakubukiya n Uni n aza a̱ ni a na a̱ tsu ushuku ishipa.
Kumaci ku Jesuwa ganu vu gbayin
10 Jesuwa u matsai Joyakim, Joyakim u matsai Eliyashibu, Eliyashibu u matsai Joyada,
11 Joyada u matsai Janata, Janata tankpamu u maci Jaduwa.
12 Na ɗa ula aza e kelime ka i'uwa yi ikaya i anan ganu a ayin a na Joyakim wi ganu vu gbanyin, ele ɗa,
Meraya vuza vu kelime vu kpa'a ku Seraya.
Hananiya ɗa vuza vu kelime vu kpa'a ku Irimiya,
13 Meshulam ɗa vuza vu kelime vu kpa'a ku Ezira;
Jehohanan ɗa vuza vu kelime ku kpa'a ku Amariya.
14 Janata ɗa vuza vu kelime ku kpa'a ku Maluka Isufu ɗa vuza vu kelime vu kpa'a ku Shebaniya.
15 Adana ɗa vuza vu kelime vu kpa'a ku Harim, Helekayi ɗa vuza vu kelime vu kpa'a ku Merayotu.
16 Zakariya ɗa vuza vu kelime vu kpa'a ku Ido,
Meshulam ɗa vuza vu kelime vu kpa'a ku Gineton.
17 Zikiri ɗa vuza vu kelime vu kpa'a ku Abiya,
i ta̱ kpamu n vuza vu kelime vu kpa'a ku Miniyamin. Pilitayi ɗa vuza vu kelime vu kpa'a ku Mo'adiya.
18 Shamuwa ɗa vuza vu kelime vu kpa'a ku Biliga,
Jahonata ɗa vuza vu kelime vu kpa'a ku Shemaya.
19 Matenayi ɗa vuza vu kelime vu kpa'a ku Joyaribu,
Uzi ɗa vuza vu kelime vu kpa'a ku Jedaya.
20 Kalayi ɗa vuza vu kelime vu kpa'a ku Salu
Eberu ɗa vuza vu kelime vu kpa'a ku Amoku.
21 Hashabiya ɗa vuza vu kelime vu kpa ku Hilikiya,
Netanelu ɗa vuza vu kelime vu kpa'a ku Jedaya.
22 A makyan ma na Dariyu wi o tsugono tsu Pashiya ɗa a ɗanai ula aza e kelime a i'uwa yi ikaya ya aza e Levi n anan ganu a ayin Eliyashibu, ele ɗa Joyada n Johanan n Jaduwa.
23 Ɗa kpamu a ɗanai ula aza e kelime a i'uwa yi ikaya ya aza e Levi a katagarda ka tsumani a ayin a Johanan maku ma Eliyashibu.
24 Na ɗa ula aza e kelime a i'uwa ya aza e Levi. Hashabiya n Sherebiya n Jesuwa maku ma Kadimiyelu n aza e le a na a tsu shamgba e kelime ka aza a na a tsu canana ishipa i kucikpa, kapashi kete a ku canana kete a̱ kushuku, tsu na Dawuda vuma vu Ka̱shile u danai.
25 Aza a kindi ku utsutsu wa̱ A̱'isa̱ a gbayin a na i uɓon u kunu ku kuzuwa ele ɗa, Mataniya n Bakubukiya n Obodiya n Meshulam, n Talumon n Akubu.
26 Ra̱ka̱ uma a nampa ɗa a ya'in ulinga a ayin a Joyakim maku ma Jesuwa, maku ma Jozadaku, a ayin a na Nehemiya wi o tsugono. A makyan ma nanlo Ezira kaɗani ɗa ganu.
Erengi mashilya ma Urushelima
27 A makyan ma na i e kerengu Urushelima va, ɗa e ɗekei aza e Levi a̱ ubuta̱ u na i dem, a̱ ta̱wa̱i n e le a Urushelima adama a na a ya'an ka̱ɗiva̱ ke kerengu n ishipa i kucikpa n tsuwa'i tsu ugogi n umolu nu ndele.
28 A̱ tuka̱i n aza a ishipa kakau a na i a̱ likuci i kenke'en i na yi uka̱ra̱'i n Urushelima n likuci i kenke'en i Netofa,
29 ili i na i ɗikai a Betu-giliga, n uɓon u Geba n Azamavetu, adama a na aza a ishipa a ma'asaka ta̱ ka̱ci ke le i'uwa uka̱ra̱'i n Urushelima.
30 Ana anan ganu n aza e Levi a takpai nshinda̱ n le, ɗa a takpai nshinda̱ n uma n utsutsu n mashilya ma̱ likuci ka.
31 Ɗa n zuwai aza e kelime a Yahuda a kumba gaɗi vu mashilya ma. Ɗa kpamu n zuwai aza e kelime a ishipa u gboku u re o tono mashilya ma. U gboku u te u tono uɓon u ɗakai ali a kubana a̱ Utsutsu u Ka̱kiza̱.
