1 A na i lo ɗa uma o yoku a̱ma̱ci n ali, a̱ ka̱na̱i kuya'anka aza e le aza a Yahuda mololo. 2 Adama a na aza o yoku a dana ta̱, <<A̱tsu n muku n tsu olobo nu nkere ci ta̱ n a̱bunda̱i, ci ta̱ a kuciga ilikulya'a i na tsa kulya'a adama a na tsu ciya̱ wuma.>> 3 Ɗa kpamu aza o yoku a danai, <<Tsu neke ta̱ ashina a̱ tsu, n ashina a itacishi, n i'uwa i tsa aguta, adama a na tsu ciya̱ ili kulya'a ta lo tsa̱ ku kuwa̱ n kambulu.>> 4 Aza o yoku kpamu a dana ta̱, <<Tsu kopuku ta̱ ikebe adama a na tsu tsupa mogono utafu wa ashina a̱ tsu n ashina a itacishi a̱ tsu. 5 A̱ tsu ta na vuza ɗa n vutoku mpasa n te. Muku n tsu nu n le ili i te i ɗa. N nannai dem ɗa a zuwai tsu tsu zuwa muku n tsu olobo nu nkere n tsu okpo agbashi. Muku mu n kere n tsu n yoku e denge le ta̱ ɗe ɗa okpoi agbashi, ama ci n utsura u na ci ya'an ili i yoku ba, adama a na isa ta̱ ashina n ashina a itacishi a̱ tsu.>> 6 Ana mpa Nehemiya n panai mololo ma n kadanshi ka, ɗa n na̱mgba̱i ka̱tsuma̱ ka̱u. 7 Ana n sheshei a̱ ka̱ɗu ka̱va̱, ɗa n nekei aza a gbagba'in nu nkoshi n gba̱ra̱-gba̱ra̱ unushi. Ɗa n danai le, <<Yi ta̱ o kuɗoro aza a̱ ɗa̱ a̱ ubuta̱ wa okopu ana yi e kunekeshe le, ali ɗa yi a ku isa i pasatangu i na i nekei le,>> Ɗa n ɓolongi ka̱bunda̱i ka uma adama a kakuna ka. 8 Ɗa n danai le, <<Ci ya'an ta̱ tsu na tsa kufuɗa adama a na ci shiba̱ aza a̱ tsu aza a Yahuda a na e dengei wa aza a na i aza a Yahuda ba. Ama ali n gogo na yi ta̱ e kudenge aza a̱ ɗa̱, ali kuyain kuɗai tsa ku tsulasaka le?>> Ɗa a paɗai bini, adama a na a̱ ciya̱ ili i kudansa ba. 9 Ɗa n danai le, <<Ili i na yi a kuya'an i ɗa i ga'an ba. U ga'an ta̱ i yongo n wovon u Ka̱shile, adama a na ka̱ta̱ irala i tsu ele na i aza a Yahuda ba, a̱ ciya̱ i na a kuya'anka tsu ma̱ka̱n ba. 10 Mpa n aza a̱ va̱ n agbashi a̱ va̱ feu ci ta̱ e kunekeshe uma okopu ikebe n ilikulya'a. Ama gogo na ya'an tsu ka̱sukpa̱ kuneke kutan n ci isai tsu pasatangu i na tsu nekei. 11 Anana i bonoko le ashina e le n ashina itacishi e le n ashina a nɗanga n Zaitu n le n i'uwa i le n ili i na yi isai i pasatangi va dem, ugboku u te a̱ ka̱tsuma̱ ka amangatawun a ikebe n ilikulya'a n ma̱kya̱n, n ma'in ma zaitu.>> 12 Ɗa aza e kelime a ushuki a danai, <<Ci ta̱ a kuya'an tsu na vu dansai. Ci ta̱ o kubonoko le n ucanuku le, ci kpamu o kudoku ku isa ili i yoku we le ba.>> Ɗa n ɗekushei anan Ganu ɗa n zuwai nkoshi n gba̱ra̱-gba̱ra̱ a kucuna e kelime ke le ka anan ganu a dana i ta̱ a kushatangu i na a dansai. 13 Ɗa n za̱ka̱tsa̱i motogu ma̱ va̱ ɗa n danai, <<Tsu nampa tsu ɗa Ka̱shile ka̱ za̱ka̱tsa̱ vuza na baci u kpa̱ɗa̱i kushatangu uzuwakpani u ni. Ya'an kpamu Ka̱shile ka̱ pura̱ngu ili kpa'a ku ni ra̱ka̱, ka̱ta̱ kpamu u ka̱sukpa̱ babu i li.>> Ɗa ka̱bunda̱i ka uma kana ko ɓolongi va kucukpai ka danai, <<Wokpo nannai>> Ɗa a cikpai Vuzavaguɗu. Ɗa aza gbagbain a shatangi uzuwakpani u na aya'in. 14 Ko n tsu nannai, makyan ma na a zuwai mu Gomuna a̱ likuci i Yahuda, a̱ya̱ kupa n e re a na a lazai, a̱ ka̱ya̱ kamanga ko tsugono tsu mogono Atazesu, ali a kubana a̱ ka̱ya̱ ka kamangankupa n e re, mpa ko tana aza a̱ va̱ babu vuza na wi isai ilikulya'a tsu mogono. 15 Anan Gomuna a na a lya'i tsugono kafu mpa a takacika ta̱ uma ka̱u a̱ ubuta̱ u ku isa ilikulya'a n ma̱kya̱n we le, babu bi'i ikebe ya azurufa amangere. Ali olobo aza a na i a kuya'anka le ulinga a kuya'anka uma a̱ra̱ɗi. Ama mpa n ya'an tsu le ba, adama a na mpa mi ta̱ a kupana wovon u Ka̱shile. 16 Adama a nannai ɗa n nekei utsura u va̱ a̱ ubuta̱ u kuma'asaka mashilya ma. Ɗa olobo a na i a kuya'anka mu ulinga a gbaɓai kaci adama a ulinga u kuma'a ka, ra̱ka̱ vu tsu tsu tsula ashina ba. 17 Ko n nannai aza a Yahuda nu nkoshi n gba̱ra̱-gba̱ra̱ ele uma amangatawun n amangerenkupa (150) ɗa a lya'i koɓolo nu mpa, babu bi'i uma a na a̱ ta̱wa̱i wa̱ a̱tsu aza a na a̱ ida̱shi u ka̱ra̱'i n a̱tsu. 18 Tsu nampa tsu ɗa a ci ya'anka mu ilikulya'a a kana lakam. A tsu kiɗa ta̱ kanaka kete n nlala n ta̱li n na mi n tsuloboi, nu ntoku n a̱bunda̱i, a kanna dem a̱ tsu tuka̱ ta̱ edele a̱ ma̱kya̱n ma savu. Ama ko n tsu nannai mi isa ilikulya'a tsu gomuna ba, adama a na uma i ta̱ a̱ ka̱tsuma̱ katakaci n a̱bunda̱i.

19 Ka̱shile ka̱ va̱, ciɓa vu ya'anka mu kasingai adama ili i na n ya'ankai uma a nampa a.