4
Tsurala adama a ulinga u kuma'a ka
1 Ana Sanbalatu u panai a̱tsu aza a Yahuda ci gita̱ ta̱ kuma'asaka mashilya ma, ɗa u ya'in wupa ka̱u u zo'oshi tsu.
2 Ɗa kpamu u dansai e kelime ka aza a̱ ni n osoji a aza Samariya, u danai, <<Yiɗa̱i uma a Yahuda aza a unambi wu utsura a nampa i a kuya'an? Ene ta̱ i ta̱ a kufuɗa kuma'asaka mashilya ma n ka̱ci ke le? Ko i ta̱ a kuya'an alyuka ɗa? I ca ni a kuciga kukotso ulinga wa kanna kete? Ko ene i ta̱ a kufuɗa o bonoko kaginga ka atali a na a̱ kula̱i va n wuma tsu na ishi?>>
3 Ɗa Tobiya vuza vu Amona vuna wi kashani ɗevu n a̱yi u danai, <<Mashilya ma na i a kuma'a va meshe'e ma kakamba ma kumba baci ma'a mi ta̱ a̱ kuyikpa̱.>>
4 Ɗa mpa Nehemiya n ya'in avasa n danai, pana tsu na o goyoi tsu Ka̱shile ka̱ tsu, ya'an ishikushi i na i a kuya'anka tsu i bono a kaci ke le. Ka̱ta̱ a̱ pura̱ le a banka tsugbashi a iɗika i yoku ci ili i gbani i na a̱ pura̱i a̱ ubuta̱ u ku.
5 Ka̱ta̱ vu cinukpaka le unushi u na a ya'in ba, ka̱ta̱ kpamu vu takpaka le unushi u na a ya'ankai nu ba, adama a na a shika tsu ta̱ a̱tsu a ma'in.
6 Ɗa tsu lya'i kelime n kuma'a mashilya ma ali ma yawai kagimi ka ugaɗi ka̱ ni, tsu gasakai likuci ya ra̱ka̱, adama a na uma a ya'an ta̱ ulinga wa n a̱ɗu ra̱ka̱.
7 Ama a na Sanbalatu n Tobiya n aza Arabiya n Amona n Ashidodu a panai ulinga u kulapulu ku mashilya ma Urushelima ma wi ta̱ a kulya'a kelime, kpamu uɓon una a̱ la̱nga̱sa̱i va u ɗa u ya'an ta̱ u lapuli, ɗa a ya'in wupa ka̱u.
8 Ɗa ra̱ka̱ vu le a gbaɓai kaci adama a na a bana a ya'an kuvon n aza Urushelima, ka̱ta̱ a̱ tuka̱ nu nripula̱.
9 Ama ɗa ci ya'in kavasa u Ka̱shile ka̱ tsu, ɗa tsu zuwai aza a kindi inda le kanna n kayin.
10 Ɗa aza a Yahuda a danai,
<<Utsura wa aza a ulinga wa wi ta̱ a̱ kugusa̱,
kaginga ka atali n kayala ka buwa ta̱ n a̱bunda̱i.
Nini ɗai tsa kufuɗa kuma'a mashilya ma?>>
11 Ɗa Irala i tsu i danai, <<Kafu e yeve i na i lo ko ene tsu, ci ta̱ a ku'uwa wu e le tsu una le, ka̱ta̱ tsu shamgbatangu ulinga u kuma'a wa.>>
12 Ama makyan n a̱bunda̱i aza a Yahuda a na i a̱ ida̱shi ɗevu n irala i tsu, a̱ tsu ta̱wa̱ ta̱ n a danai kusheshe ku na irala i tsu i a ya'anka tsu.
13 Ta n zuwai uma a o foɓuso nannai, n peciki le tsu na i a kumaci ku le a̱ ubuta̱ u na ka̱ta̱ o kotso kuma'a mashilya ma ba. Uɓa̱ni n ucanuku u kuvon u le otokobi n aya'a nu njiki.
14 Ana menei tsu na kakuna ka ki, ɗa n ɗa̱nga̱i n ɓolongi aza gbagbain n nkoshi n gba̱ra̱-gba̱ra̱ n aza a na a buwai n danai, <<Ka̱ta̱ i pana wovon wi irala i tsu ba. Ciɓai Vuzavaguɗu wi ta̱ n tsugbayin kpamu ili i wovon, ya'in kuvon adama a̱ muku n ɗa̱ olobo nu nkere n ɗa̱ n a̱ma̱ci a̱ ɗa̱, n i'uwa i ɗa̱.>>
15 Ana irala i tsu a̱ ciya̱i kuyeve tsu yeve ta̱ kusheshe ku le, ɗa kpamu Ka̱shile ka̱ sa̱nka̱i le kushatangu kusheshe ku le. Ɗa ra̱ka̱ vu tsu tsu bonoi a̱ ubuta̱ u ma'asaka mashilya ma.
16 Ili i na i ɗikai a kanna ka nanlo, aza o yoku a kuya'an ulinga u kuma'a mashilya ma aza o yoku tamkpamu uɓa̱ni n ucanuku u kuvon, nsara n nra̱ga̱ nu njiki nu ntogu mi iyim. Ɗa aza kelime e peciki ka̱ci ke le a shamgbai a̱ ka̱ca̱pa̱ ka aza a Yahuda.
17 Aza a na i a kuma'a mashilya ma n aza a na i a kuɗika ucanuku a̱ ka̱na̱i kuɗika u ɗa n kukiye ku te, kukiye ku te tankpamu uɓa̱ni n ucanuku u kuvon.
18 Kama'i dem ki ta̱ u woki n kotokobi ka̱ ni a makya'a ma na wi a kuma'a. Ama vuza na wa̱ kulika̱ kavana wi ta̱ ɗevu nu mpa.
19 Ɗa n danai nkoshi n gba̱ra̱-gba̱ra̱ n aza a gbagbain n uma a na a buwai, n danai, <<Ulinga wa u gbayin u ɗa, kpamu u ɗa wi ta̱ u pecekushi, a̱tsu feu cita̱ upecekushi dada'in n vu toku a̱ ubuta̱ u kuma'a mashilya ma.
20 Ɗa baci i panai ciliki tsu kavana, ka̱ta̱ i ɓolongu ɗe a̱ ubuta̱ wa, Ka̱shile ka̱ tsu ki ta̱ a kuya'an vishili adama a̱ tsu.>>
21 Ta ci lya'i kelime n kuya'an ulinga u kuma'a wa nannai a kanna lakam n usana ali ubuta̱ u yimba̱na̱, kagimi ka̱ tsu a ulinga u mashilya, kagimi ka̱ tsu ko yoku tankpamu uɓa̱ni nu nsara.
22 A makyan ma nanlo n dana ta̱ uma a, <<Ya'an vuma dem koɓolo n ka̱ɓa̱nki ka̱ ulinga ka̱ ni a̱ da̱sa̱ngu a Urushelima, adama a na a̱ la̱na̱ likuci ya n kayin, ka̱ta̱ kpamu a ya'an ulinga n kana.>>
23 Adama nannai mpa ko aza a̱ va̱, ko agbashi a̱ va̱, n aza a kinda a na i koɓolo nu mpa, babu vuza na u foɗoi motogu ma̱ ni. Yaba dem uɓa̱ni n ucanuku u kuvon u ni.