32 Ɗa Hoshaya n kagimi ka aza e kelime a Yahuda o tonoi le,
33 n Azariya n Ezira n Meshulam,
34 n Yahuda m Bayami n Shemaya n Irimiya feu o tonoi le.
35 Koɓolo ka anan ganu ko yoku ko tonoi le n a̱ lika̱i igbala n Zakariya maku ma Janata matsukaya ma Shemaya a kpa'a ku Mataniya, n maku ma Mikaya n maku ma Zakuru n maku ma Asafa,
36 A̱ ka̱tsuma̱ ka aza a̱ ni, anan Shemaya n Azarelu n Milalayi n Gilalayi n Ma'ayi n Netanelu n Yahuda, koɓolo n Hanani. ra̱ka̱ vu le i ta̱ n ucanuku wi wa'ashi tsu na Dawuda vuma vu Ka̱shile u danai, Ezira ɗa malum ma na mi o kutono n e le.
37 A lya'i kelime nu nwalu ili i na i ɗikai a̱ Utsutsu u a̱shi a̱ mini a kumbai adasukpatsu a kubana a̱ ubuta̱ u na u la'i n ugaɗi a mashilya ma̱ likuci i Dawuda ya. O tonoi n tsugaɗi tsu kpa'a ku Dawuda ali a kubana a̱ Utsutsu u Mini n tsugaɗi tsu likuci i Urushelima.
38 Koɓolo ka aza a ishipa ke i re tankpamu o tonoi ugula̱ n uɓon u gaɗi u mashilya ma. Ɗa n tonoi le ali a gaɗi vu mashilya ma n kagimi ka uma, tsu tonoi n uɓon u kuma'a ku ugaɗi ku na a ci ya'an boroji ali a kubana a Mashilya ma Wanshi.
39 Ɗa tsu tonoi n Utsutsu u Ifrayimu, n Utsutsu u Jeshana, n Utsutsu wa Adan, n kuma'a ku ugaɗi ku Hananelu n Kuma'a ku ugaɗi Amangatawun, a kubana Utsutsu wu Nlala. Ana tsu yawai a̱ Utsutsu wa aza Kindi ɗa tsu shamgbai.
40 Ta aza ishipa a ugboku u re wa a shamgbai a̱ ubuta̱ u le a kpa'a ku Ka̱shile. Ta mpa feu n kagimi ka nkoshi m gba̱ra̱-gba̱ra̱ ci ya'in nannai,
41 A̱ ka̱tsuma̱ ka anan ganu aza a̱ kulika̱ igbala ele ɗa, Eliyakim n Ma'aseya n Miniyamin n Mikaya n Eliyoni n Zakariya n Hananiya feu.
42 N anan Ma'aseya n Shemaya n Eliyaza n Uzi, n Jehohanan n Malikiya n Elam n Eza feu. Jezarahiya u tonoi n aza a ishipa ya, ɗa a ci canana ishipa n utsura ka̱u.
43 A kanna ka nanlo ka'a a ya'in kune'e n a̱bunda̱i, ɗa uma a ya'in ma̱za̱nga̱ ka̱u adama a na Ka̱shile ka ya'anka le ta̱ ili ma̱za̱nga̱. A̱ma̱ci n muku feu a̱ za̱nga̱na̱ ta̱. Ali aza a da'in a panai yoroli i ma̱za̱nga̱ a Urushelima.
Ofoɓuso adama a ulinga wa̱ A̱'isa̱ a gbayin
44 Makyan ma nanlo ma'a a zuwai aza a na a kinda mpon n na a tsu zuwa ili i kashina i na uma o ɓolongi, n ili i kashina i na i gita̱i kuge'we n ili i te a̱ ka̱tsuma̱ ka kupa i na a̱ tsu tuka̱. Uma i ta̱ a̱ kuka̱na̱ kuɓolongu ili ya ashina a na i uka̱ra̱'i n likuci ya, ka̱ta̱ a̱ tuka̱ punu o mpon ma adama anan ganu n aza e Levi, tsu na kuyotsongusu ku dansai, ɗa tana aza a Yahuda a panai uyo'o tsu na anan ganu n aza e Levi i a kuya'an.
45 Ɗa anan ganu n aza e Levi o tonoi wila̱ u kucikpa Ka̱shile ke le, n wila̱ u kutakpa nshinda̱, tsu na Dawuda n maku ma̱ ni Sulemanu a danai. Ta feu aza a ishipa n aza a kindi ku utsutsu wa̱ A̱'isa̱ a gbayin a ya'in nannai.
46 N ayin a cau ɗe, a makyan ma Dawuda mogono n Asafa, aza e kelime ki ishipa i ta̱ lo, ishipa i kucikpa Ka̱shile feu yi ta̱ lo.
47 A ayin a Zerubabelu n ayin e Nehemiya, aza a Isaraila ra̱ka̱ e neke ta̱ aza a ishipa n aza a kinda ku utsutsu ili i na a zuwai le e neke. ɗa kpamu a takpakai aza e Levi kune'e ku le, ɗa aza e Levi a feu a takpakai kumaci ku Haruna anan ganu kune'e ku le.